ЧААҶЫНЫҢ АДЫ УНДУЛБАС
20.02.2019
Хабарлар
Хумартхылас. Пӱӱл 15 февральда Ус чул аалда М.Е.Кильчичаковтың адынаң ортымах школада чааӌы-интернационалист, гвардияның улуғ сержанты, Хызыл Чылтыс орденінің кавалері Анатолий Ананьевич Бурнаковтың хумартхызына чарыдылған мылтых атарынӌа марығлар иртті.
Марыға Асхыс аймаандағы школаларның 9 командазы чыылысхан. Полғанында ла ӱс оолах паза пір хызыҷах. Олар пневматическай мылтыхтардаң атханнар. Хайзы атығҷылар, командаа кірбин, пос алынҷа араласханнар.
Марығ иртірер кибір пылтыр салылған. Тӧӧ чиріндегі чон Афганистандағы чааның араласчызы Анатолий Бурнаковха ол ӱгренген школада хумартхы чарды хыс саларға паза чыл сай кічіг атығҷылар аразында марығлар иртір турарға чарадығ алған. Ноға хайығ пу спорт кӧріміне салылған? Анатолий уғаа мирген атыстығ разведчик полған. Аның чаа тирии - табыс чох атчаң паза харасхыда «Бурнаковский стрелок» онетін сыйых
кӧрҷең приборлар турғызылған Калашниковтың автомады. Разведчиктер ӧмезі хараазын хадағда одырчатса, моджахедтернің караваннары чағдап килзе, атысты хаҷан даа Тӧӧ чирінең парған оол пастаҷаң. Ыырҷылар ухтар хайдаң учухчатханнарын оңарылғанҷа, чир-суғҷыбыс нинҷе-нинҷе кізі чатыр саларға маңнанҷаң. Аның чичең атызынаң чаа операциязының салтары, пірее туста, тізең, прай ӧменің чуртазы палғалыстығ полҷаң.
Марығ чиңісчілері
Тынағдағы полковник Вячеслав Сёмушкин (разведротаның командирі полған, амды Ростов-на-Дону городта чуртапча) паза Василий Криса (А.Бурнаковтың арғызы, ол Иерусалим городта чуртапча) марығ араласчыларына видеопічік пастыра матыр разведчиктің хумартхызына турыстығ полыңар, мылтых атарында пӧзік чидіглерге чидіңер тіп айланыс иткеннер. Олғаннарның алнында ідӧк чоох тутхан Асхыс аймааның ветераннар чӧбінің кнезі Валерий Ачитаев.
Марығ оңдайлары хоостыра, атығҷы 10 метр ырахтын 8 № таңмаҷа атарға кирек. Ағаа сигіс ух пирілче. Пастағы ӱс ухнаң ол тренировка оңдайынаң пір таңмаҷа ат кӧрче. Халғаннарынаң пірердең пис таңмаҷа атча. Ана ол атыстарның салтары санға алылча. Полған на кізінің иң кӧп 50 сан чыып алар оңдай полған. Че андағ ус атығҷы табылбаан. Марығлас хатығ парған. Чахсы тимненіс кӧзіткеннер Чоғархы Асхыс аалдағы олғаннар. Командалар аразында олар ізестіг чиңіс тутханнар. Ікінҷі орында - Истегі школаның ӱгренҷілері, ӱзінҷізінде - ис пилтіріндегілер.
Атығҷыларның алынҷа чидіглерін санға алза, Чоғархы Асхыс аалдаң килген Эдил Давлетов, 38 сан чыып алып, пастағы орында пол парған. Аның чир-суғҷызы Игорь Чочиев, ікі ле санға соона халып, ікінҷізі полыбысхан. Ӱзінҷі орында - Андриан Типчигешев. Ол Ус чулдаң. Аның чидии - 29 сан. Хызыҷахтар, тізең, орыннарны пу оңдайнаң ӱлезіп алғаннар: 30 сан чыып алып, пастағы орынны Аима Амзаракова (Чоғархы Асхыс аал) холға кирген, ікінҷі орында - Сабрина Чочиева (Чоғархы Асхыс аал), ол 24 санға атыбысхан, сыйыхтығ ӱзінҷі орын, тізең, Ис пилтірінең килген Ангелина Торбостаеваа киліскен. Аның чидии - 20 сан. Сыйыхтығ орыннарға турысхан командалар кубоктар, Аарластығ пічіктер паза ахчалығ сыйыхтар алғаннар.
1932 чылдаң сығара Илбек Ада чаа пасталар тусха теере СССР-да пӧзік устығ атығҷыларға «Ворошиловский стрелок» ат пирілҷең. (К.Е.Ворошилов 1925 - 1934 чылларда чаа паза талай киректерінҷе, 1934 - 1940 чылларда СССР-ның арачыланыс комиссары полған). Аарластығ атха 9 миллион азыра кізі турысхан. Олар поғдархаснаң ӧнетін танығ ал чӧрҷеңнер. Ус чулдағылар, тізең, марығның иң артых атығҷызын «Бурнаковский стрелок» тіп адап турарға чарадығ алғаннар. Аарластығ атха турызар ӱчӱн, уғаа хазыр харбазығ парған.
Афганистандағы чааның ветераны Анатолий Бурнаков кічігдең ала мылтых чахсы ат пілҷең. Аны пу кирекке тайғада чуртаан Игнат ағазы ӱгреткен. Ол саблығ аңҷы полған. Анатолий ухты тӧкпесте хази турғызылған пычахтың чітиине теерте паза чатчатхан бутылка ахсына кире атыбысчаң. Іди аңҷылар мылтых оңдайын сыныхтапчалар.
Марығны, тимнеп, иртірчеткен комитет сыйыхтығ орыннарға турысхан атығҷыларға устарын кӧзіт пирерге чаратхан. Оларға ухты бутылкаа кире атыбызарға киректелген. Полғаны ла ӱс ух атхан. Алты кізідең Игорь Чочиев (пылтырғы марығның чиңісчізі) паза Ангелина Торбостаева алнында пол парғаннар. Олар пірер ух кире атыбысханнар. Амды кем не утар ни? Кӧрігҷілер тынминыбысханға даа тӧӧй пілдірген. Пастағы атысты Игорь иткен. Ух чаза парыбысты. Теес Ангелинаа читті. Нинҷе-де секунда пазынаң хызыҷахтың уғы бутылка істінде сыңыри тӱскен. Чыылысхан чон Ангелинаны марығның иң артых атығҷызы полыбысханынаң ізіг айа сабызынаң алғыстаан. Ағаа ӧнетін чахығнаң иділген сыйых читірілген.
Анатолий Бурнаковтың хумартхызына чарыдылған марығ Асхыс аймааның спорт календарьында пик орнығыбысты. Аны иртірерінде С.З.Карамчаковтың адынаң спорт школазы ӧткін араласча. Ӧӧн тоғыстар, пілдістіг, Ус чулдағы ортымах школаа артылча. Ахчалығ сыйыхтар чааҷы-интернационалисттің школада хада ӱгренген арғыстарының, туған-чағыннарының паза таныстарының кӱзінең иділген.
ХОЗА ТАНЫҒ: Анатолий Бурнаков 1962 чылда Чоғархы ТӦӦ аалда тореен. 1979 чылда Ӱс чулдағы школаны тоосхан. 1982 -1984 чылларда чаа службазын Афганистанда Кандагар провинцияда ирткен. Разведчик полған. 1984 чылда, махачы чааласхан ӱчӱн, Хызыл Чылтыс орденінең сыйыхтатхан. 1991 чылда, киненге кіріп, ӱреен.
Автор :
Алексей БОРГОЯКОВ
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде