ИМҶІЛЕРГЕ - НАА МАШИНАЛАР
06.02.2018
Хабарлар
Ағбанда Г.Я.Ремишевскаяның адынаң имнег туразының алнында республиканың имнег тураларына табырах имнег полызиин пирҷең автомобильлер читірілген.
Наа автомобильлер клӱстерін имнег туралары устағҷыларына Хазна Думазының депутады Надежда Максимова паза Хакасияның хазых хайраллаҷаң министрі Владимир Костюш читіргеннер.
Наа техника Россия правительствозының 2017 чылның 17 ноябрьында алылған «Россияда сығарылған табырах имнег полызии автомобильлерін аларына бюджет ассигнованиелерін пирердеңер» чахии хоостыра пирілген. Олар Хакасияның моногородтарының табырах имнег полызии станцияларына пирілгеннер. Андағ сыйыхты Харатас, Саяногорск, Абаза, Сорығ, Тойым паза Тӧӧ пазы алғаннар. Пістің республика табырах имнег полызиин пирҷең машиналарны пӱӱл ікінҷізін алча. 11 январьда Хакасия пазы Виктор Зимин 23 наа машинаны республиканың город-аймахтарының имнег тураларының ӧӧн имҷілеріне читірген.
Прай 29 наа машина «В» класстығ автомобильлер. Олар прайзы, ағырығ кізее имнег туразына читкенҷе, табырах полызығ пирҷең оңдайлығ. Андағ полызығны, имнег туразынзар читкенҷе, имҷілер паза фельдшерлер ӧмезі пирче.
Хакасияның хазых хайраллаҷаң министрі Владимир Костюш чоох тутхан.
- Пӱӱл республиканың ӧӧн имнег тураларының паза табырах имнег полызии станцияларының автопарктары 50 азыра %-ке нааҷылалча. Республиканың аймах-городтарындағы табырах имнег полызиин пирҷең системада прай 74 автомобиль саналча. Чыл пасталғанда, 23 автомобиль пирілген, амды - 6 автомобиль. Пістің прай город-аймахтар табырах имнег полызиин пирҷең наа машина алып алдылар, - искірген Владимир Костюш.
Хазна Думазының депутады Надежда Максимова, машиналар клӱстерін имнег тураларының ӧӧн имҷілеріне читіріп, таныхтаан:
- Мин федеральнай ӱлгӱлер органының кізізібін. Федеральнай органнар Россия президентінің чахиин толдырчалар. Пістің президент депутаттарның, толдырығлығ органнарның паза даа пасха органнарның на искіриин хайыға алып тоғыс апарбинча. Ол хазна чуртағҷыларының искіріглерін хайыға алча.
Регионнарзар чорыхха чӧрче, телевидение пастыра чоннаң кӧні палғалыстар иртірче, аның полызиинаң чонның кирексіністері хайыға алылча. Пу президенттің чахии хазых хайраллирын чахсыландырарының ӧӧн кӧстеглерінің пірсі полча.
Асхыс аймаандағы Тӧӧ пазы посёлоктағы имнег туразының ӧӧн имҷізі Сергей Матыцин сағыстарынаң ӱлескен:
- Пістің имнег туразына уғаа киректелчеткен табырах имнег полызиин пирҷең машина пирілді. Піс аны чидікпин сахтаабыс. Тӧӧ пазы харлығ орында орныхча, аннаңар аның хомай чолларха чӧрҷең оңдайлары піске килістіре. Сағынчам, пістің посёлоктың 3 муң 800 чуртағҷызы наа машинаа ӧрінер. Ідӧк пістің имҷілер Писхамҷыдағы чуртағҷыларзар табырах имнег полызиин пирерге чӧрчелер, аннаңар автомобиль уғаа туза полар.
Сергей Николаевичтің ӧрінізі іле кӧрінген, табырах имнег полызиин пирҷең автомобильнің істі-тастын, махтап, піске кӧзіткен. Хайдағ оборудование парын кӧзідіп, хайдағ полызығ пиреріне киректелчеткенін чарытхан.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде