МУНИЦИПАЛИТЕТТЕРГЕ НАНДЫРЫҒЛЫҒ ПОЛАРҒА КИРЕК
21.07.2021
Хабарлар
Чыылығ. Хакасияның правительство туразында национальнай проекттер хоостыра пӱдірілчеткен ӱгредіг паза культура учреждениелерінің пӱдіриине чарыдылған чыылығ ирткен
Анда Хакасия пазы Валентин Коновалов, ідӧк Асхыс, Пии, Ағбан пилтірі паза Шира аймахтарының устағ-пастаа араласхан.
Национальнай проекттер социальнай учреждениелерні пӱдірерге чахсы оңдай пирчелер. Аннаңар полған на регион андар кіріп аларға кӱстенче. Хакасияның правительствозы, тізең, национальнай проекттерде ідӧк аралазып, республиказар хоза ахча тартча. Іди олған садтары, школалар, культура туралары, фельдшер-акушер пункттары, амбулаториялар паза даа пасха социальнай учреждениелер тыхталчалар паза пӱдірілчелер, халых орыннар паза тура алнындағы чирлер иптелчелер.
Че пу тоғыстар ниик ле парбинча. Сидіксіністер сығыс ла килче. Анзы правительствода ирткен чыылығда пілдістіг пол парған. Анда араласхан муниципалитеттернің аразында Ағбан пилтірі аймаа ла пӱдіріг тоғыстарын пу кӱннерге тоозарға тӧӧй. Пасхазы 1 сентябрьға маңнанары ікінҷілестіг. Че прайзы пӱдіріг тоғыстары кӧріл парған тусха тоозыларын искірген.
Ағбан пилтірі аймаандағы Чапаев аалда 250 орыннығ школа пӱт парған. Амды анда лицензия алар тоғыс апарылча. Ағаа хоза подрядчик школаның ибіркі чирін иптепче. Хайди ізендірген Ағбан пилтірі аймаа пазы Елена Егорова, июль тоозылғанҷа ӱстӱнде адалған тоғыстар иділ парарлар, школа Піліс кӱнінде палаҷахтарға ізиин азар. Аалда пу ӱгредіг организациязын хаҷанох сахтапчалар. Амға теере іҷе-пабалар палаҷахтарын Ағбанзар тарт чӧрчелер. Наа школа тоғын сыхса, іҷе-пабаларға паза олғаннарға городсар чӧрерге кирек чох полар.
Асхыс аймаанда пӱдіріг киреенең тоғыс чахсы ла парбинча. «Ӱгредіг» нацпроект хоостыра анда 1 сентябрьға ікі объект эксплуатацияа пирілерге кирек: Пилтірде паза Асхыс поселокта. Пастағызында пӱдіріг тимге сых парған тиирге чарир, че лицензия аларынаң сидіксіністер пол парған. Пу чағында пу сурығ пӧгіл парарға кирек.
Асхыс поселокта олған садының пӱдірии 92 процентке тимде. Че муниципалитет администрациязына «Партнер» ООО подряд организациязынаң чӧптезігні тохтадарға киліскен.
- Амды піс пасха подряд организациязынаң чӧптезіг идербіс. Ол халған тоғыстарны чапчаң тоозарға молҷаан. Ізенчем, 1 сентябрьға олған садын тузаланысха кирербіс, - таныхтаан чооғында Асхыс аймаа пазының пастағы орынҷызы Евгений Костяков.
Хакасия пазы Валентин Коновалов заказчиктерге, хайзылары муниципалитет администрациялары полчалар, подряд организацияларынаң табырах тоғыс апарарға хығырған паза полған на неделяда штаб чыылиин иртірерге чахаан.
- Мин федеральнай кінде Асхыс аалға пір муң орыннығ школа пӱдірердеңер министрлернең тоғазығлар иртіргем, ізендіргем. Пӱдіріг тоғыстары тузында толдырылар тіп сӧс пиргем. Аннаңар амғы объекттерні тузында тимге сығар полбазабыс, піске паза ахчалығ хабазығ полбас. Аннаңар молҷаан сӧске турызаалар, - айланған Валентин Олегович муниципалитет пастарынзар.
Шира аймаанда пӱӱл ікі ӱгредіг организациязы тимге сых парарға кирек - Наа чир аалда школа паза Шираның Ит кӧл микрорайонында олған сады. Школа 100 процентке тимнел парған. Пір сентябрьда ол тоғын сығар. Школанаң киректер чахсы полза, Ит кӧлдегі олған садынаң сидіксіністер илееде.
- Пӱдіріг тоғыстарынаң айғасчатхан подряд организациязы, тоғызын читірс толдырбин, чіт парған. Піс прай право хайраллаҷаң паза сыныхтағлығ органнарзар, істіндегі киректер министерствозынзар айланғабыс. Че подрядчиктің сағбазы чоғыл. Аның пічіктері, серғификаттары чох піс олған садын пасха подряд организациязына пир полбаспыс, пӱдіріг тоғыстарын тоос полбаспыс паза лицензия ал полбаспыс, - искірген Шира аймаа пазының тоғызын толдырчатхан Андрей Диринг.
Валентин Коновалов пу сурығны Хакасияның прокуратура синінде пӧгерге чахаан.
Пии аймаанда ӱс объект 1 сентябрьға теере тимге сых парарға кирек. Табат аалдағы олған садында халғанҷы тимнегліг тоғыстар парча. Тӱрче полза лицензия аларлар.
Улуғ сидіксініс Новотроицкай паза Новокурск ӱгредіг организациялары пӱдіриинең.
- Пастағызында килкім тыхтағ тоғыстары иртірілген. Олар тоозыл таа парғаннар, сидіксініс чарытхы оборудованиезінде полған. Піс аны алып алғабыс, 25 июльға теере специалисттер аны турғыс саларға киректер, - таныхтаан чооғында Пии аймаа пазы Иннокентий Стряпков.
Пу школада тыхтағ тоғыстары тузында тоозылбаза, федеральнай кін тиксі республикаа паза тыхтағ тоғыстарына ахча пирбес. Аннаңар чыылығда искірген Хакасияның ӱгредіг паза наука министрі Лариса Гимазутина.
- Республикада полған на муниципалитетте пар школа алай ба олған сады, хайзында килкім тыхтағ тоғыстары кирсктелче. Че Новотроицкайдағы школада тыхтағ тоғызы тузында тоозылбаза, прай республикаа теел парар, - теен Лариса Николаевна.
Хакасия пазы Валентин Коновалов аймах устағҷызына, ӱгредіг управлениезіне тыхтағ тоғыстарын хатығ хайығда тударға чахаан.
- Кирек полза, чуртаңар, узуңар, хоныңар ол объектте. Че 25 июльға теере кирек тоғыстарны тоозыңар. Пу пӱдіріг ӱчӱн сірер, Иннокентий Николаевич, нандырығлығзар! - хатығ чоохтанған ол.
Новокурскта олған сады пӱдірілче. Марығда чиңіс тутхан подряд организациязының устағҷызы, коронавируснаң ағырыбызып, Хызылчардаң сых полбинча. Аннаңар пӱдіріг пір орында турча. Ағаа административнай кирек азылған, че амох пілдістіг, аның олған садының пӱдіриин пастир кӧңні дее чоғыл. Аннаңар заказчик подрядчикнең чӧптезігні тохтадарға сағынча.
- Хакасияда пӱдірілчеткен ӱгредіг объекттері 1 сентябрьға пӱдіріл парарлар даа, че Новокурсктағы олған садын пӱӱл хатап пӱдір полбин халғадағбыс. Піс аны ікі чыл азыра пӱдір полбин ирееленчебіс. Хайди искірген федеральнай кін, олған садын пӱдір полбазабыс, олар ахчаны нандыра алып аларлар, - таныхтаан Лариса Гимазутина.
Ӱгредіг организацияларынаң пасха, чыылығда ідӧк «Культура» национальнай проект хоостыра тыхталчатхан культура учреждениелері ӱзӱрілгеннер. Олардаңар Хакасияның культура министрі Светлана Окольникова искірген.
- Культура учреждениелерінде тыхтағ тоғыстарын піс тузында тоозарбыс - 1 ноябрьда. Че сидіксініс пасха сурығда. Хайди ілезіне сыххан культура учреждениелерін иптепчеткен подряд организациялары тыхтағ тоғыстарын салбыр толдырчалар. Кӧзідімге, Боград аймаандағы Знаменка аалдағы клуб. Аны нааҷылирына 7 миллион салковай артиинаң позыдылған. Аалдағы клубха ахча асхынах нимес, че тоғынҷылар сантехника системазың ізіктерні, кӧзенектерні иптіг турғыспинчалар. Ікінҷілес чоғыл, нинҷе-де тус пазынаң олар хыйын парыбызарлар. Аннаңар мындағ подрядчиктернең анымҷохтазарға кирек, - чооғында таныхтаан Светлана Анатольевна.
Халғанҷызында Валентин Коновалов муниципалитет пастарын нандырығлығ поларға, подрядчиктерні сыбыра сыныхтирға, кирек полза, чӧптезіглерні тохтадып, пасха подряд организацияларынаң тоғынарға чахаан, сидіксіністер сығыс килзе, республика правительствозынзар айланарға хығырған.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде