ЧИИТТЕРНІ ЭЛЕКТРОННАЙ КӦГЛЕР, ТЕЕЛБЕК ПАЗА ЕЛЕНА ТЕМНИКОВА САҒЫПЧА
30.06.2017
Хабарлар
Пу кӱннерде Хакасияда олаңай ла ізіг полбас, уғаа тың «ізіг» полар! Анзы Республика кӱніне удур тиксі чир-суубыста алғым иртер мероприятиелернең палғалыстығ. Читінҷі чылы республикада «Сибер Ил» чоннар аразындағы культура-турист форумына тиксі Россиядаң паза пасха-пасха хазналардаң аалҷылар чыылызар. Пуох кӱннерде Ағбанда чииттерге чыылызарға чахсы сылтағ полар «S0LARBASS-2017» фестиваль, хайзы пастағызын на республика синінде иртірілер.
Нимедең пасталған «SOLARBASS» фестиваль? Ол 2014 чылда Ағбан город синінде «ЕВРОЛЕТО» фестивальдаң пасталған. Чайғы тооза диджейлер паза кӧг пасчатханнар аразында марығ ирткен, салтарларны, тізең, Город кӱнінде искіргеннер. Пӱӱл январьда Хакасия пазы Виктор Зимин республиканың ӧткін чииттерінең тоғазығ иртіргенде, чииттер постарына килістіре улуғ фестиваль иртірерге сурынғаннар.
Іди «ЕВРОЛЕТО» фестиваль республика синіне ӧс парған. «Чииттернің табырах пастағлары паза проекттері кіні» фондтың директоры Оксана Трусова фестиваль тузында республика синіне ӧскірілгенін таныхтаан, пӱӱл Хакасияда Чииттер чылы чарлалған нооза.
Че хайхастығ алызығлар мыннаң тоозылбинча. 1 апрельде марыға чайаачы тоғыстарны алып пастаанда, пастағы араласчы Бакудаң (Азербайджан) полған. Фестивальны иртірчеткеннер марығны республика чуртағҷылары аразында чарлаан полғаннар, че ол позы ла чоннар аразындағы синге ӧзе халған. «РАЙ» реклама агентствозының креатив директоры Наталья Королёваның искіриинең, пӱӱнгі кӱнге марыға 10 аймах хазна чуртағҷыларының 130 тоғызы ызылған. Марығда ӱс номинация кӧріл парған: трек, сет (композициялар чыындызы) паза теелбек. Полғанында ла ікі сыйых читірілер: кӧрігҷілер паза жюри кӧрістерінең. Прай сыйыхтар пір тиң - 30 муң салковай, марыға 180 муң салковай пирілген. Че иң не танығлығ, марығ тоғыстарында хайди даа 2-3 лайнер (джингл) поларға кирек - ол «Хакасия», «Республика кӱні», «Кӱн», «Кӱнніг Хакасия» сӧстерні чоохтанғаны.
2016 чылда Альберт Тайдонов «Альберт паза компания» ӧмезінең хада «ЕВРОЛЕТО» марығда 100 муң салковай утып алған. Пӱӱл трикингнең айғасчатхан чиит оол жюриге кирілген. Аның кӧрізінең, фестиваль чииттерге постарының чайаачыларын кӧзідерге чахсы оңдай пирче.
Амды - иң ӧӧні. «SOLARBASS-2017» фестиваль 2 июльда, позырахта, 19.00 часта Ағбанда наа музей-культура кіні алнында иртер. Республика чуртағҷыларын паза аалҷыларны, уламох чииттерні электроннай музыка шоузы, теелбектер паза саблығ ырҷы Елена Темникова сағыпча (прай ниме тикке!).
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде