Пос салынарға чарабас
27.01.2021
Хабарлар
Хакасия правительствозындағы коронавирус чуғынӌах ағырығ тарапчатханынаң тоғыр кӱрезерiнӌе оперативнай штабтың теестегi чыылии ирткен.
Ирткен суткада республикада коронавируснаң 43 кiзi ағырыбысханы iлезiне сығысхан. Хазыхтанып алғаннарның саны 102 кiзее тиңнелче. Пандемия пасталғаннаң Хакасияда COVID-19 хаптырғаннарның саны 20176 кiзее чит парған, чуғынӌах ағырығдаң озып, чазыл парғаннарның саны 18533 кiзее тиңнелче. Ибде наа чуғынӌах ағырығдаң имненчеткеннернiң саны 984 кiзi. Стационарларда 282 пациент имнег алча. Ирткен суткада коронавирустаң iкi кiзi ӱреен, пандемия пасталғаннаң ӱрееннернiң саны 374 кiзее чит парған ( 56 пациенттiң ағырығ аар иртче, ИВЛ-да - 7 кiзi).
Хакасияның хазых хайраллаӌаң министрiнiң тоғызын толдырчатхан Александр Стреленконың искiриинең, Ағбан пилтiрiндегi ööн имнег туразында ӱзiнӌi хадылында тыхтағ тоғыстар идiл парғаннар. Тöртiнӌi, пизiнӌi хадылларда тоғыстар аннаң андар апарылча. Пациенттерге паза пӱдiрiгӌiлерге имнег учреждениезiнзер алынӌа кiрӌең оңдайлар тöстебiзiп, тыхтағ идiл парған хадылларда имӌiлер iстенiп пастирлар тiп таныхтаан Александр Стреленко.
- Республиканың ыраххы пулуңнарында ағырчатханнарның саны öсче. Ағбан пилтiрi, Таштып, Орджоникидзе аймахтарында паза Саяногорск городта наа чуғынӌах ағырығнаң ағырчатханнарның саны пöзiк, - таныхтаан Татьяна Романова.
Республикада коронавирустаң тоғыр вакцинация апарылча. Таңда регионзар 2 муң 700 вакцина килерi кöрiлче. Олар имнег учреждениелерiнӌе тарадылар. Иң пастағызын 65 час ас парған паза чöреес ағырығлардаң ирееленчеткен чуртағӌыларға прививка турғызары кöрiлче. Пастағы февральға регионзар 8 муң азыра вакцина чидерi кöрiлче. Республиканың турғыстырарға сағынчатхан полған на кiзiзiне аны турғыстырза, вакцина пiрее пис кӱн аразына хорадыл парар, искiрген Александр Стреленко.
- Ағырчатханнарның саны синчеткен дее полза, кирек толдыразынаң ам даа чахсыланғалах. Аннаңар, Роспотребнадзорның чахығларына тудынмин, пос салынарға чарабас, - таныхтаан Хакасия пазы Валентин Коновалов.
Автор :
Тимнеен Наталья Тюкпеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде