ХАКАСИЯНЫҢ ИҢ ЧАХСЫ ИДІНҶЕКТЕРІН ЧЕЕСТЕЕННЕР
29.03.2017
Хабарлар
ХАКАСИЯНЫҢ ПАЗЫ ВИКТОР ЗИМИН ПРАВИТЕЛЬСТВО ТУРАЗЫНДА 23 ДЕКАБРЬДА «ХАКАСИЯНЫҢ ИҢ ЧАХСЫ 100 ТОВАРЫ» ТИКСІ РОССИЯДАҒЫ КӦЗІДІГНІҢ ЛАУРЕАТТАРЫНА ПАЗА ДИПЛОМАНТТАРЫНА СЫЙЫХТАР ЧИТІРІП, ОЛАРНЫ АЛҒЫСТААН. 2016 ЧЫЛДА ИРТКЕН КӦЗІДІГ-МАРЫҒДА ПІСТІҢ РЕСПУБЛИКА, 19-ҷы ЧЫЛЫ АРАЛАЗЫП, ИҢ КӦП ЧИҢІСЧІЛІГ ПАЗА АРАЛАСЧЫЛЫҒ РЕГИОННАР САНЫНА КІРІП АЛҒАН.
ХАКАСИЯНЫҢ ПАЗЫ ИДІНҶЕКТЕРНІ ТОҒЫСТАРЫ, ПӦЗІК КАЧЕСТВОЛЫҒ НИМЕ-НОО СЫҒАРЧАТХАННАРЫ ПАЗА ЧОНҒА ПОЛЫЗЫҒЛАР ПИРЧЕТКЕННЕРІ ӰЧӰН АЛҒЫСТААН.
- ИРТКЕН ЧЫЛДА «ХАКАСИЯНЫҢ ИҢ ЧАХСЫ 100 ТОВАРЫ» МАРЫҒДА 33 ПРЕДПРИЯТИЕ АРАЛАСХАН. ОЛАРНЫҢ 16-зы ПІСТІҢ РЕСПУБЛИКАНЫ ФЕДЕРАЛЬНАЙ СИНДЕ ТУРЫСТЫҒ КӦЗІТКЕН. САЛТАРЛАР ХООСТЫРА ХАКАСИЯНЫҢ 6 ПРЕДПРИЯТИЕЗІ ИҢ ПӦЗІК ПААЛАҒ АЛҒАН ПАЗА 10 ПРЕДПРИЯТИЕ СЫЙЫХТЫҒ ОРЫНҒА ТУРЫСХАН.
Республикада сығарылчатхан ниме-ноолар пасха даа регионнарның садығ тураларында садылчатханы ӧріндірче. Піс хазнадағы ниме-ноо сығарызында паза чонға полызығ пирерінде турыстығ орында турчабыс, пасха регионнардағыларға турыстығ конкурент полчабыс.
Пӧзік качестволығ, хорғыс ағылбинчатхан ниме-ноо сығарчатханнарың паза полызығ пирчеткеннерің ӱчӱн сірерге улуғ алғыс! Сірер республиканың адын кӧдірчезер паза чонға тоғыс пирчезер. Пӱӱл иртер кӧзідіг-марығда Хакасияның ниме-ноо сығарчатхан паза чонға полызығ пирчеткен предприятиелері хайди даа пӧзік синде поларлар тіп сағынчам, - теен Виктор Зимин.
Ирткен чылда «Россияның иң чахсы 100 товары» кӧзідіг-марығда 6 предприятие лауреат полыбысхан: истең аймах ниме-ноолар итчеткен идінҷек Ефросинья Сагалакова, «Стальконструкция» ЗАО, «Саянмолоко» ООО, «Сибирская тайга» мастерской, романовскай порода хойлар ӧскірчеткен «Вива-Лаб» ООО, «Гражданпроект» ООО.
«Россияның иң чахсы 100 товары» кӧзідіг-марығның федеральнай чардығының дипломанттарының санындалар «ЕлИСей» ООО, ыстаан ас-тамах сығарчатхан идінҷек Александр Зубарев, «Курорт озера Шира» ОАО. Марығның региондағы чардығының чиңісчілері санындалар: халас паза кондитерскай ас-тамах сығарчатхан «Сибирский вкус» ООО, халас сығарчатхан идінҷек Елена Бурнакова, «Саянмолоко» ООО, тустаан палых одын сығарчатхан Хакреспотреб-союз, «Абазинский промхоз» ООО, «Бирюса» ООО, чылығны синеҷең счетчик сығарчатхан «Семь координат» ООО, Ағбандағы профессиональнай технологияларның, экономиканың паза сервистің хакас колледжі.
Алғыстас пічіктерін алғаннарның санындалар талған итчеткен идінҷек Наталья Боргоякова, сӱттең тимнелген ас-тамах сығарчатхан идінҷек Виктория Останина.
Марығның ідӧк алынҷа сыйыхтары пар. 2016 чылда «За достижение в области качества» аарластығ танығлар ӱс предприятиенің устағ-ҷыларына читірілгеннер: «Вива-Лаб» ООО-ның устағҷызы Лилия Бастрыгинаа, «Ергаки» ООО-ның ӧӧн директоры Виктор Верьясовха, «ЕлИСей» ООО-ның устағҷызы Елена Скибаға.
- Пу марығда тӧртінҷі хати араластым. Сыбыра диплом алҷаңмын, пір хати - алғыстас пічиин. Асхыста пекарням пар, хайда талғаннаң, 1-ғы, 2-ҷі сорт уннаң халастар тимнепчебіс. Талғаннаң халас итчеткенібіснең піс пасха пекарнялардаң пасхалалчабыс. Мының алнында ууҷаларыбыс хайдағ шаньгалар иткеннер, піс андағох шаньгалар, аймах-пасха тадылығ халастар сығарчабыс. Чоннаң эҷігей, ӧріңме садызып алчабыс, аннаңар пістің ас-тамаабыс сын, - теен идінҷек Елена Бурнакова.
Пістің республиканың предприятиелері, идінҷектері, пу марығда аралазып, Хакасияны сабландырчалар. Олох туста марығ оларға сығарчатхан ниме-нооларын садып аларға оңдай пирче.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде