ХАЗНА ХЫРЫҒЛАРЫ - ІЗЕСТІГ ХАДАҒДА
30.05.2017
Хабарлар
Ирткен тынағ кӱнінде Ағбанда Пограничник кӱні таныхталған. Республиканың чааҷылар комиссариады алнында субботада «Боевой расчёт» дежурстваа сыххан, позырахта Чиңіс паркында митинг ирткен.
Субботада «Боевой расчётха» пограничнай войсколарның ветераннары сӧбірелерінең килгеннер. Алты частығ Денис Сурвило пабазы Виктор Антоновичнең ӱлӱкӱнде сыбыра араласча. Денис пабазы службазын хайда ирткенін чоохтап полбаанда, Виктор Антонович позы чарыт пирген:
- Мин Камчаткада 1981 -1983 чылларда служба ирткем , Пістің анда авиаполк турған. Служба чахсы ирткен. Совет Союзы тузында пістің часть иң артых полған. «Дедовщина» чох полған . Служба тузында Японияның паза Кореяның палыхчылар шхуналары СССР хырығларын удаа кис парыбысчаңнар. Піске андағларны тузында кӧр саларға киректелген. Хырығны кискен корабльны летчиктер кӧр салзалар, пограничниктер корабльлары оларны портсар читірҷеңнер. Пістің часть хазна хырығларын 200 миля узунға сыныхтағда тутхан. Самолёттығ паза вертолёттығ офицерлер учух чӧрҷеңнер . Срочниктер техниканы иптеҷеңнер. Ибзер сержант званиеліг айланғам .
Владимир Михайлович Герман пограничнай войсколарда служба 1977 - 1980 чылларда ирткен. Ибзер сержант званиеліг айланған.
- Службаны Турцияның хырығлары хыринда Ленинакан городта ирткем. Амғы туста ол город Гюмри адалча, - чоохтапча Владимир Михайлович.
- Анаң пісті Иранның хыриндағы хазна хырығларынзар ызыбысханнар. Ол туста СССР войсколары Афганистанзар наа ла кіріп пастааннар. Пс андар парарға тимненгебіс. Ол туста Джульфа город хыринда нинҷе-де хазна ГЭС пӱдірген. Анда тоғынған кізілерге пропуск пирілҷең. Че контрабанданаң тутыр салған сайбағҷының пропускы алылҷаң. Іди кізі тоғыс чох халҷаң. Ол туста андағ сайбағлар удаа полған.
«Боевой расчёт» пасталғанда, пограничнай войсколарның ветераннарын алғыстирға полковник Владимир Козлов сыххан. Ол пограничнай службаның координация чӧбінің кнезі генерал-полковник Алексей Ерёминнің алғыстас сӧстерін искірген. «Боевой расчётта» Хакасияҷа МВД-ның ветераннар чӧбі паза пограничнай службаның ветераннар чӧбі адынаң пограничниктерге алғыстас пічіктері читірілген.
Анаң, служба апарчадып, чуртастары ӱзілген пограничниктернің аттары адалған. Пістің чир-суғҷыларыбыс Илбек Ада чаада, Даманскай олтырыхта, Алтынзархы Кавказта полған чаалазығларда тыннарын пир салғаннар.
«Боевой расчёт» тоозылғанда, пограничнай войсколарның флагын ветеран Евгений Коршиков паза чиит оол Кирилл Бубличенко кӧдіргеннер.
Пазағы кӱнде Чиңіс паркында митинг ирткен. Анда аралазарға пограничниктер прай республикадаң килгеннер. Оларны Хакасияның ветераннар чӧбінің кнес орынҷызы Юрий Седых, республиканың чааҷылар комиссары Виктор Максимчук паза ФСБ-ның ветераны алғыстааннар. Оларның таниинаң, хазнабыстың хырығлары 60 муң азыра километр узунға тартылча. Аннаңар оларны хадарары уғаа сидік тоғыс полча. Митингте пірее пограничникке паза оларның сӧбірелеріне алғыстас пічіктері читірілген.
Митинг тоозылчатханда, служба апарчадып, чуртастарын пир салған пограничниктерні хумартхылап, чыылысхан чон пір минута сым турған паза Успас от алнынзар чахайахтар салған. Митинг соонаң пограничниктер Чиңіс паркынаң пайрамнығ маршнаң сых парыбысханнар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде