Тыхтағ тоғыстары узарадылар
06.02.2021
Хабарлар
Киӌее Хакасия пазы Валентин Коновалов Сорығ городтың Чорба станциязында орныхчатхан школазында тыхтағ тоғыстары хайди идiл парғанын сыныхтаан. Пӱӱл Наа чыл соонаң ӱгредiг учреждениезiнiң хыры нааӌылалған. Тыхтағ тоғыстары парчатханда, ӱгренӌiлер ӱгредиин Сорығдағы школада узаратханнар.
Амды, школаның хыры нааӌылал парғанда, олғаннар пос школазында пiлiс алчалар. Че андағ даа полза, орындағы школада тыхтағ тоғыстары узарадылар. Ӱгредiг учреждениенiң 18-ӌi кабинедiнде пол нааӌылалар паза стенелер иптелер, спортнаң айғасчаң залда iдöк тыхтағ тоғыстары киректелче. Аннаңар пӱӱнгi кӱнде ол кабинеттерде занятиелер иртiрiлбинчелер.
Сорығ городтың мэрi Владимир Найденов республика пазынаң школада наа кöзенектер турғызарынаңар сурығны пöгерiнде хабас пирерге сурынған. Валентин Коновалов ол сурығны республиканың ӱгредiг министерствозынаң хада ӱзӱрербiс тiп молӌаан.
Школаны сыныхтаан соонаң Валентин Олегович Сорығдағы чуртағӌыларнаң тоғазығ иртiрген. Хайда городтың öткiн чуртағӌылары илееде ағырсымнығ сурығлар кöдiргеннер. Ол санда орындағы музыка школазы паза Россияның почтазы иргiлен парған тураларда орныхчатханы полған. Хакасия пазы паза кöдiрiлген сурығларӌа нандырығлығ министерстволарның устағӌылары тоғазығда искiрiлген сурығларны хайығда тударбыс тiп чуртағӌыларны чöпсiндiгеннер.
Автор :
Ольга Томочакова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы