Плановай имнег тоғызын пастирлар
11.01.2021
Хабарлар
Хакасия правительствозындағы коронавирус чуғынӌах ағырығ тарапчатханынаң тоғыр кӱрезерiнӌе оперативнай штабтың теестегi чыылии ирткен.
Ирткен суткада республикада коронавируснаң 99 кiзi ағырыбысханы iлезiне сығысхан. Хазыхтанып алғаннарның саны 85 кiзее тиңнелче. Тиксi республикада 562 чуртағӌы тест иртiбiскен. Пандемия пасталғаннаң Хакасияда ковид хаптырғаннарның саны 18605 кiзее чит парған, ағырығдаң озып, хазыхтанып алғаннарның саны 16120 кiзее тиңнелче. Имӌiлер хайиинда 2954 кiзi. Ибде наа чуғынӌах ағырығдаң имненчеткеннернiң саны 1694 кiзее чит парған, имнег тураларында 504 пациент имненче. Ирткен суткада коронавирус диагнозтығ пiр кiзi ӱреен, пандемия пасталғаннаң ӱрееннернiң саны 284 кiзее чит парған.
Хайди таныхтаан Хакасияның хазых хайраллаӌаң министрiнiң тоғызын толдырчатхан Олег Ананьевский, тынағ кӱннерiнде имнег учреждениелерiнiң тоғыстары амыр оңдайнаң ирткен. Полған на имнег учреждение тоғызын тӱзiмнiг апарған. Тынағ кӱннерiнде коронавируснаң ағырчатханнарның саны син парған, тынағ кӱннерi тоозылчатханда, улуғ нимес öзiс пол парған. Хайди таныхтаан Олег Васильевич, ӱлӱкӱннерде чуртағӌылар имӌiлерзер тың на айланмааннар, амды айланарлар. Аннаңар пу неделяда ағырчатханнарның саны кöрiн парар.
- Пос салынарға ирте. Республикада профилактика оңдайлары кирiл парған, хоза хатығластар кирерi киректелбинче, - искiрген Хакасия пазы Валентин Коновалов.
Iдöк штаб чыылиинда ӱзӱрiлген республиканың имнег учреждениелерiн плановай имнег полызиин пирерiне айландырардаңар. Пу неделяда ол тоғыс апарылар, олох туста имнег учреждениелерi коронавируснаң ағырчатханнарға чатчаң орыннар читкiӌе поларын хайығда тударлар.
Хакасиязар коронавирустаң вакциналар килчелер. Прививка турғыстырарға сағынчатхан кiзi, чуртапчатхан чирде поликлиниказар айланып, вакцинация ирт полар.
Автор :
Тимнеен Наталья Тюкпеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы