ОПЫТНАҢ АЛЫСХАННАР, ЧӦПТЕРНЕҢ ӰЛЕСКЕННЕР
17.11.2021
Хабарлар
Тоғыс чорығы. Хакасияның істеніс паза социальнай арачыланыс министрі Владимир Чебодаев тоғыс чорығынаң Тувада пол килген
Тувада тоғыс чорығы тузында республиканың істеніс паза социальнай арачыланыс министрі Владимир Чебодаев регион пазы Владислав Ховалыгнаң тоғасхан. Ол ағаа Тува пазына табылғанынаң Хакасия пазы Валентин Коноваловтың алғыстас сӧстерін паза танығлығ сыйых читір пирген.
- Тува пазы тоғазығда регионның алнындағы тилізінеңер чоохтаан. Ідӧк республикада наа туралар пӱдірерінҷе, регионзар чиит специалисттерні тоғысха тартар кӧстегнең ӱгретчілернің паза имчілернің чал ахчазын кӧдірерінче сурығлар кӧрілчелер. Мин республика пазына кӧрілген планнар маңнаныстығ толдырылзыннар, регионның чуртас-экономика тилізінде ӧзіс ползын тіп алғаам, - чоохтаан Владимир Чебодаев.
Ідӧк Туваның істеніс паза социальнай политика министрі Эдуард Санданнаң тоғазығ иртірілген. Анда олар, министерство тоғызынңа сурығларны ӱзӱріп, Хакасияда паза Тувада хайди тоғыс апарылчатханнаңар чоох апарғаннар. Пу кӱндегі иң ӧӧн сурығларға теелгеннер - 3 - 7 частығ палаларға пособиелер тӧлеглері паза социальнай контрактты чуртасха кирері.
- Ведомстволарның паза оларзар кірчеткен учреждениелернің тоғызы опыдынаң алысхабыс, кӧзідімге, чонға социальнай полызығ пирҷең управлениелернің чуртағҷыларға тоғыс тапчаң кіннернің психоневрология паза олған интернаттарының опыттарынаң Істеніс министерствозы кӧп сурығнаң айғасча, ол санда пала ахчазы тӧлеглерінең чонға тоғыс табар сурығнаң кӧп палалығ сӧбірелерге паза кинектерге льготалар пирерінең. Санапчам, піди опытнаң Хакасияда ла нимес, че ідӧк пасха регионнарнаң алысчатханы тоғызыбыстың уғаа кирек чардығы полча, - таныхтаан істеніс паза социальнай арачыланыс министрі Владимир Чебодаев.
Министр позы ӱгренген Тувадағы хазна университедінде пол килген. Ол пу университетті 2002 чылда тоосхан. Ол анда ректор, философия наукаларының кандидады, профессор Ольга Хомушкунаң тоғасхан. Паза министр естественно-географическай факультеттегі студенттернең тоғазығны иртірген. Владимир Петрович, позының студент чылларын сағысха киріп, ӱгренізіндегі полған хынығ киректердеңер чоохтаан. Чоннарның ынархазынаңар паза пірге тудынарынаңар таныхтаан. Паза пір чапсых тоғазығ полған, министр пір группада хада ӱгренген нанҷызынаң тоғазып алған - республиканың ат спорты федерациязы кнезі Таймир Сарыгларнаң.
Владимир Чебодаев стационарнай учреждениелер тоғызынаң танысхан. Андағ учреждениелерде сидіксіністер удаа сығызадыр, улам на амғы коронавирус тымозы тузында. Тувада социальнай олған кіннері улуғ кирексініснең тузаланчалар. Палаларнаң психологтар паза ӱгретчілер тоғынчалар, ідӧк кӱнӧрте кинек олғаннарға реабилитация иртірілче.
- Тувада чонға тоғыс тапчаң кіннің нааҷылал парған туразын кӧріп алғам. Анда «Тӱзімніг тоғынары паза чонға тоғыс табары» нацпроектче тыхтағ тоғыстары иртірілген, ам ол федеральнай стандарттарча толдырылған. Ағбандағы чонға тоғыс тапчаң кінде 2023 чылда ідӧк тыхтағ тоғыстары иділер. Наа оңдайнаң иптелген тураларда «Тоғыс Россияда» хазна порталының логотиптері пар, тоғынҷыларның кип-азаанда - фирма тании, чонға полызығ пиріп тоғынарына истіг оңдайлар тӧстелген.
Мин тиксі тоғыс чорығына чӧпсінчем. Тувадағыларға постарынзар хығырған ӱчӱн, піске хайығ айландырған ӱчӱн алғызым читірчем. Паза піссер ааллап килерлерін хайди даа сахтирбыс, - сағызынаң ӱлескен министр.
Автор :
Юлия ШУШАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде