ОТНАҢ ТУЗАЛАНЧАТСА, СИЗІКТІГ ПОЛЫҢАР
05.04.2017
Хабарлар
Ам чылығ, хар-наңмыр чох, че чилліг кӱннер турыбысханда, пістің республикада ӧрттер сығарынаң улам хорғыстығ полыбысты. Алынҷа кізілернің салбыр тудынызы сылтаанда кӧп ӧрт сых парча, ӧрт ӱзірҷеңнер кӱннің сай ӧрттерні ӱзірерге ідӧк кӧп хати чӧрчелер. Ӧрт ӱзірҷеңнерге, арачылағҷыларға кізілернің, организацияларның ис-пайын чалыннығ оттаң арачылирға килісче.
Кӧзідімге, ирткен тынағ кӱннерін-де ле ӧрт ӱзірҷеңнер город-аалларда алты ӧрт ӱзірерге чӧргеннер, олар прайзы 2 апрельде сыхханнар. Ідӧк ӧрт ӱзірҷеңнер кӧйчеткен сӧп-сапты ӱзірерге 40 хати, кӧйчеткен чазыдағы отты ӱзірерге 20 хати чӧргеннер. Чазыда кӧйчеткен оттарның пірсі сала ла улуғ чобаға ағылбаан.
Хараазын Пии аймаандағы Новоенисейка аалзар чазыда кӧйчеткен от чағдапчатхан. Хазыр чил аны аалзар табырах сӱр сыххан. Аннаңар ӧрт ӱзірҷеңнерге сағба 1.30 часта кірген. Стене чіли чалыннаң кӧйчеткен оттаң тоғыр кӱрезерге 300-че кізі сыххан: ӧрт ӱзірҷеңнер, пос кӧңнінең полысчатхан кізілер, орындағы чуртағҷылар. Кӧйчеткен оттың чалбаа 10 километрге тиңнелген. Аны аалдаң пір километр ырахта ла тохтадып алғаннар. Махачы кӱресчілер чазыдағы ӧртті иртен 5.50 часта ла ӱзіріп алғаннар. Че аал от чалынынаң арачылалған.
Пу ӧрт ӱзірҷеңнер тоғызының пір ле кӧзідімі. Ол кӱндегі пасха ӧрттердеңер чоохтаза, Пии аймаандағы Бондарев аалда иб аразында времянка паза сарай кӧйген; Ағбанда - мылча (анда ӧрт электропроводканы саба тарт салған сылтаанда сых парған); Хубачарда иб аразындағы пӱдіріглер кӧйген (кізі отнаң салбыр тудынған сылтаанда ӧрт сыххан); Ағбан пилтіріндегі Тазоба станцияда тура кӧйген, хазыр чилде ӧрт табырах тарап парыбыстыр, сағба орай пирілген; Абазада ӧрт 2,1 тонна пилетеен отты чох идібіскен, ӧрт, тізең, кізінің салбыр тудынызы сылтаанда сых парған; иирде пазох Тазоба станцияда иб аразындағы пӱдіріглер кӧйген.
Хайди кӧрчезер, прай пу ӧрттер кізі сизіктіг полбаан сылтаанда сых парғаннар. Аннаңар пілерге кирек - ӧрт сығарбас правилолар сайбалза, аның салтары уғаа улуғ чобаға ағылча! Ол правилоларны прайзы даа чахсы пілче, че полғаны ла андағ ниме миннең полбас тіп сағынча. Отнаң тузаланарға киліссе, сизіктіг полыңар. Ӧрт сыхса, табырах ӧрт ӱзірҷеңнерге «101» номерҷе алай арачылағ службазының пірге «112» номерінҷе сығдырадыңар.
2015 чылда полған ӧрттердеңер ундубаңар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде