Тыхтағ тоғызын айныдарға!
04.01.2021
Хабарлар
Хакасия пазы Валентин Коновалов, Ағбан пилтiрi аймаандағы имнег туразында тыхтағ тоғыстары хайди апарылчатханын сыныхтап, подряд пiрiгiзiне iкiнҷi паза ӱзiнҷi хадылларны кӱрген айының 20-ҷi кӱнiне тимге сығарарға чахаан.
Имнег туразының iкiнҷi хадылында чуғынҷах ағырығлар паза реанимация пӧлiктерi орныхча. Мында коронавирустаң имнеҷең кiн азылары кӧрiлче. Пӱӱнгi кӱнде пу хадылда тыхтағ тоғыстары тоозыл таа парған тиирге чарир. Анда оох-теек тоғыстар ла халған. Валентин Олегович палаталарда пол килген. Полған на палатада позының чуунынҷаң паза тасхын чӧрҷең пӧлии пар. Кирек мебель турғызылған. Пӧлiкте имнег оборудованиезiн турғызып пастабысханнар. Оларның пiрсi – УЗИ аппарады. Аның паа 1 миллион 900 муң салковай. Имнег туразының ӧӧн имҷiзi Екатерина Трефилованың искiриинең, наа оборудованиедең пасха, iдӧк алында алылған паза тузаланылған оборудование турғызылар.
Ӱзiнҷi хадылда хирургия пӧлии орнығар. Пу хадылда iстiндегi тоғыстар хыызында парча. Чарытхы, палғалыс паза пасха сетьтер тартылғаны кӧрiнген. Халған сырлабызарға, плиткаларны, линолиум тӧзебiзерге паза пасха тыхтағ тоғыстары. Кирек ниме-ноолар алыл партыр. Ӏзiктернi ле пӱӱн-таңда читiрер осхастар. Подрядчик кiзiзi тоғыстарны кӱрген айының халғанҷы кӱннерiне тоос саларға пӧгiнчеткеннерiнеңер искiрген. Хакасия пазы тоғыстар улуғ хырлас айындох тимге сығарыларға кирек полғанын сағысха кирген паза удур парчатханнарына хайығ айландырған.
– Тиксi тыхтағ тоғыстарын 40 кiзi толдырча, ӱзiнҷi хадылда – 15 кiзi, – нандырған подрядчик кiзiзi республика пазына. - Тынағ кӱннерi соонаң пӱӱн тоғынып пастапчабыс.
Хакасия пазы подрядчикке тыхтағ тоғыстарын толдырарына хоза тоғынҷыларны тартарға паза кӱрген айының 20-ҷi кӱнiне тоғыстарны тоос саларға чӧптеен. Аннаң пасха тӧртiнҷi хадылны, хайда терапия пӧлии орнығар, азығ айының 1-ғы кӱнiне тимге сығарарға кӧрiлген. Азығ айы тоозылғанҷа пизiнҷi хадыл тимде поларға кирек. Анда неврология пӧлии орнығар. Республика ӱлгӱлерi пастағы хадыллар тимге сығарылза, оларны тоғындырарға пӧгiнчелер.
Хакасияның хазых хайраллаҷаң министрiнiң тоғызын толдырчатхан Олег Ананьевскийнiң искiриинең, тыхтағ тоғыстарының сметадағы паазы 114 миллион салковай, ол ахчаның 70 миллионы подрядчикке 2020 чылда позыдылған, халған ахчазы пу чылға кирiлген. Ахча тузында позыдылча. Аннаңар республика пазы тоғыстарны айныдарға киректеен.
Пазағы сыныхтағнаң республика пазы кӱрген айының 15-ҷi кӱнiнде кил парарға молҷаан.
Автор :
Наталья Субракова, сомнар Хакасия пазының паза Хакасия правительсвтозының пресс-службазыни
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы