ТУРИЗМНІ ТИЛІДЕРГЕ НИМЕ ХАРЫҒ ПОЛЧА?
04.02.2020
Хабарлар
«Тегілек стол». Хакасияның экономика тилізі министрі Николай Евдокимовтың устаанынаң Ағбанда «Минің бизнезім» кінде «Туристический рынок Хакасии через призму настроений бизнеса» «тегілек стол» ирткен. Анда пу сферада істенчеткен операторлар, идінӌектер, ассоциациялар араласханнар
Ирткен чылға теере туризмнің тилізі Хакасияның культура министерствозының хойнында полған, ӱр ниместе, тізең, ол республиканың экономика тилізі министерствозының холына пирілген. Амды пу министерство Хакасияда туризмнің тилізінең айғасча. Пу чыылығда министерствоның устағҷызы Николай Евдокимов республикада туризмні тилідер сурығны кӧдірген.
Чазыт нимес, Хакасияда туризмнің тилізі сидік парча. Аны «тегілек столның» прай даа араласчылары таныхтааннар. Ниме харығ полча пу тоғысты чахсы апарарға? Хайди чооғында таныхтаан туризм тилізі ассоциациязының кнезі, «СаяныЭкоТур» ООО-ның директоры Татьяна Егорова, Хакасияда туризмнең айғасчатхан специалисттернің устарын тилідер сурығ иң ағырсымнығ полча.
- Республикада экскурсоводтар, тілбесчілер, гидтер чидіспинче. Ағаа хоза амды тоғынчатхан специалисттернің устарын тилітчең курстар иртірілбинче, аннаңар, пістің кӧрізібіснең Хакасияның экономика тилізі министерствозына республиканың ӱгредіг паза наука министерствозынаң хада туризм отрасльында істенчеткен специалисттерге курстар иртірҷең ӧнетін программа тимнеп саларға кирек. Мындағ оңдайнаң олар, курстар иртіп, пілістерін алғыдарҷыхтар паза аттестаттар аларҷыхтар, - теен Татьяна Владимировна.
Ідӧк чыылығда чол чӧрізінің паазы пӧзік полчатханы искірілген. Хакасияда экскурсиялар аарлыға турбинчатсалар, че чайғы паза ол-пу ӱлӱкӱннер тузында самолет паза тимір чол билеттер паазы хай-хай ӧс парча. Кӧзідімге, Наа чыл ӱлӱкӱннерінде кічіг палаларның паза улуғларның билеттері 50 - 60 процентке кӧдіріл парчалар. Анзы ідӧк туристтерні Хакасиязар тартып аларға харығ полча. Республикаа, тізең, туристтерге кӧзітчең ниме пар. Кӧзідімге, Абаза экология туризмін тилідерге кӱстенче, Асхыс аймаандағы Тӧӧ пазы поселок паза Орджоникидзе аймаандағы Приисковай аал хысхызын саналығ чылҷан туризмнең айғасчалар, Шира аймаа, тізең, кӧллерінең туристтерні тартча.
Пу чыылығда туризмнең айғасчатхан операторлар, идінҷектер кӧп араласханнар, ол-пу сағыс-кӧрістерінең ӱлескеннер. Че, ачырғасха, чыылығда этнотуризм тилізі ӱзӱрілбеен. Хакасия - ол иң пастап национальнай регион. Анзынаң ол илееде субъекттердең пасхалалча. Мында туристтерге чапсых ниме-ноолар піліп паза кӧріп аларға чарир, хайзы пасха регионнарда чоғыл. Сағынчам, республикада этнотуризм хомай нимес тиліпче, тигір алтындағы азых музейлер пар. Андағ даа полза, оларның даа ол-пу сидіксіністері илееде, хайзын республика синінде ӱзӱрерге паза пӧгерге кирек.
Хайди чооғында таныхтаан Хакасияның экономика тилізі министрі Николай Евдокимов, туризмні тилідіп алар ӱчӱн, республикаа федеральнай бюджеттең ахча тартып аларға кирек. Аны тартып алар ӱчӱн, тізең, нацпроекттерде, аймах программаларда аралазарға кирек. Пу тоғысты министерствоның специалисттері апарчалар.
- Туризмні тилідер оңдайларыбыс пар. Пӱӱл майда Хакасияда тиксі Россия форумын иртірербіс. Анда Ростуризмнің паза «Сибирское соглашение» ассоциацияның специалисттері аралазары кӧрілче. Октябрьда, тізең, «Хакасия - территория компетенций» регионнар аразындағы пастағы туризм чемпионадын иртірерге пӧгінчебіс, - чарытхан Хакасияның экономика тилізі министрі Николай Евдокимов.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы
Хакасияда
Россияда
Тилекейде