ТИКСІ 13 КАНДИДАТ ПОЛАР ТІП САХТАЛЧА
14.07.2021
Хабарлар
Табығлар-2021. Табығ комиссиязының кнезі Александр Чуманин, хабарҷыларнаң тоғазып, Хазна Думазы депутаттарына табығларҷа табығ кампаниязы хайди парчатханынаңар чоохтап пирген
ТИКСІ 13 КАНДИДАТ ПОЛАР ТІП САХТАЛЧА
Республиканың Табығ комиссиязының устағҷызы Александр Чуманин Россияның Хазна Думазынзар табығларның пастағы чардығы тоозылғанынаңар искірген.
- 12 июльда Хазна Думазы депутаттарына табығларға пос позын сығарған кандидаттардаң айланыстығ пічіктер алӌаң тус ирт парған - чоохтаан ол.
Іди 35 № пір мандаттығ Хакас табығ округынҷа Россияның Хазна Думазының депутадына пос позын сығарған тиксі 8 кандидат пол парған:
Иванов Алексей Моисеевич, 1966 чылдаң, пӧзік ӱгредігліг, амғы туста тоғыс чох;
Кокорина Наталья Сергеевна, 1989 чылдаң, Ағбан чуртағҷызы, ибде одырчатхан ипчі;
Конгаров Денис Георгиевич, 1980 чылдаң, пӧзік ӱгредігліг, кресен-фермер хонии устағҷызы;
Куимов Михаил Владимирович, 1961чылдаң, Россия ДОСААФ-ының Хакас Республикадағы пӧлиинің кнезі;
Навроцкая Ксения Юрьевна, 1992 чылдаң, пӧзік ӱгредігліг, «Диалог Россия» АНО-ның социальнай сетьтерде тоғынҷаң специализі;
Потерайло Владимир Фёдорович, 1952 чылдаң, ортын профессиональнай ӱгредігліг, пенсионер;
Челтыгмашев Евгений Павлович, 1983 чылдаң, Асхыс поселок чуртағҷызы, пӧзік ӱгредігліг, «Инжиниринговая компания ТехноТрейн» ООО-ның стратегия тилізінҷе директоры;
Югова Лариса Валерьевна, 1970 чылдаң, пӧзік ӱгредігліг, ибде одырчатхан ипчі.
Хайди таныхтаан Александр Чуманин, пос позын сығарған кандидаттарға амды табығ счеттарын асхан соонаң табығҷыларның хол салғанын чыып аларға кирек. Полғанына ла табығҷыларның тиксі санынаң 3 %-тең (11947) ас нимес хол салғанын чыырға киректелер. Пос позын сығарған кандидаттар ол хол салған бюллетеньнерні паза пасха даа киректелчеткен пічіктерні табығ комиссияларынзар 5 августха читіре пир саларға киректер. Хол салған бюллетеньнерні наа оңдайнаң сыныхтир осхастар - ӧнетін комплекс пастыра. Ол комплекс бюллетеньнерні, хобырып, ЦИК-сар ызар, анда хол салғаны сын алай чох па компьютер полызиинаң сыныхтал турар.
- Партияларның кандидаттарынаңар чоохтаза, - таныхтаан Хакасияның Табығ комиссиязының кнезі. - Оларның тус ам даа пар.
Политическай партиялар сығарған кандидаттарға кирек пічіктерні 23 июльға теере пир саларға киректелче осхас. Оларға табығҷыларның хол салғанын чыырға киректелбинче. Александр Чуманиннің искіриинең, Россияда тиксі 15 партия съездін иртірібіскен, кандидаттарын табар пӧгіннең.
- Пӱӱнгі кӱнге пір мандаттығ округтарча кандидаттарын сығарчатхан 5 партия пілдістіг, - искірген Александр Чуманин. - Ол ЛДПР, «Единая Россия», КПРФ, «Справедливая Россия - Патриоты - За правду» паза «Родина».
Андағ оңдайнаң, 35 № пір мандаттығ Хакас табығ округынҷа тиксі 13 кандидат полары сахталчаттыр: 8 пос позын сығарған кандидат паза 5 партия сығарған кандидат. Хакасияның Табығ комиссиязының устағҷызы тиңнестіріге 5 чыл мының алнындағы Хазна Думазынзар табығларны ағылған, андада 8 ле кандидат полтыр.
Таныхтирға кирек, Россияның Хазна Думазынзар табығлар пӱӱл, пандемия сылтаанда, ідӧк ӱс кӱн иртер - 17,18 паза 19 сентябрьда.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде