ХАКАСИЯДАҒЫЛАРНЫ КАЗАНЬ ЧЫЛЫҒ УДУРЛААН
21.12.2018
Хабарлар
Фестиваль араласчылары
Чорых танығлары. Казаньда Россиядағы чоннарның паза СНГ-ның тӱрк хазналарының литератураларынҷа чоннар аразындағы фестиваль ирткен. Хакасиядаң анда 7 кізі араласхан. Оларның ӱзі -ХГУ-ның студенті
Фестивальда 130 ӱгренчі паза студент араласхан. Олар - 11 национальнай республиканың паза СНГ-ның 4 хазназының чииттері. Хакас хазна университедінең ӱзӧлең полғабыс: мин, Карина Кулумаева, Наталья Манчилаева.
- Мындағ фестиваль пістің университетте иртчеткені ӧріндірче. Сизінчебіс, книга хығырар кибір айланча. Чииттер тілге Интернет пастыра нимес, классиктернің произведениелері хоостыра ӱгренерге киректер. Литератураны пілгені - полған на кізінің культура сині, - таныхтаан Казаньдағы федеральнай университеттің пастағы проректоры Рияз Минзарипов.
Піске, филология специальнозына ӱгренчеткеннерге, тӱрк литературазынҷа лекциялар уғаа туза полғаннар. Таныхтирға кирек, литература анда пӧзік синде тиліпче паза істезілче.
Фестиваль азылғанда, пісті Казань паза университет устағ-пастаа чылығ удурлаан. Актовай залға толдыра аймах тілліг, кип-азахтығ чон чыылған. Пастағы кӱндӧк тілбестег тоғызын толдырғабыс. Мында піске В.Майнашевтің «Пос тілінеңер» кибелізі паза Хакасия гимні киліс парған. Пу тоғыс соонаң піс «тегілек столда» араласхабыс. Мында Россия мусульманнарының духовнай чыылииның муфтийі Альбир Крганов паза Казаньдағы православнай духовнай семинарийнің пастағы проректоры Игумен Евфимий студенттернең хада школа программазында орыс литературазын хайдағ оңдайнаң апарар сурығны ӱзӱргеннер. Ӧӧн сурығларның пірсі полған: наа авторларны кирерге алай классиктерні артызарға?
Ікінҷі кӱнінде М.Туранның «Сайбалбаан сӱрместер», Л.Костякованың «Шаман паза Кудлатка», Г.Топановтың «Хара хус» произведениелеріне тимнеен буктрейлерлер арачылирға кирек полған. Піске оларны ӱгретчібіс, филология наукаларының кандидады, доцент Наталья Таскаракова тимнирге полысхан. Пу тоғысты піс чахсы толдырғабыс. Итсе-де, полған на студент ибдегі тоғызын чахсы тимнеп килгені іле кӧрінген.
Соонаң піс татар чонның чиит писательі Альбина Абсалямованаң тоғасхабыс. Ол піске позының чайаачызынаңар паза писатель ағазы Абдурахман Абсалямовтаңар чоохтаан. Хай пірее кибелістерін хығырған паза оларның ӧӧн сағызын чарытхан. Тоғазығ пістің кӧңнібіске тың юрген. Писатель піске чайаачы чолыбысты азарға чахаан. Соонаң піске городча автобустығ экскурсия иртіргеннер.
Іди пу фестиваль піске пасха студенттернің, ӱгретчілернің сағыс-кӧрістерін піліп аларға полысхан. Олар прайзы литература тилізіне улуғ хайығ салчалар, аның ӱчӱн прай чӱреенең «ағырчалар».
Халғанҷызында прай тоғыстар хоостыра салтарлар иділген. Ӱгренҷілер паза студенттер аразында призёрлар, лауреаттар табылғаннар. Кӧп ӱгренҷі паза студент сыйыхтарға паза турыстығ орыннарға турысхан.
Ідӧк хайхастығ полған прай чирде татар тілін истерге. Казань город - пай тархыннығ чир. Мында музейлер паза театрлар кӧп. Татарлар пос тархынын пик тутчалар паза пӧзік кӧдірчелер. Хакасияны Казань чылығ удурлаан тіп сағынчам. Пір сӧснең, Казань пістің кӧңнібіске уғаа кірген.
Автор :
Елена САГАТАЕВА, ХГУ-ның студенті
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы