«ОШ - АҒБАН» - ТАНЫҒЛЫҒ ЧОРЫХ
29.11.2016
Хабарлар
Ирткен пятницада, 25 ноябрьда, 15.00 часта «Ағбан» чоннар аразындағы аэропорта «Ош-Ағбан» рейстің самолёды одырыбысхан.
Хырғыс чиріне дее, Хакасияа даа пу пастағы танығлығ чорых. Алында пу рейс хаҷан даа полбаан. Ош город Киргизияда Узбекистанның паза Таджикистанның хырығларына чағын орныхчатханнаңар, пу хазналар чуртағӌылары аразында ол рейс улуғ кирексініснең тузаланча. Боинг-737 самолётта 122 пассажирге орын кӧріл парған. Пастағы чорыхта самолётта пос орын халбиндыр.
«Ош - Ағбан» рейстің пассажирлері санында полған «Эйр Кыргызстан» ОАО авиакомпанияның Сибирьдегі федеральнай округтағы ӧӧн кізізі Андрей Гордеев. Аның искіриинең, авиакомпания пу рейске билетті 5900 салковайға сатча, ағаа хоза, Хызылчарның «Емельяново» аэропортына теере тикке трансферт пар. Чоохтирға кирек, Хызылчардаң Ошсар самолёт парох, че аның паазы сала аарлығ полтыр. Наа чыл алнында Ошсар ӱс рейс толдырылары кӧрілче. Самолёттар пятница сай учуғарлар.
Наа чыл соонаң майға теере Хырғыс чирінзер рейстер толдырылбас. Майдаң пасти чайғы тооза пазох «Ағбан - Бишкек» рейс тоғынар.
Ідӧк пу рейснең учух килгеннер «Манас» аэропорттың кізілері: Алиа Курбанова паза Элеонора Болоталиева. Чиит хыстарның чооғынаң, Ошта Ағбандағы осхас кӱн турча. Тасхар -8 С°, хар чаапча. Итсе, Ош Хырғыс чирінің ӱстӱнзархы саринда орныхча. Чоохтирға кирек, Оштағы аэропорт Бишкектегі «Манас» аэропорттың пӧлии полча.
Ол туста аэровокзалда учух килген кізілерні туған-чағыннары сағааннар. Самолёт одырыбысхан соонаң пассажирлер хырығ паза таможня сыныхтаан иртібіскенде ле удурлапчатханнарзар сыхханнар. Учух килгеннер аразында чииттер дее, улуғлар даа полғаннар, ідӧк палалар пар полған. Касса алнында, тізең, иирде Ошсар учуғарға сағынчатханнар билеттер алчатханнар. Оларның аразында Нахыза Кадырова палалары Бибизахронаң паза Алиханнаң полған. Ипчі сӧбірезінең хада Хакасияда 15 чыл азыра чуртап парир. Наа рейс полызиинаң чир-суунзар учухча. Позы ол Узбекистаннаң полтыр. Чир-суунзар тӧреміл чӧрчеттірлер, ӧӧнінде «Хызылчар - Ош» рейснең учухчаң полтырлар. «Ағбан - Ош» рейс азылғаны ипчіні ӧріндірче.
«Ағбан» аэропорттың ӧӧн директорының тилісче орынӌызы Виталий Нестеренконың чооғынаң, пӱӱнгі кӱнде аэропортта пасха хан чирлерінзер ӱс рейс толдырылча: Ошсар, Хыдатсар паза Вьетнамзар. Оларның санын ӧскірерге итсе, аэропортта пассажирлернің хырығ сыныхтаан иртчең кабиналар санын писке теере хозарға кирек. Аэропорт позының алнында пӧгін турғысча - Турциязар рейс азарға. Паза пip сурығ, хайзы билеттер паазына теелче - самолёттарны аэропортта турғызар тусты хызырары. Нинӌе ӱр самолёт аэропортта турча, билет паазы ідӧк аарлығ полча. Аннаңар ол тусты хызырарын пӧгерге кирек, андада паалар даа сала ниик полар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде