ЧОННЫҢ АМЫР ЧУРТАЗЫН ХАЙРАЛЛАПЧАЛАР
15.11.2016
Хабарлар
ХАЙДАҒ ДАА ТУСТА ПОЛИЦИЯ ТОҒЫНӋЫЛАРЫ ЧОННЫҢ АМЫР ЧУРТАЗЫН ХАЙРАЛЛАПЧАЛАР. САЙБАҒӋЫЛАРДАҢ ТОҒЫР КӰРЕЗІП, ОЛАР СИДІК САЙБАҒЛАРНЫ ІЛЕЗІНЕ СЫҒАРЧАЛАР. ИРТКЕН НЕДЕЛЯДА АҒБАНДА ПОЛИЦИЯ ТОҒЫНӋЫЗЫ КӰНІНЕ ЧАРЫДЫЛҒАН МЕРОПРИЯТИЕ ИРТКЕН.
С.П. Кадышевтің адынаң культура кінінде прай Хакасиядаң полицейскайлар чыылысханнар. Ӱлӱкӱн пасталғанда, сценазар істіндегі киректер министерствозының знамязы сығарылған, Россия гимнін ӱбӱрӌең оркестр толдырған.
Иң пастағызын полиция тоғынӌыларын Хакасияӌа МВД министрі Илья Ольховский алғыстаан. Илья Ивановичтің чооғынаң, істіндегі киректер органнары, чонның амыр чуртазы ӱчӱн, кӧп пӧгіннер толдырчалар. Пӱӱл МВД-зар наркотиктер айланызын сыныхтағда тутчатхан пӧліктер паза миграция службазы кіргеннер.
Терроризмнең паза коррупциядаң, наркотиктер тарадарынаң паза пасха даа сайбағлардаң тоғыр кӱрезері полиция тоғынҷызынаң профессионализм, позының чуртазына айабин, тоғызын толдырарға кирексіпче. Профессиональней ӱлӱкӱнде дее полиция тоғынҷылары Алтынзархы Кавказта чонның амыр чуртазын хадарчалар. Чооғын тоозып, министр полиция тоғынӌыларын паза ветераннарын алғыстаан.
Анаң Хакасияның пазы Виктор Зимин чоох тутхан.
- Прай чӱреемнең МВД тоғынӌыларын паза ветераннарын алғыстапчам, чооғын пастаан Виктор Михайлович. - Сірер, постарыңа айабин, хазна законын паза амырын хадарчазар. Сидік туста сірер кізілерге полызарға маңзырапчазар. Сірернің тоғызыңар пӧзік паалалча. Таныхтирға сағынчам, чылдаң чылға пістің республикада сайбағлар хызырылча, сайбағларны ілезіне сығарары ӧсче. Пістің республикада бандитизм паза кізілерні оғырлааны сығыспинча. Анзы чахсы тоғыстың салтары полча. Хакасияның полицейскайлары аар сайбағларны ілезіне сығарарынҷа Сибирьдегі федеральнай округта 7-ӌі орында паза Россияда 10 иң артых регионнар санына кірче. Аннаңар Хакасия иң амыр регионнар санында саналча. Улуғ алғыс сірерге, арғыстар. Прай чӱреемнең сірерге, туғаннарыңа часка, хазых алғапчам.
Чооғын тоозып, Виктор Зимин МВД тоғынҷыларына Аарластығ паза алғыстас пічіктерін читірген. Алғыстас пічиин алғаннарның санында полицияның капитаны Алексей Ачитаев полған. Ол, хорғыс чох чол чӧрізінӌе улуғ хазна инспекторы полып, Хакасия МВД-зының ГИБДД-зында тоғынча.
- Пу должностьта мин 2010 чылдаң сығара тоғынчам, - чоохтапча Алексей Артурович. -Тоғызымны ДПС инспекторы полып пастаам. Пістің тоғызыбысты хынығ паза сидік тіп паалирҷыхпын. Амғы туста водитель удостоверениезін аларға сағынчатханнарны сыныхтапчам. Чолларда аймах-пасха водительлер тоғасча. Удостоверением наа ла алған водительлер амыр чӧрчелер, правилоларны сайбабасха кӱстенчелер. Автошколалар водительлерні пӧзік синде ӱгретчелер. Аннаңар Хакасияда водительлер чахсы чӧрчелер. Чол чӧрізі правилолары сайбалбаза, чахсы поларӌых. Че іди хаӌан даа полбас. Ӱлӱкӱнде хада тоғынчатханнарыма, ветераннарға хазых, амыр чуртас алғапчам.
Пайрамда істіндегі киректер органнарының 300-че тоғынҷызы Аарластығ паза алғыстас пічіктерінең, наа званиелернең паза медальларнаң сыйыхтатхан.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде