ХАКАС ТӀЛӀН САБЛАНДЫРҒАННАР
05.12.2018
Хабарлар
***************************************************************************************
Александр Судочаковтың чонға айланызы прайзының кӧңніне кірген. Тиктең нимес, ол пу номинацияда марығ соонда алынҷа сыйыхха турысхан.
Анаң «Медиа сурығлары» номинацияда марығласханнар. «Айдолай» алыптығ нымах сигіс ӱзікке чарылған. Полған на ӱзікче алыптарның чуртазы хоостыра сурығлар тимнелік полған. Итсе-де, ол сурығларға ӧмелер азынада тимненгеннер. Амды пірее сурығ пирілзе, ағаа нандырығны сағын табарға кирек полған. Кӧзідімге, «Айдолай» алыптығ нымах хайдағ сӧстердең пасталча?», «Халых чонның хан-пигі кем полғандыр?», «Арығ-сіліг Алтын Арығның ададаң пірге сыххан улии-кічии пар ба?» Пу сурығларға олғаннар чахсы тимнен салтырлар. Прайзы даа орта нандырған.
Соонаң кӧрігҷілерге «Айдолайның ырын, чатханнаң алай пасха даа кӧг тириинең сарнап, ыс пирері» номинацияны кӧрерге хынығ полған. Мында ӱгренҷілер чатханнаң алай хомыснаң ойнапчатханнарын паза ырлапчатханнарын кӧзіткеннер. Сынап таа, пістің аалларда чайаачы олғаннар пар. Мында олар сын устарын кӧзіткеннер, піреезі хайлапчатхан.
Анаң халғанҷы номинация «Хығырығ - ойын - кӧг» адалған. Мында ідӧк, алыптығ нымахтың ӱзігін алып, улуғ нимес ойын кӧзідерге кирек полған. Полған на ӧме ойынны пу сӧстернең тоосча:
Азыр пастығ чыдаларыи тудыпып,
Аархы чирде халды алып-кӱлӱктер.
Ай чалбағы хара молаттарыи тудьшып,
Тііі чирде халды алып-кӱлӱктер.
Марығ тоозылғанда, чарғыҷылар салтарларны ӱзӱрерге парыбысханнар. Залда халған чонны Дмитрий Сафьяновтың устаанынаң «Кӱн чахайағы» кӧг ӧмезі кееркестіг сарыннарнаң ӱтерткен. Мин ол туста Н.Ф.Катановтың адынаң национальнай гимназиядағы хакас тілі паза литература ӱгретчізі Татьяна Казанаеванаң чоохтазып алғам. Ол пеер «Айдастар» ӧмені ағылған. Аның чооғынаң, олғаннар пу марыға чахсы тимнен салтырлар. Хайди ирткені прайзының кӧңніне кірген полар. Че мында хайдағ читпес сари пар. Пірее номинацияларға тус асхынах пирілгеннеңер, ӱгренҷілер постарының чайаачы кӧңнілерін читіре кӧзідерге маңнанминчалар.
Ол туста чарғыҷылар чиде тӱскеннер. Пу марығ соонда олар мындағ салтарларға килгеннер. «Ине тілі» марығның чиңісчізі Ӱс чулдағы «Тӧӧ алыптары» команда полыбысхан. Оларға 5 муң салковайға сертификат паза книгалар сыйыхха читірілгеннер. Ікінҷі орында «Мурза алыптары» полғаннар. Оларға 3 муң салковайға сертификат паза книгалар пиргеннер. Ӱзінҷі орында Ағбандағы 24 № школаның «Иркеҷектері» полыбысханнар. Олар 2 муң салковайға сертификат алғаннар. Пасха ікі ӧмее Аарластығ пічіктер читіргеннер. Алынңа сыйыхтарға турысханнар Диана Кокоякова паза Александр Судочаков.
Пістің «Хабар» газета хакас тілін піди кӧдірчеткен ӱчӱн полған на ӧмее 2019 чылның пастағы чардығына газетаа пазынҷаң талон паза «90 чыл чоннаң хада» газетабыстың тархынынаңар пазылған книганы сыйлап пирген.
Ідӧк марығда араласхан ӧмелернің устағҷыларына сыйыхтар читірген Россияның театрлар тоғынҷылары пірігізінің Хакасиядағы пӧлиинің кнезі, Хакасияның чон артизі Светлана Чаптыкова.
ИГИСАТ-тың адынаң филология наукаларының докторы Мария Чертыкова мындағ марығларда туртухпин араласчатхан ӱчӱн Чарков аалдағы олғаннарға сыйых читірген. «Уйбат алыптары» ӧмеде чарымы орыс палалар, че олар «Ине тілі» марығларда удаа араласчалар.
Ам килер чылда «Ине тілі» марығ С.П.Кадышевтің «Албынҷы» алыптығ нымағы хоостыра полар. Аннаңар олғаннарға пу нымахты амох, маңзырабин, полған на сӧстің сӱзӱнін сииртіп, хығырарға чӧп пирілген.
Автор :
Илья ТОПОЕВ
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 1 | 2 | 3 |
Кӱн таңмазы
Хакасияда
Россияда
Тилекейде