ЧУРТ КИРЕЕНДЕГІ ЗАКОН АЛЫЗЫҒЛАРЫ
01.02.2019
Хабарлар
Пресс-конференция. Хакасияның пӱдіріг паза чурт-коммунальнай хоных министерствозының хазна чурт сыныхтаа департаменті пресс-конференция иртірген.
Пресс-конференция департаменттің 2018 чылның салтарларына паза чурт киреендегі законодательствозар кирілген алызығларға чарыдылған.
Чурт сыныхтаа департаментінің устағҷызы Максим Виноградов департаменттің ирткен чылдағы тоғызынаңар хысхаҷахти искірген. 2018 чылда андар чуртағҷылардаң 3299 айланыс кірген. Оларның кӧбізі, 1529 айланыс, чурт-коммунальнай хоных тӧлеглеріне чарыдылған, 718 айланыс - коммунальнай полызығларның качествозына, 699 айланыс - кӧп квартиралығ туралардағы тиксі ис-пайны иптіг тутпинчатханына.
Ирткен чылда чуртағҷыларның айланызы хоостыра 813 сыныхтағ иртірілген. Законодательствоны сайбааннаңар 280 пічік паза 2412 толдырңаң пічік пирілген. 2018 чылда департамент инспекторлары аймах статьяларҷа административнай сайбағлардаңар 113 протокол пас салғаннар. Сыныхтағлар салтарларынҷа юридическай лицолар чурт-коммунальнай по-лызығлар ӱчӱн тӧлегні хатап санааннар. Ол сананыс-тарңа, кӧп квартиралығ туралар чуртағңылары коммунальнай полызығлар ӱчӱн 3 миллионңа салковай артых тӧлеп салтырлар.
Максим Виноградов кӧзідімге хай пірее сайбағлардаңар искір пирген. Саяногорсктағы «Кедр» тибіреділбинчеткен ис-пай собственниктерінің пірігізі чылығ ӱчӱн тӧлег синін ӧскірібіскен. Іди кӧп квартиралығ пір тураның чуртағҷылары чылығ ӱчӱн тӧлегні пір миллион салковайға артых тӧлеп салғаннар.
Максим Виноградов пресс-конференцияда ідӧк чурт киреене теелчеткен законодательство алызығларынаңар чоохтаан. Пастағы алызығ кӧп квартиралығ тураларнаң устапчатхан организацияларға лицензия пиреріне чарыдылған. 2019 чылдаң сығара устапчатхан компаниялар, ӱс сайбағны хатап ит салзалар, лицензияларын алдыртыбысчалар. Пастағы сайбағ - ол кізі чуртазына паза хазиина хорғыс ағылғаны; ікінҷізі - кӧп квартиралығ тураларға тиксі ис-пайға чарытхы, чылығ пирерінҷе чӧптезіг хоостыра чарытхы, чылығ читірілбеені; ӱзінҷізі - диспетчер службазы тоғызының кирексіністерін сайбааны; тӧртінҷізі - устапчатхан компания чарытхы, суғ, чылығ пирчеткен организацияларға алымнығ полғаны; пизінҷізі - кӧп квартиралығ тураларны хысхызына тимнир туста чылығ пирҷең системаны сыныхтабааны.
Ікінҷі алызығ чылығ ӱчӱн тӧлеглерге чарыдылған. Кӧп квартиралығ тураларның чуртағҷыларына квартираларында чылығ синеҷең прибор турғыс саларға чарир. Аны хоостыра чылығ ӱчӱн тӧлег саналар, ағаа хоза кӧп квартиралығ тураның тиксі ис-пайы ӱчӱн тӧлеглері полар.
Че ол прибор полызиинаң чылығ ӱчӱн тӧлегнің сині хай-хай асхынах полар.
Ӱзінҷі алызығ устапчатхан организацияны таллап аларына чарыдылған. Хай пірее кӧп квартиралығ тураларның устапчатхан компания чоғыл. Амды устапчатхан компания чох тураларға устапчатхан компанияларны муниципальнай пӱдістер таллирлар. Хайди таныхтаан Максим Виноградов, устапчатхан компания чох кӧп квартиралығ туралар табырах изел парчалар. Андағ кирек полбас ӱчӱн, хайди даа устапчатхан компания кирек.
Тӧртінҷі алызығ чурттың пӧліктерін алыстырарына чарыдылған. Мының алнында чурт кодексінде чуртаҷаң на орынның пӧліктерін алыстырарынаңар пазыл парған полза, амды анда «чуртачаң орын» пілдірігнің орнына «кӧп квартиралығ орын» пілдіріг киріл парған. Таныхтирға кирек, кӧп квартиралығ тураларның пастағы хадылында пос киреенең айғасчаң орыннар (садығ туразы, салоннар паза пасхазы даа) орныхчалар. Оларның даа пӧліктері алыстырылча, аннаңар чурт кодексіне пу пілдіріглерні чарбас ӱчӱн, мындағ наа пілдіріг кирілген. Амды кӧп квартиралығ тураларның пос киреенең айғасчаң орыннарының пӧліктері хайди алыстырылғанын хазна чурт сыныхтаа департаменті сыныхтир.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы
Хакасияда
Россияда
Тилекейде