ХАРАТАСТА КОРОНАВИРУС АҒЫРЫҒДАҢ ИМНИРЛЕР
24.03.2020
Хабарлар
Тоғыс чорығы. Киҷее Хакасия пазы Валентин Коновалов тоғыс чорығынаң Харатассар чӧрген. Анда ол А.И.Лебедьтің адынаң социальнай-хазых пиктеҷең кінде паза городтағы имнег туразының хирургия пӧлиинде пол килген
ПӰӰНГІ КӰНДЕ ХАКАСИЯ КӦДІРІЛГЕН ТИМНЕНІС РЕЖИМІНДЕ ЧУРТАПЧА, АНЫҢ СЫЛТАА - КОРОНАВИРУС ЧУҒЫНҶАХ АҒЫРЫҒ ТАРАПЧАТХАНЫ. ПІСТІҢ РЕСПУБЛИКАДА ПУ НАА АҒЫРЫҒА ХАПТЫРҒАН ПІР КІЗІ ІЛЕЗІНЕ СЫҒАРЫЛҒАНДА, КОРОНАВИРУСТЫ ТАРАТПАС ӰЧӰН КӦП ТОҒЫС АПАРЫЛЧА. АҒЫРЫҒА ХАПТЫРҒАННАРНАҢ ПІРЕЕ ЧИРДЕ ХАДА ПОЛҒАННАРНЫ АЛАЙ ОЛАРНЫҢ ТУҒАН-ЧАҒЫННАРЫН КАРАНТИНДЕ 14 КӰН ТУДАРЫНА ХАРАТАСТАҒЫ СОЦИАЛЬНАЙ-ХАЗЫХ ПИКТЕҶЕҢ КІННІ КӦР САЛҒАННАР. АНДАҒЫ КІЗІЛЕР АҒЫРБИНЧАТХАН ЧОНҒА САНАЛЧА, ЧЕ ОЛАР ХАЙДИ ДАА КАРАНТИНДЕ ПОЛЫП АЛАРҒА КИРЕКТЕР.
ЧЕ КОРОНАВИРУСНАҢ АҒЫРЫБЫСХАНЫНА ЧІГЛЕНІС ТЕЕ ПОЛ КИЛЗЕ, КІЗІНІ АМДЫ ХАРАТАСТАҒЫ ИМНЕГ ТУРАЗЫНДАҒЫ ХИРУРГИЯ ПӦЛИИНЗЕР ИМНИРГЕ ЧАТЫР ТУРАРЛАР. ОЛ ПӦЛІК ПУ ЧУҒЫНҶАХ АҒЫРЫҒНЫ ИМНИР ӰЧӰН ПОЗЫДЫЛЧА. ХАРАТАСТА САҒАМ КИРЕКТЕР ХАЙДИ ПАРЧАТХАНЫН ПІЛІП АЛАР ПӦГІННЕҢ КИҶЕЕ АНДАР ТОҒЫС ЧОРЫҒЫНАҢ ХАКАСИЯ ПАЗЫ ВАЛЕНТИН КОНОВАЛОВ ЧӦР КИЛГЕН.
Пастап ол городта А.И.Лебедьтің адынаң социальнай-хазых пиктеҷең кінде полған. Пу чорыхта ідӧк араласханнар республика пазының орынңызы Татьяна Курбатова, регионның хазых хайраллаҷаң министрі Владимир Костюш, істеніс паза социальнай арачыланыс министрі Ирина Ахметова, Харатастың пазы Василий Белоногов, Ӧӧркі Чӧптің депутаттары. Кіннің иркінін алтаандох, пеер килген улус пурун дезинфекция ирткен. Холны антисептикнең арығлабызып, сырайға имнег масказын кискеннер. Аалҷыларны удурлап, пу тоғысты позы сыныхтағда тутхан кін директоры Татьяна Романова.
Пу кінде ам тынанчатхан пір дее кізі чоғыл. Анда тоғынҷылар ла хайынчалар. Хайди теен Татьяна Романова, олар карантинге кирілген кізілернең тоғынарға тимделер. Кізілерні азырирға ас-тамах читкіҷе пилетелген, пір хати тузаланҷаң ідіс-хамыс, ӧнетін кип-азах прай пар. Владимир Костюштың танығларынаң, кінде кізілерге «чуртир» прай оңдайлар тӧстел парған. Мында имҷілер сыныхтаанда тудылчатхан ор хазых кізілер поларлар. Оларның иб-чуртында карантинде полар оңдай чох полза, пеер киліп, ікі неделяҷа чуртирлар. Мындағ кӧстег республикада коронавирусты таратпас ӱчӱн иділче.
Хакасия пазы тураның 4-ҷі хадылындагы кабинеттерні кӧріп алган. Хайди таныхталған, полған на кабинетте 2-3 кізі чуртир. Анда сӧбіренең дее поларлар. Кии арығлапчатхан алынҷа оборудование пар. Мында кізілер хадыллар аразынҷа удур-тӧдір ааллас чӧрбестер. Наа килген кізілерні пасхазынзар чағын кирбин тударлар. Санитарнай правилоларҷа учреждение «ап-арығ» паза «чуғынҷах» зоналарға пӧлілче.
Коронавирусты хаптырып алған пациенттерні Харатастағы имнег туразының хирургия пӧлиинзер чатырарлар. Ол амды чуғынҷах ағырығларны имнеҷең пӧлікке айландырылар. Ноғадаңар Харатастагы имнег туразын таллап алғаннар? Хайди чоохтаан Хакасияның хазых хайраллаҷаң министрі, санитарнай правилолар хоостыра алынча турчатхан имнег туразын таллап алганнар. Ол кӧп профильліг учреждение полбасха кирек. Анда компьютер томографы хайди даа пар поларға кирек, ідӧк - реанимация, анестезия, ӧкпелерге аран кии пирҷең оборудованиеліг (ИВЛ) пӧліктер. Харатастағы имнег туразы ол-пу кирексіністерге прай саринаң килістіре полтыр. Кӧрерге чӧртірлер республиканың ӧӧн, олған имнег тураларын, чуғынҷах ағырығларның имнег туразын паза пасха даа орыннарны. Ӧӧн кӧстеглерҷе пір ле тура килістіре пол парған.
Валентин Коновалов хирургия пӧлиин пос хараанаң кӧріп аларға пу имнег туразынзар чол тутхан. Че андар чиде салғанда, туразар сах андох кір полбаан. Аны кірлесте чыыл парған город чуртағҷылары сахтапчатханнар. Олар Хакасия пазын ӧрчіліг удурлабааннар. Ноға хирургия пӧлии чабылчатханын піл полбинчабыс тіп искіргеннер. Кӧп сурығ пирілген Валентин Коноваловха. Ол харатастағыларға наа чуғынҷах ағырығ хайдағ хорғыс ағылчатханнаңар, правительствоның мындағ чарадиинаңар чоохтап пирерге кӱстенген. Че чон аны истерге хынминчатхан, улам на суулап сыххан. Аалҷыларға хайди полза имнег туразынзар кірерге чол пиргеннер.
Харатастағыларға хирургия полызии Ағбанда городтың имнег туразында, республиканың ӧӧн имнег туразында пирілер. Харатаста кізілерні кӧрілген планҷа имнирін киҷеедең сығара тохтат сыхханнар. 3-ҷі хадылындағы хирургия пӧлиинде сағам имненчеткен 11 кізіні травматология пӧлиинзер кӧзірерлер. Анда тиксі 110 орын кӧріл партыр. Ам анда чуғынҷах ӧкпе ағырығларын имнеп сыхсалар, хараа-кӱнӧрте имҷі-терапевт, имҷі-педиатр тоғынарлар. Ідӧк ӧкпезін имнепчеткеннерге чӧптер пирҷең ӧнетін кін тӧстелер. Чӧптерні федеральнай клиникадағы имҷілер пир турарлар. Пу пӧлікте наа чуғынҷах ағырығдаң имниріне оңдайларны пуох неделяда тӧстеп саларға киректелчеттір.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 1 |
Кӱн таңмазы