ПАЗАҒЫ ХЫСХАА АМОХ ТИМНЕНЕРГЕ
11.02.2020
Хабарлар
Чыылығ. Хакасия пазы Валентин Коновалов республиканың ЖКХ объекттері хысхыны хайди иртірчеткен сурығӌа чыылығ иртірген
Чыылығда араласханнар Хакасия пазының пастағы орынҷызы Николай Миронов, орынҷызы Юрий Курлаев, республиканың пӱдіріг паза ЖКХ министрі Сергей Новиков, энергетикаҷа паза тарифтерҷе хазна комитедінің устағҷызы Манук Данданян, Ростехнадзорның паза МЧС-тың кізілері, муниципальнай пӱдістер пастары паза оларның орынҷылары.
Хайди искірген Новиков, республиканың чурт-коммунальнай хонииның объекттері олаңай режимде тоғынчалар, андағ-мындағ сидіксіністер таныхталбаан. Котельнайларға хара тас тузында тартылча, амды прай объекттерде 74 тонна топливо пилетелген, аның 45 тонназы Ағбанға килісче. Хара тас чидіспинчеткеннеңер сурығ кӧдірілбинче.
Чылығ пирҷең сетьтер сыныхтағда тудылча. Прай муниципальнай пӱдістерге постарының чылығ пирҷең сетьтерінің схемаларын 15 февральға теере, орталадып, тимнеп саларға кирек. Хысхы иртіп парир, че Пии аймаандағы Кирбі аал чӧбінің котельнайы тимненіс паспортын ам даа ал полбаан. Теестегі сыныхтағ иртірілгенде, аны андағы тоғынҷылар пазох ирт полбадылар.
Министерствозар пис айланыс кірген, оларда Ағбанның паза Харатастың чуртағҷылары квартираларда чылығ нормативке читпинчеткеннеңер искіргеннер. Андағ читпестерңе кирек тоғыс апарылған, олар табырах тӱзеділгеннер. Котельнайларзар хара тас хайдағ пааларҷа тартылчатханы сыныхталча. Аны тартчатхан предприятиелернең чӧптезіглер иділче. Пір тонна километр ӱчӱн паа 4 салковайдаң аспасха кирек. Прай республикада андағ пір паа ползын.
Февраль-мартта котельнайлардағы прай хазаннар хати сыныхталар. Ідӧк оларның нинҷе чарытхы хоратчатханнарын хызырарға кирек. Андағ пӧгіннең, тузаланысха диод лампаларын кирер планнар пар ползын.
Соох суғ паза чылығ пирҷең сетьтерде улуғ нимес 27 саай таныхталған. Оларның салтарлары табырах чох иділген. Кӧзідімге, Шира аймаандағы Жемчужнай посёлокта суғ пирҷең иргі чугун труба сайбалған. Аны ЖКХ тоғынҷылары табырах тыхтабысханнар. Андағ саайлар пасха даа муниципалитеттерде пол парчалар, сетьтер иргілен парғаннар, оларны нааҷылирға кӧп ахча хорадылар.
Муниципальнай казённай предприятиелер тӧстир сурығҷа муниципалитеттерде сидіксініс сых килген. Федеральнай кіннең, хазнадағы прай унитарнай предприятиелерні, учреждениелерні чаап, оларны идінҷектер холына пир салардаңар искіріг полған нооза. Андағ чахығны хайди толдырарға кирек?
Мында Новиковтың чооғына Хакасия пазы ара кіріскен. Хайди Коновалов таныхтаан, федеральнай кіннең пирілген чахығ ЖКХ системазына теелбинче, аннаңар казённай предприятиелер тӧстир тоғысты узарадарға кирек.
Аннаң андар Сергей Новиков муниципалитеттернің алымнарынаңар, чарғы приставтары службазынаң хада оларны чабар тоғысты тӱзімніг апарардаңар чоохтаан. Юрий Курлаев, аның чооғына хозылып, коммунальнай полызығларнаң тузаланған ӱчӱн тӧлеглерні чыырын айныда апарарға кирек теен.
Читпестер таныхталған муниципальнай пӱдістернің пастары сан пиріс тутхан соонда, Валентин Коновалов таныхтаан:
- Кирбі паза Пилтір аал чӧптері тимненіс паспорттарын ам даа ал полбадылар. Оларнаң хоза тоғыс апарыңар. Котельнайларға топливо сыбыра нормативке теере тартыл турзын. Амды кӧӧлҷе пазағы хысхаа тимненіп пастирбыс.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы
Хакасияда
Россияда
Тилекейде