Прививканы иртiрерiн айныдарға
18.12.2020
Хабарлар
Кӱннiң иртчеткен штаб чыылииндағы сан пирiс хоостыра наа ағырыбысханнар саны 178 кiзее тиңнелче, 1733 кiзiдең тест алылған, 210 кiзi табырах сыныхтағны ирткен. Пу суткаа коронавирустаң ӱреен пис кiзi таныхталған.
Хакасияның хазых хайраллаҷаң министерство искiриинең, имнег тураларында коронавируснаң ағырчатханнарны чатырҷаң орыннарның 21% пос. Кискектең тоғыр прививка турғызарынҷа тоғыс ӧткiн апарылча. Кӧрiлген синнiң 93% толдырыл парған: ол республика чуртағҷыларының 58%. Асхыс паза Таштып аймахтарында прививка уйан апарылча. Тиксi алза, республикаа ам даа 21 муңҷа чуртағҷаа прививка турғыс пирерге кирек. Хакасия пазы Валентин Коновалов пу тоғысты ай тоозылғанҷа толдыр саларға киректеен.
Тынағ кӱннерiнде Ағбандағы табырах имнег полызии службазында 18 бригада тоғынар. Пасха город-аймахтарда хығыртығлар саны, тӱзiп, пiр синде тудылча.
Республика пазы Валентин Коноваловтың чахиинҷа экономика тилiзi министрi Виктор Богушевич ас-тамах паазы неделяда iкi хати сыныхталчатханнаңар искiрген. Халғанҷы неделяда ӱгӱрсӱ-помидорға ла паа ӧскенi таныхталған. Колбасаға, хай пiрее палыхтарға паа сала тӱскенi санға алылтыр. Министерство ас-тамахты садығ туразынаң ибзер читiрерiнҷе садығ тураларынаң чӧптезiглер апарча. Аннаң пасха килчеткен неделяда пааларны Президент чахиинҷа кирiлген паанаң пӧзiк кӧдiрбезiнҷе улуғ садығ тураларынаң чӧптезiглерде хол салылар.
Ӧӧн искiрiглер соонаң Асхыс паза Ағбан пилтiрi аймахтары, iдӧк Абаза город коронавирусты тараттырбазынҷа паза имнег полызиин тузында читiрерiнҷе тоғыс хайди апарылчатханнаңар искiргеннер. Прай даа орыннарда чон чыылысчатхан, культура мероприятиелерi тохтадылғаннар. Улуғ хайығ ағырығны тараттырбас ӱчӱн орта тудынар кирексiнiстерге айландырылча. Аннаңар волонтерлар чоохтапчаттырлар. Пу тоғыс Ағбан пилтiрi аймаанда апарылча.
Хайзы даа муниципальнай пӱдiстерде ағырығ ӱгредiг учреждениелерiнде тарапчатханы чочытча. Роспотребнадзор кiзiлерi искiриинең, предприятие-учреждениелерзер кiрчетсе, прай кирексiнiстер толдырылчатса, тоғыс тузында кiзiлер пiр орында азыранчатханы сығыстыр, ол, тiзең, ағырығны хаптырып аларына иң килiстiре оңдай тiпчелер.
Хакасия пазы Валентин Коновалов пазох сыныхтағларға паза сайбағларны санға аларына хайығ айландырған. Аның кӧрiзiнең, чуртағҷылар хай пiрее орыннарда ам даа прай кирексiнiстерге тудынминчалар. Аннаңар город-аймах пастарына протокол пазар полномочиелiг тоғынҷылар санын хозарға чӧп пирiлген.
Таңда штаб чыылии 10.00 часта иртер.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде