КӦГ-ТЕЕЛБЕК САЛЫЛҒАН, КИП-АЗАХ ХАРАХ АЙДЫРҒАН
12.04.2019
Хабарлар
Культура. Ағбандағы чииттер ӧргезінде «Чазы кӧглері» концерт ирткен. Анда олғаннарның паза улуғларның эстрада-фольклор ӧмелері, «Чиркеен» мода театры араласханнар.
Тохтағ чох, пір тыныснаң парчатхан концерттерні кӧрерге хаҷан даа чапсых поладыр. 9 апрельде Ағбандағы чииттер ӧргезінің чайаачы ӧмелері чонға тикке ойын турғысханнар. Улуғлар, пала-пархаларын чидіне, концертке чыылысчатханнар. Хайди тіпчелер, тоғаспас кізілер тоғасханнар, хаҷанох кӧріспееннер хуҷахтасханнар.
Залға толдыра чыылған чонны хакас чонның кибірлерінең таныстырып, чаламалар таниинаңар чоохтааннар. Анзы тиктең нимес. Иир тооза сценазар чаламалар ӧңнеріне тӧӧй уғаа сіліг кип-азахтығ олғаннар сых турғаннар. Тигір кӧк, хызыл, ах паза даа пасха ӧңніг кӧгенектерні алтын-кӱмӱс хоостар чазааннар. Прайзы даа олар пӱӱнгі кӱнге килістіре тимнелгеннер.
«Ымай» сіліг сарын хоостыра «Чиркеен» мода театрының кеен хыстары сыхханнар. Теелбекке килістіре чаламаларнаң чазалған тегілек, ипти ле «чазыҷа» ибіріліп одырчатхан осхас, кӧрігҷіні ойын тузында пурунғы тустардаң таңдағы кӱнзер апарған тиирге чарир. Ойын «Чазы кӧглері» тіп тиктең не адалбаан. Хакасия - чазыларға пай чир. Илбек Уйбат, Сағай паза Хойбал чазыларында чуртапчатхан чонның ырлары хаҷан-пуруннаң чайалғаннар. Чазы-тайғалығ чирде андағох сіліг кӧглер тӧріпчелер.
«Кӧріңер, хайди Хакасияда ырлапчалар паза теелбектенчелер!» - мындағ хыйғы соонаң чиит артисттер соон сӱрістіре сценазар теелбек-ырларнаң сых турғаннар. Мода кӧзідии соонаң теелбекнең хайхат турғаннар, сарыннарын читіргеннер. Республикадағы олған искусство школазының «Пӧлбек» хореография ӧмезі «Хозанахтар» теелбекті айдас толдырған. Ниик паза кӧгліг теелбектегі махтанҷых «хозанахтарға» ӧкерсінерге ле халча. Оларох «Тӧстер кӱзін» кӧзіткеннер. «Шейк» ансамбльның хыстары «Хам теелбегінең» сыхханнар.
«Хазыр суғ» фольклор ӧмезінең Тамара Давлетова устапча. Олар «Кӧгҷі паза чатхан» кип-чоох хоостыра турғызылған ойынны читіргеннер. Амыр кӧглердең пасти «Че!» ӧтіг паза табырах сарналчатханнарға чидіп, кӧрігҷілерні хайхатханнар. «Хандыра! Айдас!» хысхырыстар залдаң удаа истіл турған. Ізіг айа сабызы иир тооза тоозылбаадағ полған.
Тамара Давлетова ідӧк «Ай сузы» олған ансамбльын тӧстеп алтыр. Кічіг частығ Рената Кученова «Кӧглепчеткен часхы», Соня Самрина «Хызыҷахтың кӧңні», Аима Тинникова «Кӱскӱ» ырларнаң сыхханнар. Олар кӧклӧлер осхас ачыныстығлар, кӧп чон алнына пастағызын на сыххан поларлар.
Ирина Сулекованың «Чиркеен» мода театрының «Ымай», «Хыстарның иирге кисчең кӧгенее», «Чалаңнар» наа кӧзідіглері чонны чапсытхан, неке. Мода кӧзідиинде Ирина Троякованың «Этно-стиль» садығ туразынаң кип-азах полған. Модельер Татьяна Мамышева олғаннарға кип-азах тимнепче. Аның хоостарынҷа «Чылаңмас» кӧзідіг парған.
Сценадағы артисттернің кип-азаа аймах ӧңнернең ойнаан. Мындағ чалахай иирлер пос чирін аарлирға ӱгретчелер, пасхазына тӧӧй нимес полчатханыбысты чахсы кӧзітчелер. Кӧрігҷілерге чалахай тынағ сыйлаан прай артисттерге алғыс сӧстері читірілген.
Автор :
Елена САГАТАЕВА, Сомҷы Д.Сунчугашев
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде