ПОЛҒАН НА СӦБІРЕНІ ХАЙЫҒА АЛАРҒА!
27.11.2019
Хабарлар
Ӱлгӱде. Хакасия пазы устаанынаң киҷее правительство чыылии ирткен
Хакасия пазы Валентин Коновалов правительство чыылииның кӱн суриина сығарылған сурығларның ӱзӱриин пастир алнында ирткен тынағ кӱннеріндегі саайларзар хатап айланған. Пастағы саайда Асхыс аймаандағы Пилтір аалда ікі квартиралығ тура кӧйген сылтаанда, 42 частығ ирен ікі палазынаң хада ӱреен. Аннаңар республика пазы муниципальнай пӱдістер пастарын чахсы даа чуртапчатхан, че чуртастың сидік оңдайларына кір парған, ачығ суға тартылчатхан, уламох пала ӧскірчеткен сӧбірелерге хайығ айландырарға киректеен. Паза пір саай Приисковайда пол парған, пір турист, хар алтына кіріп, ӱреен. Хакасия пазының орынҷызы Юрий Курлаев пу саайларҷа апарылған тоғыстаңар искірген. Валентин Коновалов Приисковайда тоғынчатхан арачылағҷылар посты тоғызын иптирге чахаан. Посёлокта тоғынчатхан полған на идінҷекті сыныхтирынҷа паза оларда тохтапчатхан туристтерні постта санға алдыртарынҷа тоғынарға чахығ пирген.
Чыылығның кӱн суриина министерство-ведомстволар тимнеен закон паза чарадығ проекттері сығарылғаннар. Хакасияның ГО, ЧС паза ПБ управлениезі пастығы Николай Старков «Хакасиядағы чир-чайаан паза техногеннай сағыбаан саайлардаң чуртағҷыларны паза орыннарны арачылирдаңар» республика законына алызығлар кирердеңер закон проектінең таныстырған. Аны хоостыра пу саайлар сылтаанда чуртағҷылар хазиина паза ис-пайына иділген ӱрегні айландырарынҷа программаны тимнирі регион ӱлгӱлеріне пирілер. Ағаа хоза чуртха паза ис-пайға саайлардағы ӱрегдең страховка идері федеральнай синде кӧрілер осхас.
- Саайлар сылтаанда кӧп кізі чурт чох халча, піске пос кӱзінең полызығ тілирге килісче, аннаңар ис-пайға страховка иткені чахсы полызығ поларҷых, - таныхтаан Валентин Олегович.
Ибдегі малларның паза аң-хустарның пойли чӧрчеткені, ээзі чох аң-хустарны тудары, оларға наа ээлерні табары паза ӧнетін приюттар тӧстирі ідӧк наа закон проектінде таныхталар. «Хакасияның хазна ӱлгӱ органнарының аң-хустарнаң айғазарынҷа полномочиелерні чарадарынаңар» закон проектінең таныстырған Хакасияның аал хонии министрінің орынҷызы Александр Башков. Хазна синінде приюттарны тӧстирі паза оларның тоғызы чарадыл парарға кирек. Хакасия пазы Валентин Коновалов иң пастағызын аң-хустарны иреелебин тударына хайығ айландырған паза республикада ээзі чох пойли чӧрчеткен адайларны тутчаң ӧнетін пірігіс тӧстир сурығны істезерге чахаан.
Хакасиядағы чир-чайаан хайраллалчатхан орыннардаңар чоох тутхан республиканың ис-пай паза чир хайызығларынҷа министрі Евгений Тарасов. Пӱӱнгі кӱнде республикада 11 андағ орын саналча: «Хакасский» национальнай парк, пис чир-чайаан заказнигі паза пис чир-чайаан памятнигі. Пу чағында пір чир-чайаан паркын Турна кӧллерінде паза читі чир-чайаан заказнигін азарға пӧгінчелер. Пілӧ, Чирім, Шунет паза Тус кӧллерде аал хонии чирлерін хайраллалчатхан чир-чайааннығ чирлер санына кирерге пӧгін турча. Амды пу чирлерде, аал хонии тоғыстары апарылбин, чонға тынанҷаң паза хазиин пиктеҷең полызығлар пирілче.
Хакасияның істеніс паза социальнай арачыланыс министрі Ирина Ахметова 2020 чылда транспорттығ кинектерге паза кинек пала ӧскірчеткен сӧбірелерге страхованиенің 50 % айландырардаңар правительство чарадиинаң таныстырған. Пу полызыға ахча федеральнай кіннең пирілер. Кинек палалығ сӧбірелернең тоғасхан соонаң оларның кирексіністері санға алылғаннаңар искірген Ирина Ахметова. Тиксі полызығларға 2020 чылда 5,5 миллион салковай кӧріл парған.
Аннаң пасха, чолларның хысхызын арығлалчатханынаңар искірілген. Хакасия пазы таниинаң, хар тың чаған соонаң сыннарда чоллар хомай арығлалчатханнаңар айланыстар кірген. Хакасияҷа МВД министрі Андрей Кульков чоллар тузында иптелбинчеткеннеңер илееде саай полғанына хайығ айландырған. Чолларны арығлапчатхан предприятиелерге читпестерні чох идердеңер чахығ пирілзе дее, олар аны чох идерге маңзырабинчаттырлар. Салтарында, машиналар саайланчалар, кізілер пиртінчелер.
Хакасияның ӱгредіг паза наука министрі Лариса Гимазутина республикада ӱгредігдегі нацпроекттернің чуртасха кирілчеткенін чарыт пирген. Чоохтирға кирек, Хакасияда «Егредіг», «Демография» паза «Хазых хайраллиры» нацпроекттерңе тоғыс кӧріндіре апарылча. Хакасия пазы Валентин Коновалов чыылығда араласхан Россияның Хазна Думазының депутады Надежда Максимоваа алғызын читірген. Ол, республика кирексіністерін санға алып, хаҷан даа хабасча. Нацпроекттер хоостыра даа илееде сурығ пӧгілген.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы
Хакасияда
Россияда
Тилекейде