ОЛҒАН ИМНЕГ ТУРАЗЫ ТИЛІПЧЕ
10.12.2019
Хабарлар
Имнег кирее. Пӱӱл республиканың олған имнег туразы 55 чылын таныхтапча
Республиканың олған имнег туразынаң Людмила Владимировна Топанова устапча. Ол, 1981 чылда Хызылчардағы хазна имнег институдының олған имҷізі пӧлиин тоозып, Шира аймаандағы имнег туразында тоғынған. Ординатурада ӱгредиин педиатрияҷа узаратхан. Анаң чиит специалист Г.Я.Ремишевскаяның адынаң республиканың имнег туразының олған пӧлиинзер тоғысха кірген. Анда илееде чыл істеніп, Хакасияның хазых хайраллаҷаң министерствозында 15 чыл тоғынған. 2016 чылның октябрьынаң Ағбан городтың олған имнег туразының ӧӧн имҷізіне турғызылған. Людмила Владимировна имнег киреенде 38 чыл істен салған. Аннаңар олған имнег туразының тоғызынаңар чахсы пілче.
Пӱӱнгі кӱнде олған имнег туразында 650 кізі істенче: 122 имҷі, 300 азыра ортын имнег тоғынҷызы, 30 кічіг имнег тоғынҷызы паза пасхазы (бухгалтер, экономист, водитель, гардеробщик, кастелянша, техничка).
Ағбанның олған имнег туразы республикани пол парғанда, ам андар Хакасияның прай аймахтарынаң имненерге килчелер. Хакасияда перинатальнай кін азылған соонаң, ол имнег туразынзар Г.Я.Ремишевскаяның адынаң имнег туразындағы олған службазы кір парған.
Таныхтирға кирек, ікі чыл аразына «Олған поликлиникаларына имнег оборудованиезін алары» федеральнай программам тоғысха киректелчеткен тиріглер алылған. Хорадығлар 50 миллион азыра салковайға тиңнелче. Программа ӱс чылға кӧрілче. Іди 2018 чылдаң 2020 чылға теере республиканың олған имнег туразынзар наа оборудование алылар. Пӱӱл чыл тоозылғанҷа 5 миллион салковайға турчатхан ікі оборудование имнег туразында турғызылар. Килчеткен чылда тиксі республиканың имнег тураларына 60 миллион салковай позыдылары кӧрілче. Олған имнег туразына ідӧк имнег оборудованиезі алылар, оларның санында рентген аппарады.
Имнег туразында олғаннарға хазых кіні тӧстелген. Анда ағырбинчатхан, че ағырыбызарға чочыныс пар палаларнаң тоғынчалар. Кӧзідімге, хурсахтары чахсы тоғынмин сайбалчатса, тамкы тартхан алай наркотиктер амзапчатхан олғаннарнаң профилактика тоғыстарын апарчалар. Хазых кіні школаларнаң палғалыс тудып істенче. Анда психологтар, наркологтар, олған имҷілері, психиатр-нарколог паза даа пасха специалисттер пар. Іҷелернің андағы специалисттерзер сурығлар пар полза, оларзар айланарға сағынчатсалар, 215-543 телефонҷа сығдырадарға чарир.
Ӱр ниместе, сентябрьда, олғаннарға хазых школазы тӧстелген. Анда бронхиальнай астманаң ағырчатханнарға специалист пар. Неделяда пір занятие иртірілче. Андар аллерголог имҷі полызиинаң алай посха 306-050 телефонҷа пазын саларға чарир. Имҷі ӧнетін тӧстелген группаа пір айҷа астма ағырығдаңар чарытча. Анда палаа тыныс читпинчеткен туста орта тынарға паза тынысты орта алынарға ӱгретчелер. Пала пурлухчатса, іҷе-пабалар чочаанына ингаляторнаң саба тузаланчалар. Хазых школазында имҷілер ингаляторнаң орта тузаланарға ӱгретчелер. Ідӧк сағыссыратчатхан паза ағырығдаңар пілбинчеткен сурығларға нандырығлар алып аларға чарир. Орта имнензе, ағырығ улғаатпас.
Килчеткен чылда хазых школазы ідӧк сахар диабедінең ағырчатхан олғаннарға азылар. Кізілер сахар диабеді ағырығдаңар пілерге кирек: хайди посты орта тудынарға паза хайдағ оңдайнаң ол кізее теелче.
Олған имнег туразында, пасха имнег учреждениелеріндӧк чіли, специалисттер чидіспинче. Чииттер кӧстегліг оңдайҷа ӱгренчелер. Олар, киліп, тоғынарына ізеніс пар. Амғы туста 30 студент аймах-пасха городтарда ӱгренче. Ӱгредіглерін тоозып, чиит специалисттер Хакасиязар тоғынарға айланчалар, че прайзы нимес. Аймах-пасха сылтағлар пол парча: кем-де, хоных тӧстеп, пасха регионда халча, піреезі экзамен тут полбинча алай аккредитация ирт полбинча. Пӱӱл ікі специалист килерге кирек полған, че киліспеен. Пу сидіксініс тиксі хазнадағы имнег тураларында тоғасча. Устағ-пастағ ол сурығны пӧгерінҷе тоғыс апарча.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы