НАА ЧЫЛДА НАА КИБІР САЛЫЛДЫ
22.01.2020
Хабарлар
2020 чыл - Хакас тілі чылы. Чайаачылар туразында поэт Геннадий Кичеевтің «Чаным сӧстері» кибелістер чыындызының презентациязы ирткен
Геннадий Кичеев пістің чонның иң хынчатхан поэттерінің санына юрче. Анзын Чайаачылар туразына тығырама чыылған чон киречілеен. Тӧӧ чирінең сыххан устың кибелістерін истіп аларға писательлер, ХакНИИЯЛИ-ның паза библиотекалар тоғынҷылары, хабарҷылар, ХГУ-ның студенттері килгеннер. Аарлығ аалҷыларның санында Хакасияның культура министрінің орынҷызы Ирина Браим, национальнай паза территориальнай политика министрінің орынҷызы Нина Челтыгмашева полғаннар.
Мероприятиені методисттер Ирина Юсупованаң Татьяна Шулбаева иптіг апарғаннар. Олар Хакас тілі чылында Чайаачылар туразы наа кибір тӧстепче тіп искіргеннер. Амды чыл сай 17 январьда, кибелісчі Моисей Баиновтың тӧреен кӱнінде, Хакас поэзиязының кӱні таныхталар. Таңнастығ хабарны чыылған улус ізіг айа сабызынаң удурлаан. Анаң сӧс поэт Геннадий Кичеевке пирілген.
Хайди таныхтаан Геннадий Владимирович, «Чаным сӧстері» аның читінҷі кибелістер чыындызы. Аны ол отысха чағын чыл пастыр. Ноғадаңар? «Чаным сӧстері» рубаилердең пӱткен. Рубаи - сидік жанр, анда полған на поэт узын сынабинча. Кӧзідімге, хакас поэттердең Михаил Кильчичаков рубаилер пасчаң, Моисей Баиновнаң Валерий Майнашев ол жанрда тоғынмааннар. Че Моисей Романович Геннадий Кичеев рубаилер пасчатханына ӧрінҷең полтыр. Чир-суғҷыбыс ол жанрда Омар Хайямның чайаачызына тӧстеніп узын тиліткен.
- Поэт кибелістерні пасха оңдайнаң хығырча. Син кибелісчі хайдағ эпитеттернең, тиңнестіріглернең тузаланчатханын сизінчезің. Минің кӧрізімнең, поэт поэттең пазарға ӱгреніп аларға оңдайлығ, - теен Геннадий Кичеев.
Тиксі алза, «Чаным сӧстері» чыындызар 300 артиинаң рубаи паза 40-ха чағын ікілік кірче. Оларны поэт презентацияа килген улусха позы хығырған:
Кӱмӱс мӧңіс сарыннарын сарнапча,
Чир-чайаан кип-азаан алыстырча.
Кізі дее ағастаң пасха нимес,
Пісті чыллар ағыны хубулдырча.
Саблығ устың тирең сағыстығ, олох туста чарых рубаилері хығырығҷыларның кӧңнін кӧдіргеннер. Минің хайиимны Г.В.Кичеевтің ікіліктері тартханнар. Олар оңдайынаң хакас сӧспектеріне тӧӧйлер:
Кӱстенгенің тикке парбас,
Чидіг позы чиде салбас.
Презентация тузында саблығ устын кибелістерін ідӧк Хакас гимназиязының ӱгренҷілері истілдіре хығырғаннар. Итсе-де, хызыҷахтар, чӱрексініп, пірее сӧстерні ундут салңаңнар, че Геннадий Владимирович кибелістерні читіре чоохтирға полыс пирҷең.
Кибелістер чыындызын пас саларға пір ниме, че аны чарыхха сығарыбызарға кирек. Чир-суғҷыбысха ахчанаң Хакасияның культура министерствозы полыс пирген. Геннадий Кичеевтің чооғынаң, кинде чарыхха сыхханында Чайаачылар туразының директоры Надежда Бурнакованың хозымы улуғ. Надежда Афанасьевна, пасчатхан улустың ӱчӱн турызып, оларға хабазар оңдай таапча. Саблығ ус Хакас книга издательствозына «хакас омалығ» кинде сығарыбысхан ӱчӱн алғызын читірген. Чыындынын полған на страницазын хакас орнаменттері чазапчалар. Аның тиражы - 300 экземпляр.
Геннадий Кичеевті наа чыындызынаң писательлер Илья Топоевнең Анатолий Султреков алғыстааннар. Олар поэтке, прай кибелістерні чыып, халын тастылығ кинде сығарыбызарға чӧп пиргеннер.
Чоохтирға кирек, Хакас тілі чылына чарыдылған пастағы мероприятие уғаа чахсы ирткен. Чайаачылар туразы Хакас тілі чылының ээзін сіліг сӧстернен хығыр килген осхас. Аннаңар пӱӱл пісті хынығ, тузалығ проекттерге пай чыл сағыпча тіп ізеніс пар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы
Хакасияда
Россияда
Тилекейде