Училище студенттернi сағыпча
03.08.2022
Хабарлар
Абитуриент-2022. Профессиональнай ӱгредіг учреждениелерiнде специальность алып аларға сағынчатхан чииттернiң пiчiктерi 15 августха теере алылчалар
Ол санда Таштыптағы 16№ училищезер. Анда школа тоосхан оол-хыстарға аймах-пасха кӧстеглерҷе ӱгренiп аларға чарир: «В», «С» категориялығ водительлерге, котельнай машинизiне, трактористке («В», «С», «Е» категориялар), кип-азах пысчаң, тiкчең, ас-тамах пызырҷаң устарға, малярға, штукатурға, садығҷаа, пӱдiрiг киреендегi устарға, бульдозер, экскаватор машинисттерiне паза даа пасхазына.
Хакасияның наука паза ӱгредiг министерствозы пӱӱл пу учреждениее тикке ӱгренҷең орын кӧп пирбедi: 15 орын штукатурларға, 20 – аал хонии специальностьтарына.
Наа ӱгредiг чылына тимненiп, Таштыптағы профессиональнай училище общежитиезiнiң пастағы хадылында алғым тыхтағ тоғыстары апарылча, душ пӧлии иптелче. Ӱгредiг корпузын, тiзең, пылтыр нааҷылааннар, аннаңар анда студенттернi удурлирына прай ниме тимде.
Кинек алай хазии уйан кiзiлерге училищеде iкi специальностьча ӱгренiп аларға чарир: ӧзiмнернең айғасчатхан тоғынҷаа паза кип-азах тiкчең тирiгнiң операторына.
Пасха аал-аймахтардаң килгеннерге общежитиеде орыннар хайди даа пирiлче. Училищеде студенттернi iдӧк iзiг чииснең азырапчалар паза стипендия тӧлепчелер.
Ӱгредiг заведениезiнiң устағ-пастаа, ӱгретчiлерi диплом алып алған чииттернiң мыннаң мындархы ӱлӱзiн тӧремiл хайығда тутчалар. Олар тоғыс тапханнар алай чох, нименең айғасчалар тiп кӧрчелер.
Таныхтирға кирек, Таштыптағы 16 № училищенiң ӱгретчiлерi устарын тӧремiл тилiтчелер. Паза олар студенттерiнең хада аймах, республика, хазна, тилекей дее синiндегi марығларда араласчалар. Олар чиңiсчiлер санына кiрчеткенi специальность пирчеткен улустың пӧзiк узының киречiзi полча нооза.
Тиксi чоохтаза, республикада профессиональнай ӱгредіг пирчеткен 19 пірігіс тоғынча. Оларда 20 тоғысчы профессия паза 33 специальность алып аларға чарир. Хакасияның ӱгредiг паза наука министерствозының искiриинең, пӱӱл профессиональнай ӱгредiге 2 муң 395 бюджет орны пирілче. Оларның кӧбізі, 445 орын, пӱдіріг профессияларына кӧріл парған, 320 бюджет орны туризм ӱгредиине пирілген.
Профессиональнай ӱгредіг учреждениелерiнде специальность алып аларға сағынчатхан чииттернiң пiчiктерi 15 августха теере алылчалар. Че пос орыннар халза, комиссия 25 августха теере тоғынар.
Автор :
Тарина Бутонаева
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде