НАЛОГ СИНІ ХЫЗЫРЫЛАР
22.06.2018
Хабарлар
Ӧӧркі Чӧп. Депутаттар идінҷектерге хабазар пӧгіннең тибіреділбинчеткен ис-пайға налог ставказын тӱзірерге пӧгiнчелер. Закон проекті чағынғы сессияда ӱзӱрілер тіп кӧрілче.
Хакасияның Ӧӧркі Чӧп кнезі Владимир Штыгашев 20 июньда президиум чыылиин иртірген. Чыылығда ӱзӱрілген сурығларның пірсі идінҷектерге теелген. Республика правительствозы кирген закон проекті хоостыра организацияларның паза пос алынҷа идінҷектернің тибіреділбинчеткен ис-пайына налог ставказын тӱзірібізері кӧрілче.
Ӧӧркі Чӧп президиумын закон проектінең Хакасияның экономика тилізі министрі Татьяна Пауль таныстырған. Хайди ол таныхтаан, закон проекті Хакасияның пазы Виктор Зиминнің чахиинда республиканың идінҷектеріне хабазар пӧгіннең тимнелген. Россияның Налог кодексі субъекттерге постың чирінде андағ льготалығ налог ставкаларын турғызарға оңдай пирче.
- Пу закон проектінің кӧстее бизнеске килістіре оңдайлар тӧстирі, республикадағы организацияларның паза пос алынӌа идінӌектернің тоғызын хайраллап халары полча, - искірген Татьяна Пауль.
2017 чылда тибіреділбинчеткен ис-пайға налог ставказы прайзына 2 процент полған полза, 2018 чылда улии 1 муң квадрат метрінең 2 муң квадрат метріне теере полған тибіреділбинчеткен ис-пай объекттеріне налог ставказын 1 процент ит салары кӧрілче, улии 2 муң квадрат метрінең 6 муң квадрат метріне теере объекттерге - 1,5 процент, улии 6 муң квадрат метрінең асчатхан объекттерге - 2 процент.
- Таныхтирға кирек, закон проектінӌе тӧбін арах синніг налог ставказы пӱӱлгі чылның 1 январьынаң тоғын сығар, - таныхтаан Ӧӧркі Чӧп кнезінің орынҷызы, бюджетче паза налог политиказында комитеттің кнезі Сергей Комаров.
- Закон алылғаны идінӌектерге ле нимес, че ідӧк республика чуртағӌыларына хабазар. Піс прайзыбыс пілчебіс нооза, налог тӧлеглері пу алай пасха оңдайнаң пирілчеткен полызығларның паза садылчатхан ниме-нооларның паазынзар киріл парчалар.
Хайди искірілген чыылығда, амғы туста республикада улии 1000 кв.м. теере 3500 объект пічікке кирілген, улии 1000 - 2000 кв.м. полчатхан объекттер - 240-ха чағын, улии 2000-6000 кв.м. - 400 артиинаң, улии 6000 кв.м асчатханнар - 24. Депутаттар налог сині хызырылза, идінҷектернің кӧбізі «кӧлектең» сых сығарлар тіп ізенчелер, ол оңдайнаң республика бюджедінзер кірер ахча сині хозылар тіп сахталча. Іди азы-нада сананыстарда, закон алыл парза, 2018 чылда ис-пайға налогтаң бюджетсер кірчеткен ахча сині 183,6 миллион салковай полар тіп кӧрілче, 2019 чылда паза аның соондағы чылларда - 220 миллион артиинаң салковай.
Ідӧк пу чыылығда Ӧӧркі Чӧптің теестегі сессиязын иртірдең кӱн чарадыға алылған. Президиумдағылар аны 4 июльда иртірерге чарат салғаннар. Пу хығыртығ депутаттарының ол халғанҷы сессиязы полар, неке.Депутаттар чайғы каникулларына парыбызарлар нооза, анаң, тізең, оларның полномочиелері тоозылча - кӱскӱнің пастағы айында республика наа Ӧӧркі Чӧпті табар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 31 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде