ТОМЫҶАХТАРДА - НААҶЫЛАЛҒАН ГАРАЖ
18.11.2016
Хабарлар
Ағбан пилтірі аймаандағы 1 Томыӌахтар аал чӧбі гаражының хыры нааӌылалған.
Гараж 1958 - 1960 чылларда пӱдірілген: пастап улуғ гараж, анаң хоза кічіг арах гаражтар. Ол тустаң сығара анда аал хонии техниказын тыхтаӌаңнар. Соонаң, 2000 чылларда, ол «Доможаковское» муниципальнай аал хонии предприятиезінің холында полған. Че предприятие изелгенде, банкрот тузына турғызылған устағӌы аны, закон сайбап, садыбысхан. Томыҷахтар аал чӧбі гаражты чарғы пастыра айландырып алған.
- Аал чӧбінің администрациязынзар тоғынарға килгенімде, гаражты тыхтабызар оңдай тілеем. Тыхтағ тоғыстары уғаа аарлыға тур парчалар. Гараж хырын тыхтабызарына 2 миллион азыра салковай хорадылған. Ам гараж істін сырлабызарға, чарытхы эмектерін алыстырыбызарға паза гараж ибіре сиденнебізерге сағынчабыс, - таныхтаан Томыӌахтар аал чӧбінің кнезі Григорий Митюхляев.
Гаражта сӧп-сап машиназы, суғ тартчаң, ӧрт ӱзірҷең автомобиль турар паза муниципальнай пӱдістің пасха даа техниказы. Тутатчиков паза Ильич ааллардаң олғаннарны тартчатхан автобус мындох турар. Алында олғаннарға соох автобустығ чӧрерге килісчең. Амды автобуста хысхының иң соох тустарында даа чылығ полар.
Томыҷахтар аал чӧбінің гаражын тыхтағ тоғыстары соонаң азарына Хакасияның национальнай паза территориальнай политика министрi Дмитрий Тодышев килген.
- Хакасия пазы Виктор Зиминнің кӱстенізінең кічіг паза ыраххы аалларны тилідерінҷе паза хайраллирынча программа, муниципальнай пӱдістернің марии чуртасха киріл сыхханда, аалларның чуртазы чахсы саринзар алысча. Амғы туста муниципальнай пӱдістернің марии узарадылча. Томыахтар аал чӧбі, марығда аралазып, 600 азыра муң салковай грант утып алған. Че пу син ахча гаражтың хырын тыхтабызарына чидіспинчеткен. Григорий Вячеславович спонсор таап алған сылтаанда, проектті чуртасха кирібізерге оңдай пол килген, - таныхтаан Дмитрий Тодышев.
Спонсор «Разрез Аршановский» ООО полча. Разрезтің кізізі Виктор Труфановтың чооғынаң, предприятие мындағ тузалығ проекттерні чуртасха кирерге полызарға тимде.
- Пӱӱл муниципальнай пӱдістернің мариина 12 азыра миллион салковай позыдылған. Ол ахча орындағы пос устаныстарына аалның чуртазын чахсыландырарына оңдай пирче. Пу кӧзідім хоостыра республика бюджедінің ахчазы тӱзімніг хорадылчатханы паза бюджеттегі нимес ахча хоза кирілчеткені ӧріндірче, - теен Хакасия пазының администрация кізізі Татьяна Раменская.
Гаражта машиналар турғысчаң орыннаң пасха, анда ідӧк чир тамаан хайраллаӌаң орын пар. Анзы орындағы фермерлерге чир тамаан чыл ибіре хайраллап алар оңдай пирче. Томыӌахтар аал чӧбіндегі ікі школаның, олған садының чир тамаа мында хайраллалча. Чир тамаа ӱчӱн іӌе-пабалар тӧлебинчелер, ол столовайларзар тикке пирілче. Аннаңар олғаннарны азырирына ахча асхынах арах хорадылча.
Томыҷахтар аал чӧбі, марығда сыбыра аралазып, грант удаа утып алча. Мындағ оңдайнаң ол аал чуртазын чахсы саринзар алыстырарға кӱстенче.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде