ИРТІРЕ ІЗЕНЕРГЕ ЧАРАБАС
17.01.2020
Хабарлар
Меспектіг хоккей. Россия чемпионадының пӧзік лигазындағы іскеркі подгруппада теестегі тоғазығлар ирткен
Пістіңнер Хызылчардағы «Енисей-2» команданаң тоғассалар, ойын хайди тоозыларын азынада ухаанҷыланарға сыбыра сидік поладыр. Хызылчарзар парып, пірее хати маңат тимненіс кӧзітчелер, утып таа алчалар. Анаң постарының айғызында чиңдір салчалар. Ол даа сылтағнаң, неке, 14 январьда Ағбанның ӧӧн стадионынзар кізі кӧп чыылысхан. Анда иреннер ле нимес, ипчілер дее, олғаннар даа кӧрінгеннер. Оолағастарның ӧтіг ӱннері стадионҷа чалбах тарапчатханына улуғлар кӱлімзірескеннер.
Че ойынның пасталғаны ағбандағыларны саңай хомзындырған: тоғазығ пасталғаннаң тоғыс минута ла ирткен, аалҷылар, тізең, 2:0 саннаң алнында парчалар, уғаа маңат тимненіс кӧзітчелер. Нӧӧс, ибде утыр саларлар?
Мында Руслан Гавричков махтаға сыххан, пастағы гол кирібіскен. Таныхтирға кирек, тоғазығның пастағы чардығында ла ол 5 гол кирібіскен. Александр Захваткин, Иван Касаткин паза Михаил Селедков пірер гол киргеннер. Анзы ойынның пастағы чардығында. Командалар тынаға парчатханда, пістіңнер 8:2 саннаң алнында полғаннар. Уғаа маңат кӧзідім. Аннаңар кӧрігҷілернің ӧрінізі оңарылыстығ.
Марығның ікінҷі чардығында Михаил Селедков паза Константин Жаданов пірер гол кирібіскеннер. Аалҷылар саринаң Марат Шарипов паза Максим Иванов пірер гол киргеннер. 14 январьдағы тоғазығ 10:4 саннаң тоозылған. Ізестіг чиңіс. Ол даа сылтағнаң, неке, 15 январьдағы ойынға кӧрігҷілер уламох кӧп чыылысханнар. Пістіңнер аалҷылар хайди оой ла утчатханын кӧріп аларға сағынған поларлар.
Сынында, тізең, кирек саңай пасха оңдайнаң парыбысхан. Ойын пасталғаннаң ікі минута ла ирткенде, «Енисей-2» команданың хоккеизі Игорь Селедкин гол кирібіскен. Тоғазығ іди пасталғаны ағбандағыларның піреезін чочындырған даа полар. Че кӧрігҷілернің ӧӧн чардығы, пістіңнерге иртіре ізенібізіп, ачых-чарых кӧңніліг одырғлапчатхан. Олар киҷеегі ойынны сағысха кирген полбастар ба: 2:0 саннаң утырчадып, 10:4 саннаң чиңіс тутханнар нооза. Пу даа ойында кирек іди парарына иртіре ізенібіскен кізілер табылғаннар. Че ойынның 23-ӌі минутазында ла Руслан Гавричков гол кирібіскен. Чир-суғҷыларыбыс ӧріністіг суулаза тӱскеннер. Руслан киҷее чалғысхан на аалҷылар хаалхазына 5 гол кире сабысхан. Пӱӱн дее махтаға сығарын сағыпчалар. Уламох оолағастар, хызыл ӧңніг меспек аның холына кірзе, «Руслан, алнынзар!.. Руслан, гол!» тіп матап хысхырысчалар. Улуғлар даа халбинчалар.
Аалҷылар, тізең, аны хайығдаң позытпинчалар. Пірее хати Русланның алнында аалҷылар санынаң нинҷе-нинҷе хоккеист чапчаң хайынчатханын кӧрерге чарир полған. Ағаа хоза «Енисей-2» команданың хоккеисттері арачыланыстаңар сыбыра ла сағынминчалар, удаа пістіңнернің хаалхазы алнында кӧрін сыхчалар. Аннаңар кӧрігҷілер сизіктіг одырчалар: амох пірее ниме полар ла.
Харын даа, ойынның пастағы чардығы тоозылғанҷа аалҷылар гол кир полбин салғаннар. Че пістіңнер дее махтаға сыхпааннар. Андағ оңдайнаң хоккеисттер 1:1 саннығ тынаға парғаннар. Тоғазығның ікінҷі чардығы пасталғандох, Марат Шарипов «Енисей-2» команданы алнына сығарча. Уламох чочыныстығ пілдірібісті. Пастап Александр Захваткин саннарны тиңнестірібіскен, анаң команда капитаны Евгений Ткачук пістіңнерні алнына сығарған. Тынарға сала ниик полыбысханда, Данил Белокриницкий саннарны тиңнестірібіскен.
Ойын тоозыларына чит парды. 3:3 сан. Тоғазығ тиңни тоозылза, хайзы даа командаа пір сан хозылар. Че хоккеисттер чиңістеңер сағынчатпастар ба. Ойынның 89-ҷы минутазында «Енисей-2» команданың спортсмені Данил Белокриницкий гол кирібісче. Хайдағ хомзыныс.
Амды пістіңнернің 30 сан, пастағы орындалар. Кемеровтағы «Кузбасс-2» команда - ікінҷі орында, аның 28 сан. Хызылчардағы «Енисей-2» 24 саннығ - ӱзінҷі орында.
«Саяны» позының айғызында 20-21 февральда Иркутсктағы «Байкал-Энергия-2» команданаң ойнир. Сағам ол команда пістің подгруппада халғанҷы орында парча.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы
Хакасияда
Россияда
Тилекейде