Зеленайда амбулатория азылды
04.01.2021
Хабарлар
Пӱӱн, кӱрген айының 4-ҷi кӱнiнде, Хакасия пазы Валентин Коновалов Ағбан пилтiрi аймаандағы Зеленай аалда имнег амбулаториязын азарында араласхан. Наа социальнай пӱдiрiг чуртағҷыларның улуғ кирексiнiзi полған. Анзын танығлығ киректе араласхан прай даа пастыхтар таныхтааннар. Зеленайда 2000 азыра чуртағҷы саналча, ол санда 400-ке чағын 17 часха теере палалар. Амды оларға имнег полызиин орында, Харатассар алай Ағбан пилтiрiнзер чӧрбин, чахсы оңдайларда аларға чарир.
– Чуртағҷылар, уламох улуғ частығлар, имнег полызиин орында аларын чидiкпин сағааннар, - чарытхан фельдшер Елена Бугаева. – Амды оларның сағыстары толды. Наа чыл алнында пiс тоғызыбысты пастаабыс, наа амбулаторияда истiг, чарых паза чылығ.
Фельдшернiң сӧстерi сын полчатханын пос хараанаң кӧрерге килiскен. 200 квадрат метр улуғ турада 13 пӧлiк саналча: улуғларға паза олғаннарға алынҷа имҷi кӧрҷең, прививка турғысчаң паза процедуралар пӧлiктерi, аптека, тоғынҷылар пӧлии паза пасха полызығлығ пӧлiктер. Ағаа хоза улуғлар паза олғаннар имнег полызиинаң алынҷа туста тузаланчалар. Республикада кӧрiлген имнег полызии читiрiл сыхса, амбулаторияда кӱнӧрткi стационар тоғынып пастир. Чылығ чарытхы кӱзiнең пирiлче, че аның хорадығлары улуғ нимес. Улуғ хырлас айында 3000 килоВт хорадылғаны санға алылған. Итсе, ирткен ай чылығ полған тиирге чарир.
Зеленайда имнег амбулаториязы ирткен чылда пӱдiрiлген. Модульнай тураа ахча «Пастағы имнег-санитар полызиин читiрҷең системаның тилiзi» регион проектiнҷе паза «Хакасияның хазых хайраллирының тилiзi» хазна программазынҷа пирiлген. Ағбан пилтiрi аймааның устағ-пастаа, тiзең, амбулаториязар чолны паза машиналар турғысчаң орынны иптеп салған.
Имнег туразынзар специалисттернi тартарынҷа тоғысты республиканың хазых хайраллаҷаң министерствозы паза аймахтың имнег туразы пiрге апарчалар. Пӱӱл iкi медсестра тоғысха алылған. 2022 чылда орғах айында чиит имҷiнi сағыпчалар. Пӱӱнгi кӱнде ол кӧстеглiг чӧптезiгҷе «Сӧбiре имҷiзi» специальностьча ординатурада ӱгренче.
Хакасия пазы Валентин Коновалов, Ағбан пилтiрi аймаа пазының пастағы орынҷызы Иван Белоус паза Ағбан пилтiрi аймааның имнег туразының ӧӧн имҷiзi Екатерина Трефилова, наа амбулаторияны азып, хызыл чаламаны кискеннер.Тура иркенiн алтап, Валентин Олегович прай пӧлiктернең танысхан. Амбулаторияҷа экскурсияны Екатерина Трефилованаң Елена Буганова иртiргеннер. Хакасия пазы алылған оборудованиелердеңер сурастырғлаан. Имҷiлернiң нандыриинаң, амбулаторияның тоғызына киректелчеткен тиксi оборудование алылған.
Зеленайның чуртағҷылары паза аймах устағ-пастаа республика пастыхтарына, пу аалға хайығ айландырып, имнег амбулаториязын пiр чыл аразына пӱдiр пирген ӱчӱн алғыс сӧстерiн читiрген.
Республика устағҷызының тоғыс чорығы, тiзең, мыннаң тоозылбаан. Олох кӱн ол Ағбан пилтiрi аймаандағы имнег туразында тыхтағ тоғыстары хайди апарылчатханынаң танысхан.
Автор :
Наталья Субракова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы