ӦӦН СЫБЫ ӦРІНІС АҒЫЛДЫ
27.12.2016
Хабарлар
Ағбанда 23 декабрьда Пастағы май площадьында республиканың ӧӧн сыбызы азылған.
Ӧӧн сыбы ӱлӱкӱні 17.30 час иирде пасталған. Хакас драма паза «Читіген» театрларның артисттері чуртағҷыларға «Машанаң паза аның нанҷыларынаң хада Наа чыл удурлирға» кӧзідіг тимнеп салғаннар. Соох апсах, Хар хызыҷах паза нымахтағы матырлар, Обезьянанаң анымҷохтазып, Питукты удурлааннар.
Андох Пастағы май площадьында чааҷылар чуртағҷыларға ізіг гречка кашазын паза чейні читіргеннер.
Анаң сценазар чуртағӌыларны Наа чылнаң алғыстирға Хазна Думазының депутады Надежда Максимова паза Хакасия пазы Виктор Зимин сыхханнар.
- Аарлығ нанҷылар, чыл аар даа полған полза, піс кӧп чахсы киректер иткебіс: сӧбірелер, квартиралар алып, тура тойын таныхтааннар; кӧп палалығ сӧбірелер автомобильлер алғаннар; улуғ имнег объекттері паза наа музей азылған; аалларда культура туралары, ФАП-тар, школалар, олған садтары пӱдірілген. Піс прайзы хада-пірге тудынып, ол улуғ тоғыстарны толдырып алғабыс! Прайзын Наа чылнаң! - алғыстаан Надежда Максимова.
Анаң алғыстас сӧстеріне регион пазы Виктор Зимин хозылған:
- Пӱӱн мин прайзын алғыстапчам. Ticпен тоғыстарың паза сыдамах хылыхтарың ӱчӱн алғыс. Піс тилекейнің иң чахсы хазназында чуртапчабыс, пістің устағӌыбыс тилекейде иң артых! Піс хазнабыстың иң чахсы регионында чуртапчабыс, аның ады - Хакасия. Мин прайзына хазых, часка, хыныс алғапчам!
Анаң тигірде чарых салют атыл сыххан.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде