ЧИҢІСТЕРГЕ ПАЙ ЧЫЛ ПОЛДЫ
22.12.2021
Хабарлар
Сыйыхтас. Хакасияның спорт министерствозы, 2021 чылның салтарларын идіп, артыхтарын таныхтаан
Кибір хоостыра декабрь - сыйыхтас тузы. Министерство-ведомстволар пӧзік чидіглерге читкен тоғынӌыларны чеестепчелер. Хакасияның спорт министерствозы чонны 16 декабрьда С.П.Кадышевтің адынаң культура кінінде чыған. Мероприятиені Хакасия пазының орынӌызы Ольга Пономарёва асхан. Ол республика пазы Валентин Коноваловтың адынаң залдағы улусха тӱзімніг тоғызы ӱчӱн алғызын читірген. Хайди таныхтаан Ольга Игоревна, спорт сферазында тоғысха кӱс чон істенче. Олар тӧреен чирін ырахха сабландырчалар. Хакасияның правительствозы спортты тилідерге кӱстенче. Ол пӧгіннең 2022 чылда, пӱӱлгізінең тиңнестірзе, республикадағы спортха 70 %-ке кӧп ахча позыдылар, ол санда федеральнай бюджеттең ахча кірер.
Ольга Пономарёва чоох тутхан соонаң сыйыхтас пасталған. Ағбандағы ниик атлетикаӌа олимп резерві спорт школазының директоры Андрей Ромащенко «Хакасияның физическай культуразының паза спортының саблығ тоғынӌызы» аарластығ атха турысхан. Стол теннизінӌе тренер Ирина Мордакинаа Аарластығ пічік читірілген. Ирина Александровна хазии уйан спортсменнернең тоғынча. Пӱӱл ол Паралимпиадада тренер чіли араласхан. Комплекснай олған спорт школазының тренері Анатолий Мухин Россияның спорт министрінің алғыстазынаң таныхтатхан. Михаил Аёшинге, Игорь Лунгка, Юрий Дегтяренкаа паза Юсиф Самедовха «Россияның спорт узы» аарластығ атты киречілепчеткен танығлар паза пічіктер читіргеннер. Чоохтирға кирек, ооллар нормативті 2020 чылдох толдырыбысханнар. Пастағы ікі спортсмен - Ирина Мордакинаның ӱгренӌілері. Олар стол теннизінең айғасчалар. Юрий Дегтяренко пауэр-лифтингте кӱзін сынапча, Юсиф Самедов - кикбоксер.
Пӱӱл спорт министерствозы 8 кӧстегӌе марығ иртірген. Олардаң иң танығлығ «Хакасияның поғдархазы» марығ полча тізе, саба полбас, неке. Аның оңдайларынӌа чылның иң чахсы спортсменнерін паза тренерлерін таллааннар. Пӱӱл олимп спорт кӧрімнерінде артыхха волейболист Анна Погорельченко, кӱресчі Артур Чебодаев паза дзюдоист Михаил Мамаев сыхханнар. Тренерлердең Ирина Золотухинаны паза Игорь Владимировты таныхтааннар. Ирина Петровна «ЦСКА-Хакасия» спорт школазында істенче. Аның хызыӌахтары волейболӌа Россия первенствозында тӧреміл чиңіс тутчалар. Игорь Владимиров - ниик атлетикаӌа тренер. Ӱгренӌілерінең хакас оол Денис Чертыковты адирға кирек. Пӱӱл чир-суғӌыбыс тағлығ чӱгӱрісче Россия чемпионадында алтын медаль холға кирген.
Олимп нимес спорт кӧрімнерінде Даниела Колесник (пауэрлифтинг), Фёдор Жибинов (гиря кӧдірері) паза Леонид Чебодаев (кикбоксинг) «Хакасияның поғдархазы» атха турысханнар. Паралимп спорт кӧрімнерінде - теннисист Инна Балахчина паза шахматист Руслан Драганов.
Сценадаң Чебодаев фамилияны ікі хати адааннарында, чӱрекке ӧрініс толған. Леонид паза Артур Чебодаевтер - харындастар. Оларға пӱӱл чиңістерге пай чыл полды. Леонид тилекей чемпионадында чиңіс тутхан, Артур тилекей первенствозында кӱмӱс призер полыбысхан. Оолларның тӧреен-ӧскен чирі - Асхыс аймаандағы Пилтір аал. Ікізі дее кічігде олаңай кӱресте кӱстерін сынаан. Че тӱрчедең улии боксха парыбыстыр, анаң Ағбанда кикбоксингнең айғас сыххан. Пӱӱнгі кӱнде 24 частығ Леонид Чебодаев - чоннар аразындағы класстығ спорт узы, Хакас хазна университедінде ӱгренче. Алында олимп резерві училищезін тоозыбызарға, армияа пар килерге маңнанған. Артур 3-ӌі класстаң олаңай кӱреснең айғасча. 2021 чылда ол Россия первенствозында алтын медаль холға кирген. Пу чидіг ағаа тилекей первенствозына чол асхан. Хакасия чуртағӌылары хакас оолның ӱчӱн матап «ағырғаннар». Чиит кізінің таниинаң, Россияда кӱстіг кӱресчілер кӧп. Прайзын кавказтағылар асчалар, че олардаң хорыхпасха, харбазарға кирек. Пу чағында спортсмен Иван Ярыгиннің хумартхызына чарыдылған чоннар аразындағы турнирде кӱзін сынирға пӧгінче, ідӧк ол 2022 чылда тилекей чемпионадында аралазарына ізенче. Артур Чебодаев чоохтаан: «9 класс соонаң Хызылчарзар ӱгренерге парыбызып, амға теере анда чуртапчам. Тӧреен чирімде мині чылығ удурлаанына ӱрӱккем. Кізілер синің ӱчӱн «ағырчатса», уламох чахсы харбазарға кӱстенчезің».
Пайрамның халғанӌызынзар Хакасияның спорт министрі Сергей Кочан сӧс алған. Сергей Владимирович таныхтаан:
- Пӱӱл спортта чахсы киректер кӧп полды. Наа объекттер тузаланысха кирілгеннер, «2030 чылға теере Хакасия спортын паза физическай культуразын тилідер концепция» алыл парған. Ідӧк Оӧркі Чӧптің пӱӱлгі халғанчы сессиязында «Хакас Республикадағы физическай культурадаңар паза спорттаңар алызығлар кирердеңер» закон проекті алыл парған. Аны хоостыра чиит тренерлерге, таланттығ спортсменнерге хабазарбыс. Амды министерство прай спорт кӧрімнерінде чиңіс тутхан спортсменнерні сыйыхтир. Алында олимп спорт кӧрімнерін не хайығда тутчаңмыс. Прайзына тоғыс ӱчӱн алғызым читірчем, Наа чылнаң алғыстапчам.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде