ИЛБЕК ЧИҢІСТІҢ 80 ЧЫЛЫНА - НААҶЫЛАЛҒАН ПАРК
01.07.2022
Хабарлар
Хакасия пазы Валентин КОНОВАЛОВНАҢ Ағбанның пазы Алексей ЛЁМИН
Презентация. Ағбан городтың устағ-пастаанда Чиңіс паркын иптиріне чарыдылған чыылығ ирткен
Ағбанда Чиңіс паркын иптир проекттің презентациязында Хакасия пазы Валентин Коновалов, Ағбан городтың пазы Алексей Лёмин, республиканың пӱдіріг паза ЖКХ министерствозының тоғынӌылары паза халых организацияларының кізілері араласханнар.
- Пӱӱл часхызын Чиңіс пайрамын таныхтирын хайығда тутчаң комитетте Илбек Чиңістің 80 чылына толдырылар тоғыстарның планын тимнирдеңер чарадығ алылған. Ӧӧн пӧгіннернің пірсі - Чиңіс паркын иптирі паза аны тиксі нааҷылиры. Сілкер айында Хакасияның правительствозы, Ағбанның устағ-пастаа паза проектировщиктер, Чиңіс паркында пол киліп, аны хайди нааҷылирынаңар чӧптер тимнееннер, - презентацияны пастаан Ағбан пазы Алексей Лёмин.
Хакасия пазы Валентин Коновалов таныхтаан:
- Ағбанға паза Хакасияа Чиңіс паркы танығлығ орын полча, аннаңар піс пу сурығнаң хада-пірге тоғынарбыс, ахчаны даа хада пирербіс, хазна программазына кіріп аларға кӱстенербіс. Пӧгін - Илбек Чиңістің 80 чылына удур Чиңіс паркын иптебізері, ол амғы тусха килістіре, турыс тығ полар, Илбек Ада чаа ара-ласчыларына аарлас паза улуғлас кӧрінер ӱчӱн. Пӧгін уғаа улуғ. Парк-ка ахча республика даа, город таа бюджеттерінең позыдылған. Марығ иртіріліп, парктың проектін тимнир организация табылған. Проектті чарадыға алыбызып, тыхтағ тоғыстарын пастирға кирек.
Паркты нааӌылир проектті «Терра» ООО тимнебіскен. Аның архитекторы Геннадий Ботнарь проектті тимнепчеткенде, Москвадағы паза Волгоградтағы парктарның кӧрімнері санға алылған. Москва алтындағы «Патриот» паркты кӧрзе, анда ӧӧн аллеялар, галереялар, кӧзідігліг павильоннар, тигіриб пар. Чиңіс паркын иптирінде пу оңдайлар санға алылар.
Парксар кірер ӧӧн орын Иван Ярыгиннің орамазы саринаң, ідӧк Советскай паза Чертыгашевтің орамаларынаң кірӌең орыннар полар. Композиция планы хоостыра Иван Ярыгиннің орамазынаң пасталчатхан аллеяа хоза ікі улуғ нимес аллея тӧстирі кӧрілче. Ленин Комсомолының орамазы индіре интерактивнай искірігліг павильон орнығар. Советскай орамадаң Чертыгашевтің орамазына теере Хумартхылас аллеязын тӧстирі пӧгінде турча. Анда ӧӧн чаалазығлардаңар, матыр-городтардаңар, чааӌылардаңар, тыл істенӌілерінеңер паза чаадаңар пасха даа искірігліг стендтер, хумартхы тастар турғызылар.
Парктың пулиинда, Иван Ярыгиннің паза Советскай орамалар хыйысчатхан орында, улуғ нимес часовня пӱдірілер. Олған площадказы Чертыгашевтің орамазы саринзар кӧмес чылдырыл парар. Аннаң хости тасхын чӧрӌең орын пӱдірілер. Паркта ӧсчеткен ағастарның кӧбізін артыс саларлар. Хай пірее орыннарда хорбылар одыртылар. Оларны суғлир ӧнетін система пӱдірілер.
Презентацияда ідӧк Хакасияның чаа ветераннарының халых организациязының кнезі Галина Трошкина араласхан.
- Пу сурығнаң Ағбанның устағ-пастаа, город пазы паза правительство айғас сыхханнарына чӧпсінчебіс. Илбек Ада чаанаң палғалыстығ искіріглернең танызар кін тӧстелгені чонны патриот ӱгредиине тартар. Мында піс Чиңіс паркынзар ниме кир саларынаңар сағынарға кирекпіс. Пісті Совет Союзы Матырларына чарыдылған хумартхы тас сағыссыратча. Оларның фамилиялары кӧріндіре поларға кирек. Пӱӱн піске ниме кӧзіділгенінең чарасчабыс, - теен Галина Алексеевна.
Чиңіс паркын нааӌылир тоғыс пӱӱл пасталар. Амғы тусха тыхтағ тоғыстарының проекті кӧрілче, ағаа тӱзедіглер кирілче.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы