Кемнiң ады турыстыра?
12.03.2021
Хабарлар
Хакасияда Халыхтар палатазы, «Ағбан» аэропортха чир-суубыс матырының адын пирерiнҷе марығны чарлап, аны иртiрiп пастабысты. Чоохтирға кирек, марығ оңдайларында тӧрт чардых кӧрiл парған:
- 1-ғы чардыхта кӧрiк айының 19-ҷы кӱнiне теере чуртағҷыларның чӧптерi чыылча. Аны хоостыра халых ӱзӱрiглерi тузында пiчiкке ӱс-он кiзi ады кирiлер;
- 2-ҷi чардыхта кӧрiк айының 26-ҷы кӱнiне теере саблығ паза республикаа туза ағылған матыр чир-суғҷының адын чӧптир оңдай чуртағҷыларға пирiлер. Чуртағҷаа пiр ат ӱчӱн не ӱнiн пирерге чарадылар. 500 ӱн чыып алған аттар лонг-листке кирiлер;
- 3-ҷi чардыхта чуртағҷылар лонг-листке кирiлген аттар санынаң иң турыстыра ӱс кiзi адын таллапча. Ӱн пирiс салтарлары хосхар айының 6-ҷы кӱнiнде ӱс ат кирiлген шорт-лист Хакасияның Халыхтар палатазының сайтында (oprh.ru) сығарылар;
- 4-ҷi чардыхта шорт-листтең пiр матыр чир-суғҷыбыс ады таллалар. Ӱн пирiс хосхар айының 26-ҷы кӱнiне теере аймах оңдайларнаң иртер. Аннаңар искiрiгнi пiс пу хабарда пиргебiс: http://khakaschiry.ru/news/detail.php?ID=9967 (АЭРОПОРТХА АТ ПИРЕРӀНҶЕ МАРЫҒ ИРТЧЕ).
Киҷее Хакасияның Халыхтар палатазында пастағы халых ӱзӱрiглерi ирткен. Ӱзӱрiглерге республиканың ӧӧн халых пiрiгiстерi чыылысхан: улуғлар, чииттер, профсоюзтағылар, культурадағылар, пӱдiрiгдегiлер паза пасхазы. Ӏдӧк анда марығны иртiрчеткен комитеттiң араласчылары полғаннар: Хакасияның Ӧӧркi Чӧбiнiң конституция законнарын сығарарынҷа, хазна пӱдiриинҷе, законностьча паза правопорядокча комитет кнезi Светлана Могилина, Хакасияның ис-пай паза чир хайызығларынҷа министр Евгений Тарасов, национальнай паза территориальнай политика министрi Михаил Побызаков паза Н.Ф. Катановтың адынаң Хакас хазна университедiнiң ректоры Татьяна Краснова.
Ӱзӱрiге тӧрт кiзi ады сығарылған. Хакасияның ветераннар чӧбiнiң кнес орынҷызы Юрий Седых пiрiгiс адынаң Совет Союзының Матыры, летчигi Василий Тихоновты (https://ru.wikipedia.org/wiki/Тихонов,_Василий_Гаврилович) сығарған, «Ағбан» аэропорттың пастағы ӧӧн директоры Валерий Гордеев СССР-ның Аэрофлот отличнигiн Геннадий Вяткиннiң (https://ru.wikipedia.org/wiki/Вяткин,_Геннадий_Африканович) адын чӧптеен, С.П. Кадышевтiң адынаң чон чайаачызының паза тынағ кiнiнiң директоры Анна Шаламова хакас чонының хайҷызы, нымахчызы Семён Кадышевтiң (https://ru.wikipedia.org/wiki/Кадышев,_Семён_Прокопьевич) адын сығарған, Н.Г. Доможаковтың адынаң национальнай библиотеканың устағҷызы Юлия Костякова писатель, поэт, тiлбесчi паза халыхчы Николай Доможаковтың (https://ru.wikipedia.org/wiki/Доможаков,_Николай_Георгиевич) адын сығарар чӧпнең чоох тутхан.
– Пу чахсы сағыстың ӧӧн кӧстее регионнарның саблығ чир-суғҷыларының аттарын, аэропорттарға пирiп, сабландырары полча, – таныхтаан Светлана Могилина. – Хакасияа туза ағылған кӧп кiзiлернi адирға чарир: Василий Угужаковты, Владислав Торосовты, Николай Катановты, Игорь Кызласовты паза пасхазын. Матыр ады хайди даа аэропорт тилiзiнең палғалыстығ поларынҷа кирексiнiс чоғыл. Ӧӧн кирексiнiс – ол чон кӧңнi. Чонның сағыс-кӧңнi поларға кирек.
Чуртағҷыларны, тiзең, пу чахсы сағыстың пасха сари сағыссыратча: нинҷе ахчаа тур парар аэропорт адын алыстырары. Марығны иртiрчеткеннернiң сӧстерiнең, аэропорт адына пiчiктерде пiр дее алызығ кирiлбес, матырның ады аэропорт адынаң хада искiрiглерде тузаланыл турар.
Кӧрiк айының 16-ҷы кӱнiнде Хакасияның Халыхтар палатазында халых ӱзӱрiглерi узарадылар. Азынада искiрiглер хоостыра хоза писче ат сығарылары кӧрiлче.
Сiрер чи, аарлығ хығырығҷылар, хайди сағынчазар, кемнiң адын ал чӧрерге турыстыра «Ағбан» аэропорт? Тимненiңер марығның iкiнҷi чардығына паза сағыстарыңны читiрiңер. Марығдаңар тиксi искiрiг Хакасияның Халыхтар палатазының сайтында пирiлче.
Автор :
Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде