ХУЗУХ АҒАЗЫ ХАЙДИ ОДЫРТЫЛЧА?
18.10.2019
Хабарлар
Чир-чайаан паза кізі. Таштып аймааның ағас хонии тоғынҷыларына маң чох кӱннер пасталыбысты. Олар хузух ағазын ӱреннең одыртчалар
Кӱскӱзін одыртылза, прай сыныхтағ-сынағларны иртерге маңнанча. Часхызын ӧзіп пастабысчалар. Наа ӱреннер одыртылған чир сыбыра хайығ кирексіпче. Аны полған на сай одалирға кирек. Питомникте хорбыҷахтар 3 чыл ӧсчелер. Аның соонда ла оларны Хакасияның арығларында одыртып пастапчалар.
Таныхтирға кирек, Таштып аймаа, хузух ағазының хорбыҷахтарын ӧскіріп, тиксі сабланча. Анда чыл сай 400 гектар чирде хузух ағазы одыртылча. Анзы Хакасияда ӧскірілчеткен прай хузух ағазының хорбыҷахтарының чарымына тиңнелче.
Хакасияда ӧӧнінде сабаллығ ағастар одыртылчалар: хузух ағазы, харағай паза тыт. Іди пӱӱл 1300 га чирде сабаллығ ағастар нааҷыли одыртылғаннар, 1000 га чирде ӧсчеткен ағастарға хоза одыртылғаннар.
Хакасияда пӱӱл хузух ағазын ӱреннең Таштып аймаанда ла одыртчалар. Ол тоғыснаң ӧӧнінде «Абазалессервис» автоном учреждениезі айғасча. Пу тусха 1,5 тоннажа торым хузух одыртыл парды. Прай 6 тонна хузух ӱренге парары кӧрілче. Анҷа торымнаң 3 млн хорбыҷах ӧскіріп аларға киректер.
- Тоғыста піс таллама хузухнаң тузаланчабыс. Аны чиирге хустар матап чыылысчалар. Аннаңар питомникте хоғдырачаң тинтелерні эмектерге ілглеп салчабыс. Ӱренні соохтар пасталар алнында одыртарға кирек, - чоохтапча «Абазалессервис» автоном учреждениезінің устағҷызы Виталий Булдаков.
Хакасия хузух ағазының ӱреннерін кӱскӱзін одыртчатхан Россиядағы ас саннығ регионнарға кірче. Пасха орыннарда ӱреннерні часхызына читіре ӧнетін тимнелген кічіг кооптарда хайраллапчалар. Андар хайди даа хум саларға кирек.
Автор :
Александра ШЛЫК
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы