ХАЗНАНЫҢ ИЛБЕК ДИРИЖЁРЫНА ЧАРЫДЫЛЧА
20.01.2022
Хабарлар
Пресс-конференция. Хакасияның культура министрі Светлана Окольникова паза республиканың филармония директоры Вячеслав Инкижеков «Хакасия» газетаның конференц-залында хабарҷыларға пресс-конференция иртіргеннер
Тоғазығның ӧӧн сурии хомзыныстығ, че олох туста поғдархастығ полған. 10 - 30 январьда Россияның городтарында паза хырығ озариндағы хазналарда (прай 40 азыра город) В.М.Халиловтың адынаң чоннар аразындағы музыка фестивальы ікінӌі хати иртірілче. Ол чааӌылар оркестрінің ӧӧн дирижёры, Россияның чон артизі, генерал-лейтенант Валерий Михайлович Халиловтың 70 чазына чарыдылча. Хакасия пу фестивальға ідӧк хозылча. Пӱӱнгі кӱнде илбек дирижёрның адынаң фестивальлар Севастопольда, Тамбовта, Хабаровскта паза Сахалинде иртчелер. Иң алғым «Спасская башня» фестиваль Москвада иртче. Аны Валерий Халилов позы, сағын таап, чуртасха кирген, пастағы кӧг устағӌызы олох полған. Фестивальда чааӌылар паза олаңай ӧмелер, симфоническай паза ӱбӱрӌең оркестрлер, ансамбльлар паза ырӌылар араласчалар.
Сағысха киріп, Валерий Михайлович городтарның ӧӧн площадьтарында муңар ӱбӱрӌең кӧг тирігліг оркестрлернең паза хорларнаң устаӌаң. Ол Россия Федерациязының арачыланыс министерствозының ӧӧн оркестрінең хазнаның прай пулуңнарынӌа чӧрген. Аны прай чирде чылығ удурлаӌаңнар. Ідӧк Австриязар, Швециязар, США-зар, Венгриязар, Германиязар, Польшазар, Финляндиязар, Франциязар, Швейцариязар, Бельгиязар, Хыдат паза Моол чирлерінзер читкеннер.
Валерий Михайлович Халилов 2016 чылда 25 декабрьда Сочи алтында авиакатастрофада саайлан парған. Андада ол позы устапчатхан А.В.Александровтың адынаң Россия армиязының теелбек паза сарын ансамбльынаң Сириязар учух париған. Аннаң хада 91 кізі ӱреен, ол санда 64 артист, ідӧк СМИ тоғынӌылары полғаннар. Валерий Халиловтың ипчізі, ікі хызы паза пархалары халғаннар.
Илбек дирижёр пістің республиканаң хайдағ палғалыс тутханын, концерттер турғысханын паза хайдағ проекттер тимнирге пӧгінгенін Хакасияның культура министрі Светлана Анатольевна пресс-конференцияда чоохтап пирген:
- Валерий Халиловнаң чайаачы тоғыснаң на палғалыстығ полбаабыс. Ол ідӧк минің чахсы нанҷым полған. Мин ам даа аның сӧбірезінең ынағласчам. Валерий Халилов ах чарыхтаң парыбысханы - хазнаа улуғ чідіріг.
Мині Валерий Михайловичнең Антон Губанков таныстыр салған. Ол Санкт-Петербургтың культура министрі полған. Соонаң Россияның арачыланыс министерствозының культура департаментін тӧстеен. Ачырғасха, хорғыстығ саайда нанҷылар хада полғаннар.
Пӱӱн мин поғдархаснаң чоохтапчам, Россияның арачыланыс министерствозы хада тоғынардаңар чӧптезігні регионнар аразында иң пурнада Хакас Республиканаң иткен. Ӱр дее полбаанда, Валерий Михайлович ӧмезінең піссер концерт ағылған. Аннаң сығара Хакасия паза Россияның арачыланыс министерствозының ӧӧн чааҷы оркестрі пик ынағлас сыхханнар. Чыл сай 9 Майға чааҷыларның иң чахсы чайаачы ӧмелері пістің республиказар кил турҷаңнар.
Валерий Михайлович ӧмезінең хада республикада концерттер кӧзіткен. Олар Пии паза Асхыс аймахтарына читкеннер, Саяногорскта полғаннар. Чуртағҷылар оркестрнең хада сарнахаңнар, сомға суурынҷаңнар.
Хомзынысха, ол республиканың алтынзархы аймахтарынзар - Шира паза Орджоникидзе чирлерінзер - читпеен. Итсе, пістің улуғ пӧгіннер полған. Валерий Халилов сынап уғаа илбек кізі полған. Піс аннаң хада кӧп проект чуртасха кирібізерҷікпіс. Ол прайзынаң паарсаснаң паза улуғласнаң чоохтасчаң.
Мині ол позының репетицияларына хығырған. Аны кӧрерге ӧнетін учуххам. Ол артисттері хайди азыранчатханын, концерттерге тимненчеткенін кӧзіткен. Валерий Михайлович прай нимені хайығда тутчаң. Ӧмезі хаҷан даа тох ползын, чуртапчатхан общежитиелері истіг ползын тіп кӧрҷең.
Пістің филармониядағы музыканттарға ол тузалығ чӧптер пиріп, чӱректерінде тирең іс артысхан. В.М.Халиловтың адынаң чоннар аразындағы музыка фестивальына чарыдылған «Хаӌан даа илбек хазна» концерт (6+) В.Г.Чаптыковтың адынаң республиканың филармониязында 22 январьда иртер. Оркестрнең дирижер Сергей Бурмаков устир, сарыннарны республиканың ырӌылары Артур Марлужоков, Ольга Васильева, Даниил Тарасов, Олег Гриценко, Наталья Фоменко, Мария Сиротенко толдырарлар. Кӧӧн Валерий Халилов пасхан «Армия и флот», «Служу Отечеству» паза «Навсегда великая страна» сарыннарны концертте кӧрігӌілер ідӧк истіп аларлар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде