ЧОЛ ПӰДІРІЛЕРІНЕ ІЗЕНІС ПАР
29.09.2021
Хабарлар
Тоғазығ. Хакасия пазы Валентин Коновалов «Сибирьдегі чӧптезіг» регионнар аразындағы ассоциацияның толдырығлығ комитет кнезі Геннадий Гусельниковнаң тоғасты
Чарыс айында «Сибирьдегі чӧптезіг» регионнар аразындағы ассоциацияның пайрамнығ чыылии Кемеровта иртер. Халых пірігізінің толдырығлығ комитет кнезі Геннадий Гусельников пу алғым чыылығ алнынҷа регионнарның толдырығлығ паза закон сығарҷаң ӱлгӱ органнарының устағҷыларынаң тоғасча. Ӱртӱн айының 27-ҷі кӱнінде Геннадий Геннадьевич, пістің пастыхтарнаң тоғазып, чыылығда ӱзӱрілер ӧӧн сурығларны чарыт пирген.
Халых пірігізі айғасчатхан иң килкім проект - «Улуғ Сибирь» - Сибирь регионнарының тиксі чуртас-экономиказын тилідеріне кӧстелген. Анда тиксі 64 триллион салковайға аймах кӧстегліг проекттер кӧрілген. Ӧӧн кӧстег - инфраструктура проекттерін тилідері. Андағ проекттернің пірсі Ағбан - Бийск чолның пӱдірии полча. Чоохтирға кирек, пу чол Ағбан - Тӧӧ пазы чолның узарааны полча паза мыннаң мындар Сибирьнің алты регионын палғалыстырар. Хакасия чол пӱдірии алты регионның экономиказына киректелчеткенін киречілеп алған сылтаанда, федеральнай кін пу чылдаң пасти аның пӱдіриине ахча пиріп пастаан. Че пу сағысты табырах чуртасха киріп алар ӱчӱн, ахча ідӧк чахсы пирілерге кирек. Аннаңар «Сибирьдегі чӧптезіг» полызиина ізеніс иділче.
Аннаң пасха, Геннадий Гусельников Сибирьде тоңастығлар рыногының тилізіне теелген. Ирткен чылда Хакасияда тоңастығлар чахсы сыххан. 2025 чылға республикада хыра чирін 86 муң гектарға теере ӧскірері кӧрілтір, алылар тамах синін 130 муң тоннаа теере ӧскірерге. Аның ӧӧн чардығы азыралға парар. «Сибирьдегі чӧптезіг» хыраҷыларға тамахтың ниме-ноо сығарызын алғыдарынҷа проект тимнепче. Ӧӧн сағыс этиленге паза арығ спирттер сығарызына тӧстенче. Омск облазында пу сағыснаң тузаланчалар. Сағам, тізең, Сибирь хыраҷылары, тоңастығларны хызырып, хайахтығ культураларға кірчеттірлер, ол санда сояға.
«Сибирьдегі чӧптезіг» чыылиинда ідӧк регионнарның экспортын ӧскірерінеңер, орындағы туризмнің сидіксіністерінеңер паза тиліс оңдайларынаңар, кічіг авиацияны тилідерінеңер чоох парар. Хайзы даа сурығ Хакасияа кирек. Тиксі хазнаа сидік сурығ - чуртағҷылар хазии. Аннаң палғалыстығ демография. Аннаңар Сибирьде «Хазых школазын» тӧстирге пӧгінчелер.
Пастыхтар пу проекттерні чуртасха кирерінде ӧткін араласчатхан ӱчӱн удур-тӧдір алғыстасханнар.
- Піс ӧткін аралазарға кӱстенчебіс, - теен Хакасия пазы Валентин Коновалов. - Сірер таныхтаан проекттер уғаа кирек, ол санда Ағбан - Бийск чол. Пілдістіг, оларны чуртасха кирерге сидік полар, чоох пістің республикадаңар нимес, хонҷыхтардаңар. Проект пастағҷызы полчатханда, піс аннаң кӧстегліг тоғынчабыс. Туризмні тилідерінце ідӧк тоғысты айнытчабыс.
Пастыхтар мыннаң мындар ідӧк чӧптіг тоғынарға чарат салғаннар. «Сибирьдегі чӧптезіг» регионнар аразындағы ассоциация 1990 чылда тӧстелген. Чарыс айында халых пірігізі 30 чылын таныхтир. Алғым чыылығның ӧӧн сурығларының пірсі пірігіс устағҷызын табары полар. 2018 чылда кнеске Тыва Республика пазы полған Шолбан Кара-оол табылған. Ортымахти устағҷы тӧрт чыл тоғынча.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде