ФЕРМЕР ТОҒЫЗЫ ПАРЫСТЫҒ
10.01.2017
Хабарлар
Фермер Михаил БОЗЫКОВ
Амғы туста сӧбіре паза наа ла тоғынып пастапчатхан фермерлерге хазна чахсы полысча: аал хонии техниказын, мал-хус аларына, хазаалар пӱдіреріне паза пасха даа нимелерге ӧнетін грант пирілче.
Хазна хабазиин алғаннарның пірсі Таштып аймаандағы Пиӌехол аалдағы фермер Михаил Семёнович Бозыков полча. Ол хаӌаннаң інектер паза хойлар тутча. Аалда чуртапчатхан чон хайди мал тутпас.
- 1983 чылда, армиядаң айланғанда, Таштыптағы совхозта комбайнер полып тоғын сыххам. 2002 чылда, совхоз изел парғанда, тоғыс чох халғам. Маллар уламох кӧп тут сыххам. 2009 чылда фермер полыбысхам. Пабам Семён Ойлович чирнеңӧк айғасхан, колхозта иң чахсы комбайнёр полған. Кізее нименең-де айғазарға кирек ле. Фермер ползаң, позыңа тоғынчазың, ағаа хоза хазна чахсы полысча, - теен Михаил Семёнович.
Аның кресен-фермер хониинда 118 мал саналча, ол санда 45 інек. Малларны фермер ӧӧнінде итке ӧскірче. Ағаа хоза Михаил Семёнович сула паза пуғдай ӧскірерінең айғасча. Пӱӱл ол 47 гектарда тоңастығлар салған. Ідӧк суланы посха ӧскірче, че пірееде аалдағыларға садыбысча. Фермернің позының 27 гектар чирі пар, пасхазын Ибіг аал чӧбінең арендаа алып алған. Пиӌехол аалның хыринда тузаланылбинчатхан чирлер ам даа пар. Аал чӧбі ол чирлерні чарғы пастыра муниципалитете айландырарға кӱстенче, андада ол чирлер чонға от сабарына, фермерлерге тоңастығлар саларға туза поларӌых. М.С.Бозыков, аал чӧбінең арендаа хоза чир алып, тоңастығларны кӧп арах саларға сағынча.
2015 чылда Михаил Семёнович сӧбіре фермазын тилідеріне Хакасияның аал хонии паза ас-тамах министерствозының грантын алған. Пу хазна хабазии ағаа уғаа чахсы чӧлег полған. Грант ахчазына фермер турбиналығ Т-89 трактор алып алған. Ол кӱстіг техника, аннаңар хыраны чахсы тартча. Грант ахчазына фермер ідӧк герефорд породалығ ікі пуға алып алған. Оларны тӧлге тудар. Ағаа хоза чарым чыл аразына Михаил Бозыков герефорд породалығ хазыралар садызып аларға пӧгінче. Хазыралар ідӧк грант ахчазына алылар.
Фермерге палалары Семён, Александр, Ксения паза кізӧзі Андрей полысчалар. Александр оолғы паза Ксения хызы Северде чуртапчалар. Чайғызын олар, отпуск алып, малларға от пилетирге полызарға кил парчалар.
Сӧбіре пазы аал хониинаң айғасчатханына чӧпсінче. Кізі, аалда чуртап, малларны ідӧк тее тутча, че фермер полчатсаң, хазна полысча. Фермер чіли санға тур салғанда, ол Россельхозбанктаң трактор аларына кредит алған. Хорадылған ахчаның чарымызын хазна субсидиянаң айландыр пирген. Фермер полбаан полза, ахча айландырылбасчых тіпче. Ікінӌі тракторын алар ӱчӱн пазох банксар айланарға киліскен. Трактор аларына хорадылған ахчаның 30 %-і фермерге айландырылған.
Михаил Семёнович Бозыков, маңнаныстығ фермер полчатханы ӱчӱн, пылтыр декабрьда аал хонии тоғынҷыларының ӱлӱкӱніне хығыртылған. Анда ағаа Аарластығ пічік читірілген.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде