САН ПИРІСТЕРНІ - ТУЗЫНДА
06.02.2019
Хабарлар
Аал хонии. Асхыста аал хонии предприятиелері, кресен-фермер хоныхтары устағҷыларынаң чыылығ ирткен.
Кресен-фермер хоныхтарының устағҷыларын паза тоғынҷыларын, удурлап, администрация туразының улуғ залынзар ысчатханнар. Анда илееде кізі чыыл партыр. Ағбаннаң улуғ пастыхтар килтір.
Мына чон суулаза тӱсті, залзар Асхыс аймаа пазы Абрек Васильевич Челтыгмашев, Хакасияның аал хонии министрінің тоғызын толдырчатхан Александр Алексеевич Башков кірчелер.
Тоғыс пасталыбысты, президиумда Александр Алексеевич Башков, Абрек Васильевич Челтыгмашев, Асхыс аймааның аал хонии устааның пастығы Александр Александрович Зауер паза Асхыс аймааның депутаттар чӧбінің кнезі Владимир Михайлович Зимин одырыбыстылар.
Пастағы сӧс Александр Башковха пирілген. Ол кресен-фермер хоныхтарына хазна полызии хайди пирілердеңер искірген. Республика бюджеді хайди даа сидік толдырылчатса, аал хониина полызығ полар теен ол. Пір уғаа хайхастығ сан искір пирген министр. Татарстанда аал хониина 17 млрд салковай пирілчеткен одыр, пістің, тізең, 227 млн салковай.
- 1989 чылда Татарстанда полғам, андағы колхозтарны кӧрерге киліскен. Пастап сағынғам, пісті ӧнетін пай колхозтарҷа ал чӧрчелер. Анда саалчатхан інектер пістің мындағы чіли мал хазааларында турбинчалар. Малларны улуғ чылығ комплекстерде тутчалар. Оларны андох азырапчалар, саапчалар. Азыралны оларға килкім завод тимнепче тізе, саба полбас. Ізе, пір муң пасха іди азых тимнирге кирек. Аймах азыхты трактор прицебінең азырал тимнеҷең оймахсар урчалар. Анда ол пысча полбас па, оор пурлаплача. Тимге читкен азыхты малға пирчелер. Іди чіпчеткен мал ноға ортымахти 20 -30 литр сӱт пирбечең, - теен ол.
Паза Александр Алексеевич чооғында мындағ нимее хайығ айландырған. Сан пирісті тузында тимнирге кирек тіпче. Ноға? Тузында паза орта тимнелген пічіктер хоостыра субсидия алып алар оңдай пар. Сан пирістерде алҷаастар илееде пол парчаттыр. Сынында мал мынча, сан пирісте, тізең, аннаң кӧп. Алай мындағ киректер пол парча. 100 пас тӧлліг хойға 50 проценттең асхынах хураған килісчеттір. Ол уғаа уйан кирек.
Анаң тӧлліг маллардаңар чоох парыбысхан, ӧӧнінде пуғалардаңар. Александр Башков Асхыс аймаанда тӱгі кӧк, позы «пір харыс» пуға кӧртір. Чапсыпча. Мин андағ тӱктіг мал кӧрбеем, андағ «тӧл» парын пілбеемӧк тидір.
Аннаң андар субсидиялардаңар чарыда чоохтааннар Хакасияның аал хонии министерствозының ӧзімнер паза механизация пӧлиинің устағҷызы Александр Юрьевич Фёдоров паза мал ӧскірерін тилідерінҷе пӧлиинің устағҷызы Евгений Александрович Швайгерт. Специалисттер сурығлар пар ба сурғаннарында, «Овцевод» ООО-ның ӧӧн директоры Виктор Иосифович Бельман чӧпнең сыххан: «Субсидияны інек мал нинҷе парына пирерге кирек». 100 пастаң 80 пызо тӧрізе - тӧлирге, іди полбаза - мал кирегі тилібес тееннер.
Ідӧк Асхыс аймааның аал хонии устааның пастығы Александр Александрович Зауер позының чооғында аймахтағы сидіксіністердеңер искірген. Аал хониинда прай сидіксіністер ӧӧнінде хуруғ чылларнаң палғалыстығ. Іди, хуруғ чыллар полып, мал кӧп хорап парған. Хыра ӧзімнеріне, малларға страховка поларға кирек одыр. Аннаңар малның, чирнің саны орта поларға кирек.
Соонаң пасха даа специалисттер чоох тутханнар. Чыл пасталча, кресен-фермер хоныхтары устағҷыларына сананысты ипти апарарға кирек одыр. Тӧлліг мал алып, элитнай тамах ӱреннерінең хыра салып, чахсы парыс алар пӧгіннең тоғынарға кирек. Іди чӧптескеннер аал хонии тоғынҷылары.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы