МЫЛТЫХ КӰНІНДЕ СУҒА КІРІП
24.01.2019
Хабарлар
Худай ӱлӱкӱні. Асхыс аалда Асхыс суғда Мылтых таңдади тилті тимнелген.
Ӱстӱнзархы электросетьтернің Асхыстағы пӧлии орныхчатхан орыннаң тоғыра Асхыс суғны чазағ кисчең тахта пар. Аның хыринда Мылтых кӱніне Асхыс аал чӧбінің тоғынҷылары улуғ тилті ойғаннар. Пӱӱл оларға техника кирек полған.
Ирткен чылларда пусты «Дружба» пилаларнаң, кӱрҷектер полызиинаң на ойыбысчаңнар. Пӱӱл идінҷек Анатолий Валентинович Щетининнің оймах хасчаң тракторын сурап алғаннар. Аннаң тоғынчатхан Сергей Литвинов пус ойылған орында суғның тӱбін тирең иде хазыбысхан. Анда кӧні полған, олғаннар суға сомҷаңнар. Пӱӱнгі кӱнде таң суғ асхынах па алай хайди ба, че піди идерге киліскен.
Орты харааға чағдабысханда, тилті хыринзар чон чыылызып пастаан. Суға кірҷең кізілер тасхар соохха халтыраспазын тіп, теерпектерде турчатхан тураҷахты ал килтірлер. Анда пес одыныбыстырлар. Ырах ниместе чол хыринда ДПС машиназы турча. Прай арачылағ службалары тимде.
Орындағы тигірибнің абызы Викторин ада тилті суун чарыдып пастаан. Ол арада чон килчеткен. Викторин ада, суғ чарыдып тоосчатханда, чарытхан суғнаң чыылысханнарны аластаан. Суғ чарыдыл парды тіп чарлабысхан. Кӧп кізі ідістіг килтір. Тилтідең чарытхан суғ алып пастааннар.
Чарытхан суға иң пастағыларнын аразында Алёна Юрьевна Кильчичакова кірген. Махачы ипчі. Аннаң андар чиит оол-хыстар суға ӱзігі чох кір сыхханнар.
Тураҷах ізиинің тудазы сообинчатхан: хайзы-да суға кірерге сыхчатхан, кем-де, суға кіріп, идінең оор пурладып ала андар кірерге маңзырапча. Тураҷахтын «хамаанда» чарытхы чараан - ибіркізі прай кӧрінген.
Мылтых кӱні сайбағлар чох, амыр ирт парған.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы