ПОС АРХИВІН - ТӦРЕЕН ЧИРІНЕ
27.03.2019
Хабарлар
Бронислав Майнагашевтің архивін Хакасияның национальнай архивіне пирерінҷе пресс-конференция культура министерствозында ирткен.
Хакасияның культура министерствозында Россия транспортының аарластығ тоғынҷызы, СССР-ның талай флодының аарластығ тоғынңызы, аарластығ полярник, СССР-ның гидрометеорология хазна комитедінің аарластығ тоғынҷызы Бронислав Семёнович Майнагашевтің архивін республиканың архивіне пирерінҷе чыылығ ирткен. Ол Асхыс аймааның аарластығ кізізі полча.
Амды Бронислав Майнагашевтің пічіктері хазна синінде хайраллалар. Мындағ тоғыс Хакасия пазының орынҷызы Андрей Серафимович Асочаковтың кӱстенізінең апарылған. Б.С.Майнагашевтің хада хонғаны Гильда Михайловна архив пічіктерін паза сомнарны Хакасияның архивіне пирібіскен. Тиксі 200-че пічік пирілген. Тархын саринаң олар уғаа тузалығлар.
Бронислав Семёновичтің чуртас чолынаңар, тоғызынаңар пічіктер паза сомнар пастыра піліп аларға чарир.
Аның тоғыстағы дневниктерінде алтынзархы талайларҷа чӧргеннеңер, пӧзік широталарны ӱгренгеннеңер сан пирістер таныхталғаннар. Талайҷы СССР-ның талай флодының министерствозына радиограммалар ысханы пічіктерде халғаннар. Школа тузындағы дневниктері, хоостары, іҷезі чыған почта маркалары кӧзідіге сығарылтыр. Сомнар альбомнарында Бронислав Майнагашев чиит позы харах алнында турыбысча. Аймах хазналар открыткалары хоостыра хайдар ол чӧргенін піліп аларға чарир. Ол Италияда, Ирландияда, Новая Зеландияда, США-да, Сингапурда паза даа пасха хазналарда полтыр.
Чыылығда чоох тутханнар Хакасияның культура министрі Леонид Ерёмин паза республиканың Улуғлар чӧбінің кнезі Пётр Воронин.
- Мин Бронислав Семёновичнең 1992 чылдаң таныс полғам,- таныхтаан Пётр Воронин. - Ол Хакасия республика полар ӱчӱн улуғ тоғыс апарған. Алғызым читірчем Гильда Михайловнаа! Ол архив пічіктерін, чыып, хайраллаан паза Хакасияа чиғірген. Бронислав Майнагашев ӧсчеткен тӧлге чахсы кӧзідім полча.
- Бронислав Семёнович кічіг чирсуун тың аарлаӌаң, - чоохха хозылған Хакасияның национальнай архивінің директоры Валентина Райс. - Хакасияның архиві илееде чыл Майнагашевтің пічіктерін чыыпча. Таныхтирға кирек, полған на пічік мында аарлығ. Олар аймах кӧстеглерге пӧлілчелер. Тархын хоосғыра ХХ чӱс чылның чуртазы пирілче.
Прай пічіктер хобырылар. Олар чир-суубысты ӱгренчеткеннерге, студенттерге паза ӱгретчілерге, хазна тоғынҷыларына тузалығ поларлар. Мындағ илбек кізідеңер пілерге хаҷан даа чапсых, аның чуртасха кӧрізі пасхазына чахсы кӧзідім полча.
Автор :
Елена САГАТАЕВА
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 1 | 2 | 3 |
Кӱн таңмазы
Хакасияда
Россияда
Тилекейде