Алыптығ нымах чылы пайрамни азыл парды
29.01.2021
Хабарлар
Ол танығлығ кӱн 28 январьда полған. Чон С.П.Кадышевтiң адынаң культура кiнiнде чыылысхан.
- Семен Прокопьевич Кадышев - хакас чонның саблығ хайӌызы. Аннаңар алыптығ нымах чылын аның адын ал чöрчеткен культура учреждениезiнде асчатханыбыс уламох поғдархастығ. Iзенчем, пу чыл турыстыра иртер. Хакасияда чон чайаачызын хайраллир паза тилiдер улус пар нооза. Олар устарынаң öсчеткен тöлнең ӱлезерге хаӌан даа тимделер, - теен Хакасия пазы Валентин Коновалов.
Пылтыр пiстiң республикада Россияның культура министерствозының хабазиинаң чоннар аразындағы "Тусты чиңен матырлар: алыптығ нымахтардаң пасти амғы тусха теере" фестиваль ирткен. Аны тимнирге полысхан паза анда öткiн араласханнарға пу иирде Хакасия правительствозының алғыстас пiчiктерi читiрiлгеннер. Таныхтатханнарның санында полғаннар: Л.Р.Кызласовтың адынаң чир- суғ ӱгренӌең музейнiң, "Хуртуйах тас" музейнiң, М.Е.Кильчичаковтың адынаң литература музейiнiң паза В.Г.Чаптыковтың адынаң Хакас филармониязының öмелерi.
Алыптығ нымах чылынаң алғыстап, чон алнынзар iдöк Хакасияның Ööркi Чöбiнiң хазых хайраллирынӌа паза социальнай политика комитедiнiң кнезi Евгений Молостов, Улуғлар чöбi кнезiнiң орынӌызы Виктор Чепчигашев сыхханнар. Анаң культура кiнiнiң улуғ залынзар чыылған кiзiлерге Хакас филармониязы П.В.Курбижековтың алыптығ нымағы хоостыра турғызылған "Ай-Хууӌин" ойынны кöрiп алар оңдай пирiлген.
Автор :
Александра Карамчакова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде