Тус сiрернi таллап алған
19.02.2021
Хабарлар
С.П. Кадышевтiң адынаң республиканың культура туразында чааҷы-интернационалист кӱнiне чарыдылған пайрамнығ иир ирткен. Ол «Тус пiстi таллап алған» тiп адалған.
Анда Хакасия пазы Валентин Коновалов, Ӧӧркi Чӧп кнезi Владимир Штыгашев араласханнар. Ӏдӧк пайрамнығ иирге кизек чаалазығларның ветераннары килгеннер. Иван Конусов Афганистанда танкист полып служба ирткен. Ӱгредиин Туркмениядағы Теджен городта ирткен. 1982 чылда ол хырығ озариндағы чаалазыға кiр парған.
- Пiс Кандагар хыринда орныххабыс, чолны хадағда тутхабыс. Пiстiң ӧӧн пӧгiнiбiс автомобильлер колонналарын хадағда тудары полған. Кандагар хыринда хойығ арығ пар, аннаң «душманнар» пiстiң колонналарыбысты китеп алҷаңнар. Пiр чаалазығ тузында ротабыстың пiр танкын чара чачырадыбысханнар. Андағы экипажтың наводчигi тiрiге кӧй парған, iкiзi аар палығлат салған, госпитальда чатхан. Харын даа ол танк экипажы прай снарядын ат салған, олар чара чачыраан ползалар, экипажтаң пiрдеезi тiрiг халбасчых, - службазын сағысха кирген Иван Васильевич. - Пiрсiнде пiстiң танкыбыссар снаряд учух килген, танктың пiр катогы сайбал парған. Ротазар айланғаныбыста, «сiрерге оң полды» тiп прайзы чоохтанған. Пайрам пасталчатханда, улуғ экранда пiстiң чир-суғҷыларыбыс араласхан кизек чаалазығлардаңар улуғ нимес кöзiдiг кӧзiт пиргеннер.
Хайди таныхталған, 32 чыл мының алнында, 15 февральда 1989 чылда, Совет Союзы войсколарының халғанҷы подразделениезi Афганистаннаң сығыбысхан. Пiстiң чир-суғҷыларыбысха наа тархындағы иң узун паза хан тӧгiстiг чаа тоозыл парған. 2010 чылдаң пу кӱн Россияның чааҷылар сабланызы кӱнiне кирiл парған. Пу кӱнде пiстiң чоныбыс хырығ озариндағы чаалазығларда араласхан чир-суғҷыларыбысты чеестепче. Чааҷы интернационалисттернi Хакасия пазы Валентин Коновалов алғыстирға сыххан.
- Пiстiң чааҷыларыбыс Афганистаннаң сыхханнаң 32 чыл ирт парған, iдӧк пӱӱл «Боевое братство» ветераннар пiрiгiзi 10-ҷы чылын таныхтапча. Кизек чаалазығлар араласчыларына паза прай чоныбысха ол улуғ кӱн полча. Афганистандағы чаалазығ тузында чааҷыларыбыс махачы хылиин кӧзiткеннер. Пӱӱнгi кӱнде дее ветераннар республиканың халых чуртазынаң оортах турбинчалар, кизек чаалазығларда чат халған чааҷыларның сӧбiрелерiне ӧткiн полысчалар, - таныхтаан Валентин Олегович.
Республиканың Ӧӧркi Чӧп кнезi Владимир Штыгашевтiң чооғынаң, «Боевое братство» чӧрiмде 1000 артиинаң чир-суғҷыбыс араласча. Олар Венгриядағы, Чехословакиядағы, Афганистандағы, Сириядағы, Даманскай олтырыхтағы чаалазығларда араласчалар. Ол чаалазығлардаң айланғаннары даа, анда чуртазын пир салғаннары даа аймах сыйыхтарнаң таныхтатханнар. Таштып аймаа чуртағҷызы Вениамин Шулбаев «Слава» орденiнiң кавалерi полыбысхан. Ол снайпер полып чааласхан. Хакасияның чааҷылары хаҷан даа махачы чааласханнар.
Ӱлӱкӱнде кӧп чааҷы-интернационалист сыйыхтарнаң таныхтатхан. «Боевое братство» пiрiгiстiң Хакасиядағы пӧлиинiң кнезi Александр Векшин тиксi Россия пiрiгiзiнiң иң пӧзiк сыйии «Знак почета» орденiнең сыйыхтатхан.
Автор :
Антон Чертыков
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы