ЧИИТТЕР ЧЕЕСТЕЛГЕННЕР
24.04.2018
Хабарлар
Шира аймаандағы депутаттар чӧбінің кнезі Сергей ЗАЛЕСНЫЙ чиит ӱгретчі Виктор КАПЧИГАШЕВКЕ сыйых читірче.
Сыйыхтас. Шира аймааның Культура туразында улуғ чыылығ ирткен. Пӧзік чидіглерге читкен чииттер аймах пазының ахчалығ сыйиинаң таныхтатханнар.
Шира аймаа пазы Сергей Зайцев чииттерні улуғ чидіглері ӱчӱн алғыстаан. Пастағы номинация «Халых чуртаста ӧткін араласхан ӱчӱн» полған. Анда тӧрт кізі сценазар хығыртылған. Оларның ікізі ле сыйых алған, ол санда Виктор Капчигашев, ікізі - алғыстас пічиин.
Виктор Капчигашев Чоохчылдағы пасталығ школада палаларны пос тіліне ӱгретче. Ол Ағбандағы Н.Ф.Катановтың адынаң Хакас хазна университедін тоосхан. Виктор Капчигашев прай культура мероприятиелерінде ӧткін араласча. Пос аалында ол «Ах Тас» халыхтарның орындағы пос устанызын (ТОС) тӧстеп алған. Чииттернең аалдағы чонның чуртазын хынығ идерге харасчалар. Пос тілі аалыбыста истілзін тіп, прай хакас ӱлӱкӱннерін иртірчелер. Аймахтағы паза республикадағы ӱлӱкӱннерде, аралазып, пастағы орыннар алчалар.
«Техническай чайаачы тоғыста, искусствода, литературада, физическай культурада паза спортта улуғ чидіглерге читкен ӱчӱн» номинацияда араласханнар аймах, республика паза Россия синіндегі марығ-фестивальларның чиңісчілері. Анда ікі кізее сыйых пирілген: Малика Рыбинаа паза Леонид Элерге. Малика Рыбина Палты кӧл аалдағы школада 9 класста ӱгренче. Ол аймахта сарыннар мариинда удаа араласча. Пӱӱл, тізең, Москвада «Ты супер!» марығда араласхан. Ол андар пастап 2016 чылда аудио-дискті ысхан, че аны марыға хығырбааннар. Пылтыр пазох дисктерін ызыбысханда, аннаң ағаа хығыртығ килген. Анда ол пастағы таллағны иртіп, марығның ӱзінҷі чардығында араласханох, че пу проектке алылбаан. Малика анзына хомзынминча, ам эстрада ырҷызына ӱгренерге Хызылчарзар алай Москвазар парарбын тидір. Ам аймахтағы «Оңнен, чир-суум!» фестивальда, хакас сарынны ырлап, аралазарға тимненче.
Ӱзінҷі номинациязы «Ӱгредігдегі чидіглер ӱчӱн» адалған. Ахчалығ сыйыхха тӧрт хыс турысхан. Оларның аразында -Тоғыр чул аалдағы школаның ӱгренҷізі Анна Чустеева. Ол, ӧӧн предметтер олимпиадаларында аралазып, кӧп грамота, сертификат алған. Пу ӱгредіг чылында республикада хакас тілі олимпиадазында чиңісчі полыбысхан.
Тӧртінҷі номинациязында - «Тоғыста иң пӧзік чидіглерге читкен ӱчӱн» сыйыхты 7 кізі алған. Оларның аразында Ширадағы 4 № школаның ОБЖ ӱгретчі-организаторы Александр Межеков полған.
Пістің аймахта андағ харасхах, пӧзік пілістіг чииттер парда, оларны кӧріп, кізінің кӧңні чарыпча. Пір дее нимедең чалтанмин, пілістерін, устарын кӧзідіп, сағынған сағыстарын толдырып, пос чонына туза идіп чӧрзіннер тіп алғапчам.
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде