Сайбағларны санға аларға
09.12.2020
Хабарлар
Штаб чыылии. Теестегi оперативнай штаб чыылиинда 2021 чылда республиказар читiрiлер коронавирустаң тоғыр вакцинаны хайраллир оңдайлар тӧстирi паза город-аймахтарда сыныхтағлар салтарлары ӱзӱрiлген
Хакасия пазы Валентин Коноваловтың устаанынаң оперативнай штаб чыылии кӱннiң иртче. Пӱӱнгi чыылығда ӧӧн хайығ 2021 чылда Хакасиязар ызылар коронавирустаң тоғыр 36 муң вакцинаны хайраллир оңдайларны тӧстирi ӱзӱрiлген. Хакасияның хазых хайраллаҷаң министрi орынҷызы Елена Быкованың искiриинең, коронавирустаң тоғыр вакцинаны -18 градустаң чылығ орында тударға чарабас. Аннаң чылығда тудыбыссох, ол позының кӱзiн чiдiрчеттiр. Аннаңар аны хайраллирға, пiр орыннаң пасха орынзар кӧзiрерге ӧнетiн техника, холодильник паза тирiг киректелче. Пу оңдайларға тӧстенiп, республикада алты орында, ӧӧнiнде городтарда паза килкiм аймах кiннерiнде, прививка турғызылары кӧрiлче. Аның ӱчӱн вакцинаны хайраллирына 6 ӧнетiн морозильник, кӧзiр чӧрҷең хапчыхтар паза аның сооғын сыныхтаҷаң индикаторлар аларға кирек. Пу ла тирiглерге 5 миллионҷа салковай киректелче. Ағаа хоза чап полған ӧнетiн машина садызарға, ағаа хоза 4 миллион азыра салковай кирек. Ӱзӱрiг соонаң тирiглернi ле садызарға чарадылған. Ағаа хоза Хакасияның хазых хайраллаҷаң министрi тоғызын толдырчатхан Олег Ананьевскийнiң искiриинең, морозильниктернi садызар предприятиее чахып салғаннар. Ахча ла табырах арах позыдарға халған. Хакасия пазы Валентин Коновалов финанстар министерствозына 5 миллион салковай пу кӧстеге чапчаң позыдарға чахаан.
– 2021 чылда коронавирустаң тоғыр вакцина республика чуртағҷыларының 60 процентiне ызылар, кискектең тоғыр вакцина чiли, - чарытхан штаб араласчыларына Олег Ананьевский. – Пастағы 36 муң вакцина, ол республиказар пiр саңай килбес. Ол тӧрт чардыхтаң кiрер, аннаңар вакцинаны хайраллирға алылар морозильниктер чидер.
Тиксi алза, республикадағы имнег тураларында орыннардаң паза имнег полызиин читiрерiнең сидiксiнiстер чоғыл. Хығыртығлар саны хызырылчатханы таныхталча. Че аар ағырчатханнар ам даа илееде. Ирткен суткада паза iкi кiзi коронавирустаң ӱреен.
Имҷiлер таниинаң, кӱскӱзiн кискектең тоғыр прививка турғысхан чуртағҷылар коронавирусты чухтырзалар даа, ниик ағырчаттырлар. Аннаңар пу прививканы 65 часты аза халған даа чуртағҷыларға турғызарға чарадылған. Кӧзiдiмге, Ағбан городта прививка Командорның садығ тураларында турғызылар. Анда алынҷа пӧлiк пирiлер, прай хорғыс чох оңдайларға тудынып, прививкаларны турғызарлар.
Паза пiр сағыссыратчатхан сурығнаң чоох тутхан республиканың юстиция киректерiнҷе паза регион безопаснозынҷа министр Сергей Ромашов. Ол город-аймахтарда иртiрiлчеткен сыныхтағлар. Аның чооғынаң, сыныхтағлар иртiрiлзе дее, ноға-да сайбағлар таныхталбинча. Аннаңар сурыныс полған, сыныхтағларны удаа иртiрiп, прай сайбағларны санға ал турарға. Ол саринаң сағам Ағбан, Харатас паза Шира аймаа ла тоғынчаттыр. Кӧп читпестер Таштып аймаанда паза Саяногорскта таныхталча. Ӏдӧк пiрее министерстволарға тоғыстарын айныдарға чӧптер пирiлген. Хакасия пазы Валентин Коновалов алынҷа министерстволарға килчеткен понедельникте чоох тударға тимнен саларға чахаан.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде