ХЫЗЫЛ ХАРА СУҒДА - ХАКАС ТІЛІ КӰНІ
08.09.2017
Хабарлар
Ӱртӱн айының 4-ҷі кӱнінде прай Хакасия Хакас тілі кӱнін таныхтаан. Ідӧк Хызыл хара суғдағы школада пу кӱн алғым ирткен. Иртенӧк прай олғаннар паза ӱгретчілер школаа хакас кӧгенектіг килгеннер. Ӱлӱкӱн хакас тіліне чарыдылған линейканаң пасталған. Аны асхан школа директоры, Хакасияның саблығ ӱгретчізі Маргарита Гавриловна Байкалова.
Аның тӧреен тілдеңер чылығ сӧстері прайзының чӱреен тибіреткен. Соонаң сӧс пирілген Хакасияның национальнай паза территориальнай политика министрінің орынҷызы Нина Гавриловна Челтыгмашеваа. Ол ідӧк прайзын алғыстаан мындағ пастағы ла ӱлгӱ синінде кӧріл парған ӱлӱкӱннең. Нина Гавриловна алынҷа алғыс чооғын читірген хакас тілі паза литература ӱгретчізі Светлана Антоновна Кочелаковаа, хайзы пӱӱл Хакас Республика правительствозының сыйиина турысхан.
Линейка соонаң олғаннар хакас тілінең «Минің тӧреен тілім - хакас тілі» тема хоостыра диктант паза «Чурта, тӧреен тілім!» темаҷа сочинение пасханнар. 3 - 7 класстағы полған на ӱгренҷі, прай кӱзін салып, диктантты алҷаас чох пазарға кӱстенген. 1-2 класстағылар, тізең, тӧреен тілінең текстті сіліг иде хобыра пасханнар. Улуғ класстағыларның чайаачы тоғыстары пірсі пірсінең артых полған, че, андағ даа полза, иң чахсылары алынҷа табылған. Актовай залда прай ӱгренҷілерге хакас писательлернің произведениелері, чайаачылары хоостыра школаның библиотека тоғынҷызы Н.Н.Тохтобина презентация иртірген паза кӧзідіг тимнеен. Олғаннар аның чооғын уғаа хынып, ситкіп искеннер паза Хуртуйах тастаңар фильм прайзының хайиин тартхан.
Маргарита Гавриловна Байкалова олғаннарға писатель Андрей Андреевич Халларовтың кічігдегі иреелестіг чуртас чолынаңар чоохтап пирген. Хаҷан-да, олған туста, чаа соонда, олар Кічіг Ноныптағы школада хада ӱгренген полтырлар. Аннаңар мындағ чоохтазығ писательнің чуртас чолы хоостыра олғаннарға уғаа туза полған. Пӱӱл А.Халларовха 75 час толарҷых. Писательнің кічігдегі сидік тузы, полған на паланың чӱреен тибіредіп, хайдағ-да іс артыс салған.
8-9 класстағы ӱгренҷілернің хакас тілі грамматиказын тирең пілчеткеннері ӧнетін иртірілген марығда чарғыҷыларның чооғында таныхталған. 5 - 7 класстағылар викторинада ідӧк теория сурығларын практикада тузалан полчатханын кӧзіткеннер. Пасталығ класстағылар, хакас ойыннарын ойнап, наа сӧстернең пілістерін пайытханнар.
Марығларның иң артых араласчылары Аарластығ пічіктернең, тадылығ сыйыхтарнаң сыйлатханнар. Пу кӱн, олаңай ла кӱн полбин, полған на кізіде, сӧбіреде пос тілін аннаң андар чуртадарынаң палғалыстығ хыйға сағыстар тӧрітсін. Хакас тілін тилідері, аннаң уйатпин чоохтазары, аны пала-пархаларға ӧбекелерібістең килген тиксі пайынаң читірері, пір ле кӱннең палғалыспин, мыннаң мындар кӱннең кӱнге алғып одырзын!
Автор :
Ольга САГАЛАКОВА, Хызыл хара суғдағы школаның хакас тілі паза литература ӱгретчізі
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде