ЧИҢІСЧІЛЕРГЕ - СЫЙЫХТАР
15.08.2017
Хабарлар
10 АВГУСТТА РЕСПУБЛИКАДАҒЫ С.П.КАДЫШЕВТІҢ АДЫНАҢ КУЛЬТУРА КІНІНІҢ УЛУҒ ЗАЛЫНДА ФИЗКУЛЬТУРНИК КӰНІ ТАНЫХТАЛҒАН. ХАКАСИЯНЫҢ ААЛ-ГОРОДТАРЫНАҢ 400 АРТИИНАҢ КІЗІ ӰЛӰКӰНГЕ ЧЫЫЛЫСХАН. РЕСПУБЛИКАДА ФИЗКУЛЬТУРА ПАЗА СПОРТ ТОҒЫЗЫН ПӦЗІК СИНДЕ АПАРЧАТХАН ИҢ ЧАХСЫЛАРЫ АҒБАНЗАР КИЛГЕННЕР.
ОЛОХ КӰН ПОСТАРЫНЫҢ ТОҒЫСТАРЫНДА СЫБЫРА ЧАХСЫ КӦЗІДІМНЕРГЕ ЧИТЧЕТКЕН УЛУС АЙМАХ СЫЙЫХТАРНАҢ, ААРЛАСТЫҒ ПІЧІКТЕРНЕҢ ТАНЫХТАЛҒАН. ЧИҢІСЧІЛЕР САНЫНДА АЛЫНҶА КІЗІЛЕР ЛЕ НИМЕС, ІДӦК ФИЗКУЛЬТУРАНЫ ПАЗА СПОРТТЫ ТИЛІТЧЕТКЕН ӦМЕЛЕР АДАЛ ТУРҒАННАР. ЧИИТТЕРНІҢ ПІРЕЕЗІ РОССИЯНЫҢ СПОРТ УЗЫ УДОСТОВЕРЕНИЕ АЛҒАН.
2016 ЧЫЛДА ХАКАСИЯДА ФИЗКУЛЬТУРАНЫ ПАЗА СПОРТТЫ ТИЛІДЕРІНДЕ ХАЙДАҒ КӦЗІДІМНЕРГЕ ЧИТКЕННЕҢЕР САН ПИРІСТІГ ЧООХ ТУТХАН АМДЫ ХАКАСИЯ ПАЗЫНЫҢ АДМИНИСТРАЦИЯЗЫНЫҢ УСТАҒҶЫЗЫ ПОЛЧАТХАН ВАЛЕРИЙ ВАСИЛЬЕВИЧ ДЕНЩИКОВ.
Итсе, ол чон алнынзар Хакасияның пазы Виктор Зиминнің адынаң прайзын Физкультурник кӱнінең алғыстирға сыххан. Ӱлӱкӱн таныхтирға чыылысхан таныс, хада-пірге хайдағ даа сидіксіністерні тобырған арғыс-нанҷыларынзар кӧріп, Валерий Васильевичтің най тың чӱрексінчеткені харахха тасталчатхан. Аннаңар даа ол прай кӧзідімнерні, чидіглерні позының сӧстерінең чоохтап пастабысхан. Аны исчеткен кізілернің сырайларында ӧрчіліг кӱлімзірестер кӧрерге чарир полған.
Ӱлӱкӱн тузында искірілчеткен, ӧрініс ағылчатхан кічіг дее, улуғ даа пӱдіріглер тимге сығарына пастап піреезі киртінмеен дее полар. Че Хакасияның спорт министрі полып, 8 чыл тоғынған Валерий Денщиков республика ӱлгӱзінің полызии сылтаанда прайзын позына киртіндіріп алған. Анзын ол чарлаан искіріглер дее маңат киречілепчеткеннер. Сынап Валерий Васильевич министр тоғызына наа ла турғызылғанда, Хакасияның чуртағҷылары санынаң 15,7 %-ті ле физкультуранаң паза спортнаң айғасхан полза, амды ол кӧзідім 34,4 %-ке кӧдіріл парды. Ол сан мыннаң мындар даа ӧс турарына ізеніс пар.
Хакасияның спорт министрі полып, чахсы тоғынған кізінің 2016 чылдағы чидіглерінеңер сан пирістіг чооғын прайзы даа хынып искен. Пірее танығлығ искіріглер тузында хазыр айа сабызы тыҷыри тӱсчеткен. Залда одырчатхан кізілернің піреезі амды махтаға сыхчатхан пӱдірігні тимге сығарарында тоғысчыларнаң хада істен турғабыс тіп сыбыхтаза халчатхан. Амды ол пӱдіріг - Хакасияның прай чуртағҷыларының улуғ поғдархазы паза ӧрiнiзi.
- Пістің губернаторыбыс Виктор Михайлович Зимин регионда физкультура паза спорт тилиріне улуғ хайығ салбаан полза, ахчалығ полызығ пирілбеен полза, пӱӱнгі чидіглерібіс чох таа поларҷых. Суғҷа чӱзер «Ағбан» спорткомплекс амды тиксі Сибирьде иң чахсыларның пірсіне саналча. Тӧӧ пазындағы саналығ чӱгӱрҷең спорткомплекс Россияда ла нимес, хырығ озаринда даа махтаға сыхча, - искірген позының сан пирістіг чооғында Хакасияның спорт министрі полған Валерий Васильевич Денщиков Физкультурник кӱні таныхталчатханда.
Анаң ол 2016 чылда чахсы кӧзідімнерге читкен физкультура паза спорт тоғынҷыларының піреезіне сыйыхтар читірген. Іди Хакас Республиканың Аарластығ пічиинең таныхталғаннар: Ағбандағы меспектіг хоккейҷе «Сойан» команданың имҷізі Павел Ефимович Асочаков, Харатастағы «Сибиряк» спорт школазының тренері Виталий Петрович Кутахин.
Хакасия пазының - Хакасия Правительство кнезінің алғыстас пічиинең таныхталғаннар: Ширадағы олған-чииттер спорт школазының ӱгретчі-тренері Александр Николаевич Чипизубов; Ағбандағы олимп резерві училищезінің инструктор-методизі Мирослава Петровна Иптышева; хазыхтары уйан спортсменнернің «Ирбис» школазының тренері Ирина Александровна Мордакина.
Россияның спорт министрінің алғыстас пічиинең таныхталғаннар: Хакасияның спорт министрі Сергей Николаевич Головкин; Ағбандағы олимп резерві спорт школазының теннисче тренері Дмитрий Валерьевич Нагибнев; Ағбандағы олимп резерві спорт школазының грек-рим кӱрезінҷе тренері Александр Михайлович Худяков; Ағбандағы олимп резерві спорт школазының боксча тренері Игорь Николаевич Чертыков; Ағбандағы пауэрлифтингче спорт школазының тренері Анатолий Васильевич Карабонцев; Хакасияның дзюдоҷа улуғ тренері Денис Сергеевич Лесков; Ағбандағы хазыхтары уйан спортсменнернің «Ирбис» спорт школазының ниик атлетикаҷа тренері Михаил Дмитриевич Хоботов.
Ідӧк Физкультурник кӱні таныхталчатханда, «Россияның спорт узы» удостоверение алғаннар: Светлана Кызласова, Артем Дементьев, Виталий Канзычаков, Светлана Чильчигешева - олаңай кӱрес; Аделина Судочакова, Екатерина Лавринец паза Ирина Зайцева - теннис; Евгений Аникин - кикбоксинг; Анастасия Катаева - ат чарызы; Анастасия Еремина - ниик атлетика; Павел Кочетков - дзюдо; Айдамир Доктууту
- самбо; Даниела Колесник - пауэрлифтинг.
«Хакасияның иң чахсы спортсмені» тіп чарлалған олаңай кӱресче Россияның чоннар аразындағы класстығ спорт узы Наталья Малышева. Сағам теестегі марығларға тимненче. Аннаңар аның сыйии тренері Владимир Гаврилович Чучуновха пирілген. Наталья Олимп ойыннарының спорт кӧріміне кірчеткен иң чахсы спортсмен тіп чарлалған.
Олимп ойыннарының спорт кӧріміне кірбинчеткен Хакасияның иң чахсы спортсмені полыбысхан хурлығ кӱресче Россияның саблығ спорт узы Татьяна Зырянова. Аны марығларға тимнепче Россияның саблығ тренері Павел Александрович Петров.
Кинек спортсменнер санынаң Хакасияның иң чахсы спортсменке саналған ниик атлетикаҷа Россияның чоннар аразындағы класстығ спорт узы Вадим Трунов. Аның тренері - Михаил Дмитриевич Хоботов.
Республиканың иң чахсы командазы тіп адалған волейбол ойнапчатхан «Надежды Хакасии» команда. Тренері - Ирина Петровна Золотухина.
«Хакасияның алтын резерві» номинацияда адалғаннар: Артём Попов - ниик атлетикаҷа спорт узына кандидат, чоннар аразындағы «Азия олғаннары» марығда алтын, кӱмӱс, хола медальлар утхан; Мария Тюмерекова - олаңай кӱресче спорт узына кандидат, Европа первенствозының чиңісчізі, тилекей марииның призеры; Валерия Чистобаева - олаңай кӱресче спорт узына кандидат, Россия первенствозының чиңісчізі, тилекей марииның призеры; Наталья Малюкова - дзюдоҷа Россияның спорт узы, Россия первенствозының чиңісчізі, Европа марииның призеры; Анастасия Худякова - боксча спорт узына кандидат, Россия первенствозының чиңісчізі.
Ідӧк физкультураны паза спортты тилідерінде пӧзік чидіглерге читчеткен муниципальнай пӱдістер, спорт федерациялары, республика мариинда чахсы кӧзідімнерге читкен городтар паза аймахтар сыйыхтарнаң таныхталғаннар.
Автор :
Анатолий СУЛТРЕКОВ Сомнар Максим АХПАШЕВТИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы