АҒБАНДА МОСКВАНАҢ МАРЫҒЛАЗАРЛАР
19.09.2017
Хабарлар
Ағбандағы ипподромда 23 сентябрьда «Сибирьнің улуғ хурчаа» ат чарызы иртер. Аның пастағҷызы полча Хакасияның пазы Виктор Зимин. Пу марығда Сибирьдегі прай даа регионнарның командалары араласчалар. Чыл сай даа ат чарызы уғаа хазыр оңдайда иртедір.
Пу наада «Сибирьнің улуғ хурчаа» марыға тимненіс хайди парчатханнаңар хабарҷыларға чоохтап пиргеннер Ағбандағы ипподромның директоры Владимир Гофферберг, чӱгӱрҷең аттар тутчатхан Иван Миндибеков паза республиканың ат чарызынҷа федерациязының вице-президенті Геннадий Кайманов.
Хабарҷылар - ӧткін чон. Олар ла пілбес ниме чоғыл тидірлер. Аннаңар мында даа кирек сала пасха оңдайнаң парыбысхан. Чоохтазығ ат чарызы тузында Ағбанда Москванаң тоғазығ хайди иртердеңер, анда кемнер аралазардаңар пасталған. Тоғазыға килген кізілер анзына тимде полтырлар, хабарҷыларның прай сурығларына нандырғаннар.
- Мындағ тоғазығ пастағызын на иртірілче. Анзы Москва Хакасияның, Ағбанның чи, чӱгӱрҷең аттарының чидіглерін пӧзік паалапчатханына санирға чарир, - теен Ағбандағы ипподромның директоры Владимир Гофферберг.
- Пір хати Москва - Сибирь ат чарызы ирткен. Анда Сибирьдегі пис регион араласхан. Амды москвадағылар Ағбанда тоғазығ иртірерлер. Анзына ӧрінерге кирек, - ӱлескен сағыстарынаң чӱгӱрҷең аттар тутчатхан Иван Миндибеков.
- Иван Иванович уғаа пазымнығ кізі, махтанарға хынминча. Пӱӱл Москвада Гильдейцтің сыйии ӱчӱн улуғ марығ полған. Анда аның Натан ады чиңіс тутхан. Аның соонда кӧрігҷілер дее, чӱгӱрҷең аттар тутчатханнар даа, Хакасияны география картазында тілеп, саңай майыхтырлар, - кӱлімзірепче ат чарызынҷа федерациязының вице-президенті Геннадий Кайманов.
Ағбанда Москванаң марығ 23 сентябрьда, «Сибирьнің улуғ хурчаа» ат чарызы тоозылза, пасталар. Аннаңар хабарҷыларнаң тоғазарға килген кізілер 23 сентябрьда прайзын Ағбандағы ипподромзар хығырғаннар. Ат чарызының ӧӧн чардығы 12.00 часта пасталар, анаң москвадағыларнаң тоғазығ иртер.
«Сибирьнің улуғ хурчаа» марығның Ағбандағы ипподромында иртер ат чарызы финалға саналча. Амғы тусха Хакасияның піріктірілген командазы, 160 сан чыып алып, пастағы орында парча. 23 сентябрьда ат чарызында хайдағ регионның командазы пастағы орынға сығары пілдістіг пол парар. Оңарылыстығ, пістіңнер, марығ ээзі полып, чиңісті пасхазына пирбеске харазарлар.
Автор :
Анатолий СУЛТРЕКОВ Сом Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы