ЧОЛЛАР ХОҒЫС ЧОХ ПОЛЗЫННАР
05.02.2019
Хабарлар
Хакасия пазының орынҷызы Богдан ПАВЛЕНКО чыылығ иртірче
Чыылығ. Хакасия пазының орынӌызы Богдан Павленко «Хорғыс чох паза чахсы чоллар» нацпроект хоостыра республикада регионның проекттерін чуртасха кирер сурығларӌа чыылығ иртірген.
ЧОЛЛАР ХОРҒЫС ЧОХ ПОЛЗЫННАР
Чыылығда «Хорғыс чох паза чахсы чоллар» национальнай проектті чуртасха кирер ӱчӱн нандырығлығ Хакасия правительствозының министерство-ведомстволарының устағҷылары, Ӧӧркі Чӧп президиумының кізілері паза муниципальнай пӱдістер администрацияларының пӱдіріг паза ЖКХ управлениелерінің пастыхтары араласханнар.
Хайди Богдан Павленко таныхтаан, «Хорғыс чох паза чахсы чоллар» национальнай проектті чуртасха кирер сурығ прай кізілерге теелче. Республикадағы чоллар чуртағҷыларға хорғыс чох ползыннар. Проектті чуртасха киреріне алты чылға ікі миллиард салковай позыдылар. Ол ахчаа региондағы чолларны, чахсы тыхтап, иптеп саларға кирек. Ол асхынах ахча нимес, аны тӱзімніг хорадарға киректелче.
«Чоллар сетьі» паза «Чол хониин тилідер тиксі оңдайлар» регионның проекттерін республикада чуртасха кирер сурығҷа Хакасияның транспорт паза чол хонии министрінің тоғызын толдырчатхан Иван Белоус чоох тутхан. Аның искіриинең, Россия президентінің указын толдырарынҷа пылтырғы июльдаң сығара республиканың проекттерін тимнепчеткен ӧме тоғынча. «Хорғыс чох паза чахсы чоллар» нацпроект хоостыра Хакасияда «Чоллар сетьі» паза «Чол хониин тилідер тиксі оңдайлар» регионның проекттері тимнелген. Ол проекттерҷе федеральнай, регион паза муниципалитеттер синінде пір чӧпке килгеннер.
Россияның транспорт министерствозы национальнай проектті чуртасха кирер «Чол картазын» тимнеен. Ол ам даа прай регионнарда чарадылбаан, пу тусха 42 регионда ла чарадыға алылған. 1 мартта Россияның транспорт министерствозында андағ чарадығларда хол салылары кӧрілче. Алты чылға регионның паза муниципалитеттер аразындағы 37 километр чолны тыхтап саларға кирек, городтарда - 76 километр.
Чолларда удаа саайлар полчатхан участоктар санын саңай хызырыбызарға кирек полар. Харатаста андағ ікі орын пар, Ағбанда - читі, федеральнай чолларда - ікі. Республикадағы чолларда хоза 12 стационарнай видеокамера турғызылар.
Ідӧк Иван Белоус хайдағ чылларда хайдағ бюджеттең нинҷе ахча позыдылардаңар кӧп саннар адаан. Хара тас аныпчатхан предприятиелер, чолларҷа постарының товарын тартып, сайбапчатхан чолларны постарының ахчазына тыхтиры кӧрілче. Аннаңар оларны тимір чолнаң тузаландырарға кирек. Предприятиелер чолларнаң айғазарға, аны тыхтирына ахча позыдарға хыныхсыбинчалар. Хакасияның транспорт министерствозының ӧнетін тӧстелген комиссиязы, сайбалған чолларны сыныхтап, аны тыхтирын паалапча, анаң хара тас аныпчатхан предприятиелерзер айланча.
Хайди таныхтаан Хакасияның экономика тилізі министрінің тоғызын толдырчатхан Николай Евдокимов, 1 мартта Россияның транспорт министерствозында прай пічіктерде хол салылза, анаң на подряд организацияларын табар марығ чарлалар. Ағаа ідӧк илееде тус кирек полар. Толдырар тоғыстар орай пасталар. Аннаңар, арса, марығларны азынада чарлирға кирек.
Николай Евдокимов ідӧк национальнай проекттерні чуртасха кирер региондағы проекттернің ӧӧн пӧгіннерін чарытхан.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы